رێڤەبەرێ ناوچەداریا دێرەلۆكێ: هەژمارەكا پڕۆژەیێن گەشتیاری ل دێرەلۆكێ دێ هێنە بجهئینان
ئامێدیێ، مەحمود نهێلی:
رێڤەبەرێ ناوچەداریا دێرەلۆكێ دیار كر، ناوچەداریا وان ژ لایێ گەشتیاری ڤە یا گرنگە، لەو ئەو ب هەموو رەنگەكی بزاڤان دكەن پتر پڕۆژەیێن گەشتیاری بگەهنە دەڤەرێ و د بێژیت: بڕیارە ئەڤ سالە هندەك پڕۆژەیێن گەشتیاری ل دەڤەرێ بهێنە بجهئینان.
رێبەر سادق، رێڤەبەرێ ناوچەداریا دێرەلۆكێ بۆ رۆژناما ئەڤرۆ دیار كر، دەڤەرا دێرەلۆكێ دەڤەرەكا گەشتیاری یە و گەلەك جهێن گەشتیاری لێ هەنە، بارا پترێ ژی ئەو جهـ د خوەزایی نە و گۆت: «ئەم ژی ژ لایێ خوەڤە هاریكار بووینە و پشتەڤانیێ ل خودان كاران دكەین و كار ئاسانیێ بۆ دكەین بۆ هەر كارەكێ د بەڕژەوەندا گشتی دا بیت».
رێبەری خویا ژی كر، هەژمارەكا پڕۆژەیێن گەشتیاری ل سنوورێ ناوچەداریا دێرەلۆكێ دێ هێنە بجهئینان و ئێك ژ وانا یێ مەزن و گرنگە و ل بانیا چەلكێ دێ هێتە چێكرن و گۆت: «ژ بلی ڤی پڕۆژەی مە داخواز كریە، پارەكەكا گشتی ل سەنتەرێ ناوچەداریێ بهێتە چێكرن، ئەم چاڤەرێینە رازیبوون ل سەر بهێتە كرن و د دەمەكێ نێزیك دا دەست ب چێكرنا وێ بهێتە كرن».
گۆتژی: «مە داخواز كریە هەژمارەكا دی یا پڕۆژەیێن گەشتیاری ل ڤێ دەڤەرێ بهێنە بجهئینان، چونكی ئەڤ جۆرە پڕۆژەیە ژبلی ژ لایێ گەشتیاری ڤە دێ مفا ژێ هێتە وەرگرتن، دێ دەلیڤەیێن كاری ژی بۆ خەلكێ دڤەرێ، ب تایبەت ژی بۆ گەنجان دابین كەن».
