رۆسیا دێ هێزێن خوه‌ ژ سووریێ ڤه‌كێشیت

رۆسیا دێ هێزێن خوه‌ ژ سووریێ ڤه‌كێشیت

13

ئه‌ڤرۆ:

ئاژانسه‌كا رۆسیا دیار دكه‌ت كو ژ به‌ر شه‌رێ نها ل ئۆكرانیایێ پۆتینی بریار دایه‌ كو هه‌موو هێزێن وان یێن نها ل سووریێ بچنه‌ ئۆكرانیایێ و پشكداریێ د شه‌ری دا بكه‌ن و ژ به‌ر هندێ ژی رۆسیا دێ بله‌ز هێزێن خوه‌ ژ سووریێ ڤه‌كێشیت.

ئاژانسا موسكو تایمز یا رۆسیا راگه‌هاند كو ژ به‌ر شه‌رێ نها د ناڤبه‌را رۆسیا و ئۆكرانیایێ دا وی وه‌لاتی بریار دایه‌ كو هه‌ر زوو ده‌ست ب ڤه‌كێشیانا هێزێن خوه‌ ژ سووریێ بكه‌ت، دا ئه‌و هێز بشێن پشكداریێ د شه‌رێ نها ل ئۆكرانیایێ دا بكه‌ن، چونكو هێزێن رۆسیا یێن ل سووریێ ده‌مه‌كه‌ پشكداری د شه‌رێ ل دژی داعشێ دا كرینه‌ و بۆ شه‌ری ئاماده‌ نه‌، ژ به‌ر هندێ ژی ب فه‌رمانا پۆتینی دێ هه‌ر زوو هێزێن رۆسیا یێن نها ل سووریێ چنه‌ ئۆكرانیایێ دا پشكداریێ د شه‌ری دا بكه‌ن.

ل گۆر هه‌مان ئاژانسێ رۆسیا ناهێلیت بنگه‌ه و باره‌گایێن هێزێن وێ ل سووریێ چۆل بمینن و ژ به‌ر هندێ ژی هێزێن سه‌ر ب سووریێ و هه‌روه‌سا حزبوللا لوبنانێ دێ ل وان بنگه‌هان بجه بن و هه‌ر ده‌مێ مه‌ترسی ل سه‌ر سووریێ دروست بیت رۆسیا ئه‌و شیان هه‌نه‌ كو بشێت د ده‌مه‌كێ كورت دا ده‌ستێوه‌ردانێ بكه‌ت.

ل ئالیێ دی دوهی مالپه‌رێ تایمز ئسرائیل ژی هه‌مان نووچه‌ پشتراستكر و راگه‌هاند كو چه‌ند رۆژن رۆسیا ده‌ست ب ڤه‌كێشانا هێزێن خوه‌ ژ سووریێ كریه‌ و هێزێن رۆسیا نها دچنه‌ ئۆكرانیایێ، ژ به‌ر هندێ ژی به‌ری دو رۆژان سه‌رۆكێ رژێما سووریێ به‌شار ئه‌سه‌د بله‌ز سه‌ره‌دانا ئیرانێ كر و بابه‌تێ ڤه‌كێشانا هێزێن رۆسیا ل سووریێ ل گه‌ل عه‌لی خامنه‌یی رێبه‌رێ شوره‌شا ئیسلامی یا ئیرانێ گه‌نگه‌شه‌ كریه‌ و ئیرانێ ژی دیار كریه‌ ئه‌و دێ هێزێن پێدڤی ره‌وانه‌ی سووریێ كه‌ن و ناهێلن چو مه‌ترسی بۆ پاشه‌رۆژا سووریێ دروست ببن.

چاڤدێرێن سیاسی ژی دیار دكه‌ن كو ڤه‌كێشانا هێزێن رۆسیا ژ سووریێ نیشا دده‌ت كو رۆسیا د شه‌رێ ل هه‌مبه‌ر ئۆكرانیایێ دا سه‌ركه‌فتی نه‌بوویه‌ و د شه‌ری دا گه‌له‌ك ته‌نگاڤ بوویه‌، ژ به‌ر هندێ ژی ژ نه‌چاریێ ده‌ست ب ڤه‌كێشانا هێزێن خوه‌ ژ سووریێ دكه‌ت، بێگومان ڤه‌كێشانا هێزێن رۆسیا دێ كارتێكرنا خوه‌ ل پاشه‌رۆژا سووریێ ژی كه‌ت، ره‌نگه‌ ئه‌و یه‌ك ببیته‌ ئه‌گه‌ر كو پێگه‌هێ ئیرانێ ل سووریێ پتر ژ جاران بهێز بكه‌ڤیت و ئیران دشێت مه‌ترسیێ بۆ ئه‌مریكا و ئسرائیلێ دروست بكه‌ت، ره‌نگه‌ پۆتینی بڤێت ب رێیا ڤه‌كێشانا هێزێن خوه‌ ژ سووریێ ره‌وشا وی وه‌لاتی پتر ئالۆز بكه‌ت و دبیت ڤه‌كێشانا هێزێن رۆسیا ژ سووریێ ببیته‌ ئه‌گه‌رێ زێده‌بوونا كریارێن تیرۆرستی یێن داعشێ.

کۆمێنتا تە