زانكۆ بووینە نڤیسینگەهێن هەڤژینیێ

زانكۆ بووینە نڤیسینگەهێن هەڤژینیێ

8

هەولێر، قائید میرۆ:

راهێنەرەكا پەروەردەیی دیار كر كو زۆربەیا گەنجێن ئەڤی سەردەمی ئاریشەیا باوەری بخوە نەبوونێ هەیە و دەمێ دچنە زانكۆیێ ژی زێدەتر پێگەهێ خوە نیشا بەرامبەری خوە ددەن وەكی جلك و تڕۆمبێل و میكیاج و گۆت: ل جهێ زانست و مەعریفێ زانكۆیێن هەرێما كوردستانێ زێدەتر وەك نڤیسینگەهێن پێك ئینانا هەڤژینیێ لێهاتینە و خەلك خوە تێدا عەرز دكەت.

كوردستان رەسول، راهێنەرا پەروەردەیی بۆ رۆژناما ئەڤرۆ دیار كر، زانكۆ جهێ ب دەستڤە ئینان و زانست و مەعریفێ یە، بەلێ مخابن ل هەرێما كوردستانێ زانكۆ بوویە جهێ بۆراندنا دەمێن خوش، زۆر جاران ژی زانكۆیێن هەرێما كوردستانێ بووینە نڤیسینگەهێن پێك ئینانا هەڤژینیێ و گۆت: (پشتی گەنج ل قوناغا ئامادەیی ماندی دبیت بتایبەتی ل پۆلا 12 لەورا دەمێ‌ دچیتە زانكۆیێ قەرەبوویا نەخۆشیێن قۆناغا ئامادەیی دكەت و دەمێن خوش دەرباز دكەت، بەرۆڤاژی زانكۆ جهێ زانست و كۆیراتیا بابەتێن زانستی و مەعریفیە لدۆر بابەتێن گرنگ).
كوردستانێ‌ دیار كر ژی ژلایەكێ دیڤە زانكۆیێن مە بووینە جهێ نیشاندانا پێگەهێ كەسێن دچنە زانكۆیێ، هەر كەسەك پێگەهێ خوە نیشا بەرامبەرێ خوە ددەت و گۆت: (ب دیتنا من ئەو گەنجێن دچنە زانكۆیێ زۆر ژ وان ئاریشەیا باوەریێ هەیە و باوەری بخوە نینە، سەمیانێن قوتابیان زۆر جاران دبێژنە من كوڕێن مە یان گەنجێن مە بڤی شێوەی هاتینە پەروەردە كرن و ئاریشە نینە، بەلێ د هەمان دەمدا هەكو بەرێ خوە ددەیە كەسایەتیا ئەڤی گەنجی ئاریشەیا باوەریێ بخوە نەبونێ‌ هەیە، پڕانیا قوتابیان دەمێ دچنە زانكۆیێ زێدەتر جلكێن خوە تڕۆمبێلا خوە میكیاجێ خوە نیشا بەرامبەری خوە ددەن ژبیر كریە كو زانكۆ جهێ زانینێ یە).
كوردستان رەسول ئاماژە پێ‌ كر، سالانە قوتابی ڤەكولینا زانكۆیێ بەرهەڤ دكەن، مەرەم ژ بەرهەڤكرنا ڤەكۆلین یان بەحسێن زانكۆیێ ئەوە قوتابی ب هویری بچیتە ناڤا بابەتی و بەرهەمێ‌ چار سالێن خواندنێ دناڤا ئەڤی بەحسێ دهێتە بەرهەڤكرن دیار بكەت و گۆت: (ب دیتنا من ئەو ڤەكۆلین یان بەحسێن دهێنە بەرهەڤكرن نابێژم هەموو بەلێ رێژەیەكا زۆر ژ وان یێن راستەقینە نینن، لەوڕا ژ ی قوتابی پشتی دەربازكرنا چار سالێن قۆناغا زانكۆیێ و بدەستڤە ئینانا باوەرنامێ ژنوو هایژ خوە هەیە و دزانیت ئەو چو فێر نەبوویە و نزانیت، قوتابی و گەنج گازندەیا ل سیستەمێ خواندنا زانكۆیێ دكەن باشە هەكە ل زانكۆیێ ژی پروگرامێن خواندنێ وەك پێدڤی نەبن ل دەرڤەی زانكۆیێ قوتابی دشێت مفای ل بسپۆریا خوە وەربگریت فێری زانینێ‌ ببیت، ئەو تشتێ ل زانكۆیێ بدەست نەكەڤیت ل دەرڤەی زانكۆیێ هەیە و پێدڤیە قوتابی كار بكەن بۆ فێربوونا دەرڤەی زانكۆیێ ژی).

کۆمێنتا تە