رێیا به‌دریكێ ب درێژاهیا 23 كیلۆمه‌تران دێ بیته جۆتساید
دهۆك، له‌زگین جوقی:
ئه‌ندامه‌كێ په‌له‌مانێ ئیراقێ دیار كر، رازیبوون هاتیه كرن بۆ چێكرنا ریێا به‌دریكێ، ژ به‌ركو ل سه‌ر ڤێ رێكێ گه‌له‌ك روودانێن هاتنوچوونێ روو دده‌ن وه‌لاتی دبنه قوربانی و دبێژیت: مه رازیبوون وه‌رگرتیه بۆ جۆتسایدكرنا ریێا به‌دریكێ ب درێژاهیا 23 كیلۆمه‌تران.
شه‌ریف سلێمان، ئه‌ندامێ په‌رله‌مانێ ئیراقێ بۆ رۆژناما ئه‌ڤرۆ دیار كر، رێیا به‌دریكێ هه‌ر ژ ناوچه‌داریا باعه‌درێ هه‌تا دگه‌هیته به‌دریكێ یا سه‌ر ب ئه‌لقوشڤه دێ بیته جۆتساید و گۆت: “ئه‌ڤه رێیه گرنگه و بوویه ئه‌گه‌ر گه‌له‌ك وه‌لاتی ب روودانان ل سه‌ر وێ رێیێ گیانێ خوه ژ ده‌ست بده‌ن، چونكو ترۆمبێلێن بارهه‌لگر و ته‌كسی و ترۆمبێلێن تایبه‌ت هه‌موو د ئێك سایدی دا هاتنوچوونێ دكه‌ن، له‌و گه‌له‌ك روودانێن دلته‌زین ژێ په‌یدا دبن پشتی ئه‌م بووینه نوونه‌رێن خه‌لكی ل سه‌ر لیستا پارتی دیموكراتی كوردستان، مه ده‌ست ب خزمه‌تكرنا خه‌لكێ خوه ل ده‌شتا نه‌ینه‌وا كریه و د سه‌ره‌دانه‌كێ دا بۆ وه‌زاره‌تا ئاڤه‌دانكرن و ئاكنجیبوونێ یا حوكمه‌تا ئیراقێ، ئه‌م شیاین رازیبوونێ وه‌ربگرن، كو رێیا به‌دریكێ ببیته جۆتساید”.
