سه‌رۆكێ گشتی یێ PSK :ئێدی ل توركیا چو هێزه‌ك بێی كوردان ناهێته‌...

سه‌رۆكێ گشتی یێ PSK :ئێدی ل توركیا چو هێزه‌ك بێی كوردان ناهێته‌ سه‌ر ده‌ستهه‌لاتێ‌

4

دیدار، هۆشه‌نگ تاجر:

سه‌رۆكێ گشتی یێ پارتا سوسیالیست یا كوردستانێ ل باكور دیار دكه‌ت كو نێرینا پارتێن ئۆپۆزسیۆنا توركیا ل هه‌مبه‌ر كوردان هه‌ر وه‌كو یا ده‌ستهه‌لاتێ یه‌ و وان ژی چو به‌رنامه‌ بۆ چاره‌سه‌ركرنا پرسا كوردی نینن، لێ هه‌م پارتێن ئۆپۆزسیۆنێ و هه‌م ژی ده‌ستهه‌لات گه‌هشتینه‌ ڤێ باوه‌ریێ كو بێی ده‌نگێن كوردان ئه‌و نه‌شێن ببنه‌ ده‌ستهه‌لاتدار و ئه‌و یه‌ك ژی بۆ كوردان گه‌له‌ك گرنگه‌.

مه‌سعود ته‌ك سه‌رۆكێ گشتی یێ پارتا سوسیالیست یا كوردستانێ ل باكور د دیداره‌كا تایبه‌ت دا ل گه‌ل رۆژناما ئه‌ڤرۆ دیار كر كو هه‌لوه‌ستێ پارتێن ئۆپۆزسیۆنێ ل توركیا وه‌كو هه‌لوه‌ستێ ده‌ستهه‌لاتێ یه‌ و چو جوداهیه‌ك نینه‌، راسته‌ نها هنده‌ك گۆتنێن خوه‌ش دبێژن و به‌حسێ مافێن كوردان دكه‌ن، لێ د بنه‌مایێ خوه‌ دا وان ژی چو پرۆژه‌یه‌ك بۆ چاره‌سه‌ركرنا پرسا كوردی نینه‌ و گۆت: (ده‌مه‌كه‌ سه‌رۆكێ گشتی یێ پارتا كۆماریا گه‌ل كه‌مال كلچدار ئوغلۆ دبێژیت كو دڤێت پرسا كوردی ل په‌رله‌مانێ توركیا بهێته‌ چاره‌سه‌ركرن، ئه‌و یه‌ك تشته‌ك باشه‌ و دانپێدانه‌ ب هندێ كو ل توركیا پرسا كوردی هه‌یه‌ و هه‌تا نها ژی نه‌هاتیه‌ چاره‌سه‌ركرن، لێ دڤێت ئه‌م باش بزانین كو په‌رله‌مانێ توركیا ژی نها ب ته‌مامی كه‌فتیه‌ ژێر كۆنترۆلا ده‌ستهه‌لاتێ و نه‌شێت بێی رازیبوونا ئاكپارتیێ و پارتا بزاڤا نه‌ته‌وه‌په‌رست چو كاره‌كێ بكه‌ت، ژ به‌ر هندێ ژی تشتێ نها ل دۆر پرسا كوردی و چاره‌سه‌ركرنا وێ دهێنه‌ گۆتن گه‌له‌ك د باشن و ئاماژێن باشن كو ل توركیا ئێدی هه‌موو هێزێن سیاسی هه‌بوونا كوردان و پرسا كوردی قه‌بوول دكه‌ن).

مه‌سعود ته‌ك ئه‌و یه‌ك ژی دیار كر كو ئاخڤتنێن ڤێ دووماهیێ یێن ئه‌ردۆغانی و هه‌روه‌سا داخۆیانیێن رۆژانه‌ یێن پارتێن ئۆپۆزسیۆنێ ل دۆر مافێن كوردان ل توركیا نیشا دده‌ت كو هه‌م پارتێن ئۆپۆزسیۆنێ و هه‌م ژی ده‌ستهه‌لاتا نها یا توركیا گه‌هشتینه‌ ڤێ باوه‌ریێ كو ئێدی ل توركیا بێی كوردان چو پارته‌ك نه‌شێت ببیته‌ ده‌ستهه‌لاتدار، ئانكۆ ژ بۆ بهێنه‌ سه‌ر ده‌ستهه‌لاتێ دڤێت كورد پشته‌ڤانیێ ل وان بكه‌ن و گۆت: (ئم دشێین بێژین كو ل توركیا ئێدی ره‌وشه‌ك جوداتر ژ سالێن بۆری هاتیه‌ پێش و كورد پشته‌ڤانیێ ل كیژ پارت و ئالیێ سیاسی بكه‌ن ئه‌و دشێت ببیته‌ ده‌ستهه‌لاتدار، ژ به‌ر هندێ ژی نها ئه‌م ئه‌ردۆغان و هه‌م ژی پارتێن ئۆپۆزسیۆنێ رۆژانه‌ به‌حسێ كوردان دكه‌ن و هه‌ر ئێك دبێژیت پێدڤیه‌ كورد بگه‌هنه‌ مافێن خوه‌، ئه‌و یه‌ك ژی بۆ مه‌ كوردان ل توركیا گه‌له‌ك گرنگه‌).

