زاڕۆكێ نازدار دبیتە خودان كەسایەتیەكا لاواز

زاڕۆكێ نازدار دبیتە خودان كەسایەتیەكا لاواز

41

بێوار باجلوری:

زاروكێن نازدار كری هزر ناكەن بتنێ نە، ژبەركو هەردەم هەست پێدكەن كو پشتەڤان یێن هەین، بەلێ ئەڤ هەستە جاران كارتێكرنێن نەرێنی ژی لدەڤ پەیدا دكەن، دەرونناسەكی ژی گوت: ئەو زاوركێ دهێتە نازدار كرن باوەری بخوبون لدەڤ نامینیت و دبیتە خودان كەسایەتیەكا لاواز.
چارەسەركارێ دەروونی عەلی عەبدلقادر، د دیدارەكێ دا بو روژناما ئەڤرۆ دیار كر كو ل وی دەمی زاروك دهێتە نازدار كرن دەمێ زاروكێ ئێكێ بیت یان ژی یێ دووماهیێ بیت، زارویێ ئێكێ جەرباندنا دایك و بابایە لەوما دێ زاروكێ خو نازدار كەن و دل نادەن چلێ بكەن و یێ دووماهیێ ژی دبێژن بچووكێ مالێ یە و گوت: (هەكە دایك و بابا زاروكەك بتنێ هەبیت یان ژی ئەو گەلەك د دلینی بن ل وی دەمی زاروكێ وان دێ گەلەك یێ نازدار بیت).
عەلی زێدەتر گوت (زاروكێ نازدار كری هەست پێ ناكەت كو یێ بتنێ یە و دبینیت كو هەردەم پشتەڤان یێن هەین، لەوما ئەڤ هەستا وی بشێوەیەكێ نەرێنی كارتێكرنێ لێ دكەت، چونكی ئەو زاروك دبیتە كەسەكێ هوسا كو بتنێ پشتبەستنێ ل سەر دەوروبەرێن خو دكەت لەوما ژی دێ كەسایەتیا خو ژدەست دەت و باوەری بخوبون لدەڤ نامینیت).
چارەسەركارێ دەروونی د بەردەوامیا ئاخفتناخودا دیار كر گەلەك ژ وان زاروكێن نازدار ژ هەڤالینیێ دترسن و نەڤێن پەیوەندیا دروست بكەن و هەتا كو نەشێن بەرپرساتیا هەڤژینیێ ژی ب هەلگرن و گوت: (دڤێت زاروك یێ جڤاكی بیت و ل گەل هندێ دایك و باب جاران بەرپرساتیان بێخنە د ستویێ ویدا داكو باوەری بخوبون لدەڤ هەبیت).
عەلی چارەسەركارێ‌ دەروونی گوتژی: (پێدڤیە دایك و باب گەلەك د هشیار بن د رەفتارو سەرەدەریێن خودا ل گەل زاروكێن خو بو نموونە، دەمێ زاروك دكەڤیت یان دەمێ دكەتە گری دڤێت گەلەك نازدار نەكەن، یان گەلەك جاران بلا دەلیڤێ بدەنێ كو ئەو بخو هندەك ئاریشێن خو چارەسەر بكەت).

 

کۆمێنتا تە