رێنمایێن دانا پارچە ئەردان خال و خزمەت و خێزانێ‌ ڤەدگرن

رێنمایێن دانا پارچە ئەردان خال و خزمەت و خێزانێ‌ ڤەدگرن

6

ئەمیر ئەترووشی:

بەرپرسەكێ وەزارەتا باژێرڤانیێ ئاشكرا كر، د چەند رۆژێن بهێت دا رێنمایی و رێكارێن چاوانیا پێدانا عەردی ب فەرمانبەران دێ‌ هێنە بەڵاڤكرن، دبێژیت ژی: «رووبەرێ عەردی 200 مەترن و دێ مینیت ل سەر خال و خزمەت و خێزان و زارۆیان.»

د. چوارس عەبدولهادی، رێڤەبەرێ گشتیێ نەخشەدانانا ئاڤەدانیێ ل وەزارەتا باژێرڤانیێ راگەهاند: «پشتی بڕیارا سەرۆكێ حكوومەتێ بۆ پێدانا عەردی ب سەر فەرمانبەران چەند كۆمبوونەك ل وەزارەتا باژێرڤانیێ دگەل باژێرڤانییان كرینە بۆ دیاریكرنا كۆمەكا پێشنیار و راسپاردا بۆ بابەتێ عەردی و دیاریكرنا ئاستەنگ و ئاریشان.»
ئاماژە ب وێ ژی دا، حەفتییا بووری كۆمبوونەكا بەرفرەهـ ب سەرپەرشتیا وەزیرێ باژێرڤانیێ برێڤەچوو، گوتژی: «هەمی لایەن ل باژێرڤانیان راسپاردن پرسا دیاریكرنا عەردی ئێكلایی بكەن، ئەڤ حەفتییە، دێ حەفتییەكا ئێكلاكەر بیت ب كریار هژمارا عەردی دێ هێنە دیار كرن.»
ئەو ژی دیار كر، نوكە پشكەك ژ باژێرڤانییان عەردێن پێتڤی هەنە و پشكەكا دی ژی مژوولی چارەسەركرنا ئاریشانە.
ڕۆژا 27ێ03ێ2024، جڤاتا وەزیرێن هەرێما كوردستانێ بڕیار دا ب پێدانا عەردی ب سەر وان فەرمانبەران یێن كۆ مفادارنەبوونە ژ یاسا و رێنماییان و وەزارەتا باژێرڤانی و گەشتوگوزارێ ژی بۆ جێبەجێكرنا وێ بڕیارێ ڕاسپاردیە.

وی بەرپرسێ باژێرڤانیێ تەكەز ژی كر، رێنمایی و رێكارێن چاوانییا پێدانا عەردی ب سەر فەرمانبەران ژ لایێ وەزارەتا باژێرڤانیێ تمام كریە و دایە جڤاتا وەزیران بۆ پەسەندكرنێ: «جڤاتا وەزیران گۆتۆبێژ لسەر كریە و بڕیارە د چەند رۆژێن بهێتدا رێنمایی و رێكار بهێنە پەسەند كرن و د رۆژناما (وەقایع یا كوردستانێ) بهێنە بڵاڤكر.»
د. چوارس عەبدولهادی دبێژیت: «ئەو فەرمانبەرێن كۆ مفادار نەبووینە، ژ وەرگرتنا عەردی، هەمیشەیی بیت یان ژی گرێبەست دێ بڕیاڕ ڤەگریت، بەلێ ئەو ژی دێ ب قۆناغ بیت و لسەر خاڵ و خزمەت و خێزان و زارۆكان رادوەستیت.»
بەحسا وێ ژی كر: «رووبەرێ عەردی دێ 200 مەتر بیت و پشتی عەردی ددەنە فەرمانبەری، یێ ئازادە بكەتە خانی یان بفرۆشیت.»
دووپات كر، بڕیار سەرتاسەرێ پارێزگەهـ و ئیدارێن سەربەخۆیێن هەرێما كورستانێیە و ب كریار ل چەند هەیڤێن بهێت دابەشكرنا عەردی دێ دەست پێ كەت.
پێنگاڤێن كرداریێن دابەشكرنا عەردی ب سەر فەرمانبەران كەفتە وارێ جێبەجێكرنێ و وەزیرێ باژێرڤانی و گەشتوگوازارێ ژی تەكەزێ لسەر بلەزكرنا پرۆسەسێ كر.
راگەهاندنا وەزارەتا باژێرڤانی و گەشتوگوزارا حكوومەتا هەرێما كوردستانێ بڵاڤكریە، ب سەرپەرشتییا ساسان عەونی، وەزیرێ باژێرڤانی و گەشتوگوزارێ و ب پشكدارییا ڕاوێژكاران، رێڤەبەرێن گشتیێ نەخشەدانانا ئاڤەدانیێ، یاسا ل وەزارەتێ، رێڤەبەرێن گشتیێن باژێرڤانییان، سەرۆكێ باژێرڤانییان، رێڤەبەرێن نەخشەدانانا ئاڤەدانیێ ل هەمی پارێزگەهـ و ئیدارێن سەربەخۆ كۆمبوونا دووێ یا جڤاتا باژێرڤانیێ، ب مەرەما دەستپێكرنا پێنگاڤێن كرداری بۆ دابەشكرنا عەردی بسەر فەرمانبەران برێڤەچوو.
ئاماژە ب وێ ژی دا: «د كۆمبوونێدا وەزیرێ باژێرڤانی و گەشتوگوزارێ دیفچوون بۆ كارێن باژێرڤانییان كر كۆ د كۆمبوونا بووریدا هاتبوونە ڕاسپاردن بۆ زانینا هژمارا مەزەندەكریێن فەرمانبەر و دابینكرنا عەردی و نەخشێ عەردی و دیاریكرنا جهی و ئاریشێن تەكنیكی و یاسایی ل سنوورێ باژێرڤانییان بۆ هندێ كۆ فەرمانبەر ژ بڕیارا مەسرور بارزانی، سەرۆكوەزیرێن كوردستانێ بۆ دابەشكرنا عەردی مفادار بن.»
زەلال كر: «ساسان عەونی، وەزیرێ باژێرڤانی و گەشتوگوزارێ، داخواز كر، هەتا حەفتییا بهێت دڤێت هەمی باژێرڤانی ڕاپۆرتەكا تمام و تێروتەسەل ئامادە بكەن و تێدا هژمارا فەرمانبەر و جهێن دابینكرنا عەردی لسەر نەخشەیدا بهێتە دیاریكرن، ئاماژە ب وێ ژی كر ئەگەر عەرد ل سنوورێ ماستەر پلانێدا بەردەست نەبوو، بۆ هندێ زۆرترین هژمارا فەرمانبەران ژ وەرگرتنا عەردی مفادار بن، پێتڤیە ماستەرپلانا باژێرڤانیان بەرفرەهـ بكەن و عەردی دابین بكەن.»

کۆمێنتا تە