رۆسیا کار بۆ دەستپێکرنا قۆناغەکا نوو ل سووریێ و رۆژئاڤایێ کوردستانێ دکەت

رۆسیا کار بۆ دەستپێکرنا قۆناغەکا نوو ل سووریێ و رۆژئاڤایێ کوردستانێ دکەت

3

بەرپرسەکێ رێڤەبەریا خوەسەر یا رۆژئاڤایێ کوردستانێ دیار کریە، پشتی کریارا تیرۆرستی یا ل رۆسیا، بەرپرسێن وی وەلاتی سەرەدانا رۆژئاڤایێ کوردستانێ و شامێ کرینە و داخواز ژ هەر دو ئالیان کرینە ژ بۆ چارەسەرکرنا پرسێن هەی دەست ب دانوستاندنان بکەن.

بەرپرسەکێ رێڤەبەریا خوەسەر یا رۆژئاڤایێ کوردستانێ کو نەخواست ناڤێ وی بهێتە ئاشکرا کرن بۆ دەزگەهێن راگەهاندنا سەر ب رێڤەبەریا خوەسەر دیار کریە، پشتی کریارا تیرۆرستی یا ل رۆسیا کو د ئەنجام دا گەلەک کەس بوونە قوربانی، شاندەکێ رۆسیا سەرەدانا رۆژئاڤایێ کوردستانێ کرینە و ل گەل مەزلوم عەبدی فەرماندارێ گشتی یێ هێزێن سووریا دیموکرات کۆمبووینە و د کۆمبوونێ دا بەحسێ شەڕێ ل دژی تیرۆرێ کرینە و شاندێ رۆسیا دیار کریە، ئەو بەرهەڤن ژ بۆ ب تەمامی ژناڤبرنا داعشێ پتر هاریکاریا هێزێن سووریا دیموکرات بکەن و هەروەسا داخواز ژ مەزلوم عەبدی کرینە ژ بۆ ئارامیا سووریێ و ب تەمامی ژناڤبرنا داعشێ ئەو دێ هاریکار بن دا ل گەل شامێ ژی دەست ب قۆناغەکا نوو بکەن.
هەمان بەرپرسی ئەو یەک ژی دیار کریە، د کۆمبوونێ دا فەرماندارێ گشتی یێ هێزێن سووریا دیموکرات دیار کریە، وان د شەڕێ ل دژی داعشێ دا هەتا نها گەلەک قوربانی داینە و شەڕێ ل دژی داعشێ بەردەوام دکەت و ژ بۆ چارەسەرکرنا پرسێن ل گەل شامێ ژی ئەو بەرهەڤن ب رێیا دانوستاندنان پرسێن هەی چارەسەر بکەن، لێ دڤێت شام راستیا نها قەبوول بکەت، چونکی هەتا نها ژی بەرپرسێن شامێ دخوازن وەکو بەرێ جارەکا دی حوکمی ل هەموو سووریێ بکەن، لێ ئەو یەک ژ ئالیێ رێڤەبەریا خوەسەر، کوردان و پێکهاتێن دی یێن ل رۆژئاڤایێ کوردستانێ و باکورێ سووریێ ڤە ناهێتە قەبوول کرن.
ژێدەرێن میدیایی ل رۆژئاڤایێ کوردستانێ و سووریێ دیار دکەن، شاندێ رۆسیا ل گەل بەشار ئەسەد و بەرپرسێن دی یێن سووریێ ژی کۆمبووینە و بەحسێ چارەسەرکرنا پرسێن نها د ناڤبەرا شامێ و رێڤەبەریا خوەسەر دا کرینە، لێ هەتا نها ب فەرمی نە شامی و نها ژی رێڤەبەریا خوەسەر سەبارەت ب هاتنا شاندێ رۆسیا و ناڤەرۆکا هەڤدیتنان چو داخۆیانیێن فەرمی بەلاڤ نەکرینە.
چاڤدێرێن سیاسی ژی دیار دکەن، پشتی کریارا تیرۆرستی یا ل رۆسیا، هەلوەستێ رۆسیا ل هەمبەر کوردان ژی تا رادەیەکێ هاتیە گوهۆڕین، چونکی نها رۆسیا وەسا دبینیت هەکە ل هەمبەر داعشێ و گرۆپێن دی یێن تیرۆرستی وەکو پێدڤی هاریکاریا کوردان نەکەت، دێ بهێزبوونا داعشێ د پاشەرۆژا دا بیتە مەترسیەکا گەلەک مەزن بۆ رۆسیا، هەروەسا رۆسیا دڤێت رۆلەکا کاریگەر بۆ چارەسەرکرنا پرسێن نها د ناڤبەرا شامێ و رێڤەبەریا خوەسەر دا بگێریت، چونکی رۆسیا دڤێت رەوشا سووریێ یا ئاسای بیت دا ئەمریکا نەچار بیت هەموو هێزێن خوە ژ سووریێ ڤەکێشیت.

کۆمێنتا تە