سه‌رۆكێ گشتی یێ پارتا سوسیالیست یا كوردستانێ د به‌رده‌وامیا ئاخڤتنا خوه‌ دا ئه‌و یه‌ك ژی دیار كر كو ره‌وشا نها ل توركیا بێگومان گه‌له‌ك خرابه‌، توركیا تووشی قه‌یرانه‌كا گه‌له‌ك مه‌زن هاتیه‌، نه‌ ده‌ستهه‌لاتێ و نه‌ ژی پارتێن ئۆپۆزسیۆنێ چو پرۆژه‌یه‌ك بۆ چاره‌سه‌ركرنا پرسا نها ل توركیا به‌رهه‌ڤ نه‌كرینه‌، بێگومان هه‌تا نها چو پرۆژه‌یه‌ك بۆ چاره‌سه‌ركرنا پرسا كوردی ژی پێشكێشی رایا گشتی نه‌كرینه‌، ژ به‌ر هندێ ژی ره‌وشا ناڤخوه‌یی یا توركیا نها گه‌له‌ك خرابه‌ و گۆت: (گه‌له‌ك كه‌س دبێژن ره‌نگه‌ ده‌ستهه‌لاتا نها جاره‌كا دی ژ بۆ بده‌ستڤه‌ئینانا ده‌نگێن كوردان ده‌ست ب قۆناغه‌كا نوو بكه‌ت لێ هه‌تا نها ب كریاری چو نه‌هاتیه‌ كرن).

ناڤهاتی د دووماهیا ئاخڤتنا خوه‌ دا ئه‌و یه‌ك ژی دیار كر كو ئه‌م وه‌كو پارتا سوسیالیست یا كوردستانێ داخواز ژ هه‌موو هێز و ئالیێن سیاسی یێن كوردستانی ل توركیا دكه‌ین كو پێكڤه‌ كار بكه‌ین و هه‌ر هێزه‌كێ پشته‌ڤانی ل مافێن نه‌ته‌وه‌یی یێن كوردان ل توركیا كر ئه‌م دێ پشته‌ڤانیێ لێ كه‌ین، چونكو ده‌م یێ هاتی كو ئێدی كورد بشێن پتر ژ جاران كاریگه‌ریێ ل سیاسه‌تا توركیا بكه‌ن، نابیت ده‌نگێن كوردان ب هه‌روه‌ بچیت و گۆت: (بێگومان ده‌مێ ده‌ستهه‌لات و پارتێن ئۆپۆزسیۆنێ پێدڤی ب ده‌نگێن كوردانه‌ وی ده‌می دڤێت ئه‌م كورد ژی باش هزرا خوه‌ بكه‌ین و بزانین كا دێ چاوا شێین سه‌ره‌ده‌ریێ ل گه‌ل ره‌وشا نها بكه‌ین، ژ به‌ر هندێ ژی هه‌كه‌ ئه‌م وه‌كو پارت و ئالیێن سیاسی یێن كوردستانی پێكڤه‌ كار بكه‌ین و داخوازیێن مه‌ ژی د رون و ئاشكرا بن وی ده‌می ئه‌م دشێین گه‌له‌ك كارێن باش بكه‌ین و وه‌كو من گۆتی دڤێت ئه‌م پشته‌ڤانیێ ل وێ هێزێ بكه‌ین كو د به‌رنامێ خوه‌ دا تشته‌كێ بۆ كوردان بكه‌ت، هه‌ر پارته‌كا سیاسی یان ژی هه‌ڤپه‌یمانیه‌ك پشته‌ڤانیێ ل مافێن ره‌وا یێن كوردان بكه‌ت دڤێت ئه‌م ژی ده‌نگێ خوه‌ بده‌ینه‌ وان).

کۆمێنتا تە