راگه‌هاندنا عه‌ره‌بی:رۆسیا هه‌ڤپه‌یمانیه‌كا نوو ل سووریێ ئاڤا كریه‌

راگه‌هاندنا عه‌ره‌بی:رۆسیا هه‌ڤپه‌یمانیه‌كا نوو ل سووریێ ئاڤا كریه‌

9

ئه‌ڤرۆ:

ده‌زگه‌هێن راگه‌هانا عه‌ره‌بی دیار دكه‌ن كو ب سه‌رپه‌رشتیا رۆسیا هه‌ڤپه‌یمانیه‌كا نوو ل سووریێ هاتیه‌ ئاڤاكرن و هێزێن سووریا دیموكرات ژی د وێ هه‌ڤپه‌یمانێ دا جه دگرن و ئارمانجا هه‌ڤپه‌یمانیێ ژی ئه‌وه‌ كو رێ نه‌ده‌ن توركیا و هێزێن سه‌ر ب وێ ئێرشی ئاخا سووریێ بكه‌ن.

ئه‌لمۆنیتۆر د راپۆرته‌كێ دا دیار كریه‌ كو ده‌مه‌كه‌ ب سه‌رپه‌رشتیا رۆسیا كۆمبوون د ناڤبه‌را رژێما سووریێ، هێزێن سه‌ر ب ئیرانێ و هێزێن سووریا دیموكرات برێڤه‌ دچن و د ئه‌نجام دا هه‌ر سێ ئالی رێككه‌فتن كو پێكڤه‌ هه‌ڤپه‌یمانیه‌كا نوو بۆ پاراستنا سووریێ ئاڤا بكه‌ن و هێزێن سووریا دیموكرات ژی د هه‌ڤپه‌یمانیا نوو دا جه دگرن، ئارمانجا سه‌ره‌كی یا هه‌ڤپه‌یمانیا نوو ژی ئه‌وه‌ كو نه‌هێلن توركیا ئێرشی ئاخا سووریێ بكه‌ت، رۆسیا ب هه‌موو ره‌نگه‌كێ پشته‌ڤانیێ ل هێزێن سووریا دیموكرات و هێزێن رژێما  به‌شاری دكه‌ت دا ده‌ڤه‌رێن سنۆری بپارێزن و رێ نه‌ده‌ن توركیا و هێزێن سه‌ر ب وێ ده‌ست ب ئۆپه‌راسیۆنه‌كا نوو بكه‌ن.

د راپۆرتێ دا ئه‌و یه‌ك ژی هاتیه‌ دیار كرن كو رۆسیا ژ زێده‌گاڤیێن توركیا ل سووریێ دلگرانه‌ و ژ به‌ر هندێ ژی ب هه‌موو ره‌نگه‌كێ پشته‌ڤانیێ ل رژێما سووریێ دكه‌ت و هێزێن سووریا دیموكرات ژی ده‌ستپێشخه‌ریا رۆسیا گه‌له‌ك گرنگ دبینن و به‌رپرسێن په‌كه‌كێ یێن ل قه‌ندیلی ژی پشته‌ڤانیێ ل هه‌ڤپه‌یمانیا نوو ل سووریێ دكه‌ن.

ل ئالیێ دی رۆژناما ئه‌لعه‌ره‌بیه‌ ژی د راپۆرته‌كێ دا به‌حسێ ‌هندێ كریه‌ كو د سه‌ره‌دانا ڤێ دووماهیێ یا وه‌زیرێ ده‌رڤه‌ یێ رۆسیا بۆ توركیا دا لاڤرۆڤی ب ره‌نگه‌كێ ئاشكرا بۆ به‌رپرسێن توركیا دیار كریه‌ كو دڤێت هوون نه‌بنه‌ ئه‌گه‌رێ هندێ ره‌وشا ناڤخوه‌یی یا سووریێ ئالۆزتر ل بهێت و ئۆپه‌راسیۆنا نوو یا توركیا ل سووریێ دێ بیته‌ ئه‌گه‌رێ ئالۆزیێن نوو و ئه‌و یه‌ك ب چو ره‌نگه‌كێ ناهێته‌ قه‌بوولكرن و دڤێت توركیا رێزێ ل سه‌روه‌ریا ئاخا سووریێ بگریت و ئاریشێن هه‌ی ژی دڤێت توركیا ب رێیا دانوستاندنان چاره‌سه‌ر بكه‌ت.

ئه‌لعه‌ره‌بیه‌ ئه‌و یه‌ك ژی دیار كریه‌ كو رۆسیا ژ بزاڤێن توركیا ل سووریێ دلگرانه‌، چونكو نها رۆسیا كار بۆ هندێ دكه‌ت كو هه‌موو گرۆپێن چه‌كدار ژ ئاخا سووریێ ده‌ركه‌ڤن، به‌ری نها ژی رۆسیا چه‌ندین جاران هۆشداری دابوو توركیا كو دڤێت هێزێن خوه‌ ژ ئدلبێ ڤه‌كێشیت، لێ هه‌تا نها ژی توركیا گۆهداریا رۆسیا نه‌كریه‌، ژ به‌ر هندێ ژی نها رۆسیا دڤێت ب هه‌ر ره‌نگێ هه‌ی رێگریێ ل ئۆپه‌راسیۆنه‌كا نوو ل سووریێ بكه‌ت و هه‌ڤپه‌یمانیا نوو یا كو رۆسیا ئاڤاكری ژی بۆ پاراستنا سووریێ یه‌، پڕانیا وه‌لاتێن عه‌ره‌بی ژی پشته‌ڤانیێ ل هه‌ڤپه‌یمانیا نوو دكه‌ن لێ سعوودیێ داخواز كریه‌ كو پشتی ره‌وشا سووریێ ئارام بیت دڤێت هێزێن سه‌ر ب ئیرانێ هه‌ر زوو ژ ئاخا سووریێ ده‌ركه‌ڤن.

کۆمێنتا تە