سه‌رۆكێ یانه‌یا زاخۆ: ئینانا یاریزانان به‌رده‌وامه و پلانا مه هه‌تا راده‌یه‌كی بجهـ هاتییه
عەلی حاجی:
د داخویانیەکێ دا سەرۆکێ یانه‌یا زاخۆ یا وەرزشی بۆ رۆژناما ئەڤرۆ دیار کر راهێنەرێ تیمێ یێ گەهشتیە زاخۆ و ئه‌ڤرۆ دێ پرێسكۆنفرانسه‌ك بۆ هێته دانان و بڕیاره ل ڤێ هەیڤێ تیما وان دەست ب راهێنانێ بکەن .
زێدەتر عەمار فەرهاد گۆت: د نوکە دا مە هەڤبەستا ٢٠ یاریزانان گرێدایە کو پشکەک ژ وان هەڤبەستێن وان هاتینە نوو کرن لێ پرانیا یاریزانێن تیمێ نوو نه،مە دڤیا تیمەکا جوداتر ژ وەرزێ بوری دروست بکەین ژ بۆ هندێ ب هێزتر پشکداریێ د خولێ دا بکەین، د پلانا مە دایە ئەم هەڤبەستا دو پێشەکارێن دیتر ژی ئیمزا بکەین دا کو تیما مە چو کێماسی دناڤ دا نەمینن،هەر دیسان ئەم دێ دو هەتا سێ یاریزانێن دیتر ب رەگەز ئێراقی ژی هەڤبەستێ دگەل ئیمزا کەین ئانکو هێشتا مە دەرگەهێ ئینانا یاریزانێن نوو نەگرتیە و ئەم یێ کارێ خوە ب شێوەیەکێ رژدی دکەین، پشکداریا تیما مە د خولا پیشه‌كاران یا ئێراقێ پێدڤی ب تیمەکا ب هێزە لەوما ئەو پلانا مە دانایی بۆ وەرزێ ئەڤ سالە هەتا رادەیەکێ باش هاتیە بجهئینان، راهێنەرێ تیمێ ژی یێ گەهشتیە باژێرێ زاخۆ و بریارە ل رێکەڤتی ٢٥/٨/٢٠٢٣ـێ ئێکەم یەکەیا راهێنانێ بهێتە ئەنجام دان د بن سەرپەرشتیا راهێنەرێ مە یێ قەتەری تەلال بلوشی.
ناڤبری گۆت ژی: هەڤبەستێن وان یاریزانێن هاتینە گرێدان پێشتر ئەم دگەل رێکەڤتینە کو هەر یاریزانەکێ راهێنەرێ مە ژ ئاستێ وئ رازی نەبیت دێ هەڤبەستا وی هێتە هەلوەشاندن.
ل دوماهیێ گۆت ژی: ئیدارەیا سەربەخویا زاخۆ بەردەوام ژ روویێ ماددی و مەعنەوی ڤە پشتەڤانیا مە دکەت و ب ڕێیا ئیدارەیا سەربەخویا زاخۆ ژی مە داخاز ژ سەرۆکێ حکومەتێ کریە دا کو پشتەڤانیا ماددی ل یانا زاخۆ بکەت و ئەم ب ئومێدین کو دێ پشتەڤانیەکا باشتر ل یانا زاخۆ یا وەرزشی هێتە کرن ژبەرکو یانا زاخۆ یانەیەکا جەماوەری یە و پێدڤی ب پشتەڤانیا حکومەتا هەرێما کوردستانێ هەیە .
