سه‌میر محه‌مه‌د: دادڤانێن دهۆكێ به‌رهه‌ڤن بۆ خولا باسكێت بۆلا ئیراقێ
ئه‌ڤرۆ،
بڕیاره سوبه‌هی وه‌رزێ نوو یێ خولا پلا نایابا ئیراقێ یا باسكێت بۆلێ ب پشكداریا 13 یانا ده‌ستپێبكه‌ت و یانا زاخۆ وه‌كو نوونه‌را پارێزگه‌ها دهۆكێ و كوردستانێ پشكداربیت هه‌مبه‌ری وێ یانا دهۆك بۆ وه‌رزێ سێیێ ل دووڤ ئێك پشكدار نابیت و هه‌تا چار دادڤانێن پارێزگه‌هێ ژی مافێ هه‌یی یاریێن خولێ بڕێڤه ببه‌ن.
سه‌میر محه‌مه‌د عه‌لی سه‌رۆكێ لژنا دادڤانێن پارێزگه‌ها دهۆكێ بۆ رۆژناما ئه‌ڤرۆ گۆت: هه‌رچه‌نده ب گشتی پارێزگه‌ها دهۆكێ نێزیكی 15 دادڤانێن یاریێ هه‌نه چ یێن ل سه‌ر مێزێ یان ژی ناڤه‌راستا یاریگه‌هێ دا ژوانا خودان باوه‌رنامێن نێڤده‌وله‌تی نه، دبیت ب تنێ هه‌تا چار ژ وان دادڤانا مافێ پشكداریێ د وه‌رزێ نوو یێ خولا پلا نایابا ئیراقێ دا هه‌بیت و به‌رهه‌ڤن بۆ بڕێڤه‌برنا یاریان، نه بتنێ بۆ یاریێن زاخۆ و یانێن كه‌ركووكێ به‌لكو بۆ یاریێن ناڤه‌راست و باشۆرێ ئیراقێ ژی.
هه‌روه‌سا ناڤهاتی ئه‌وچه‌نده ژی گۆت: ژ سه‌رجه‌مێ هه‌موو دادڤانێن پارێزگه‌هێ ب خوه‌شحالی ڤه سێ دادڤان كچ ژی مه هه‌نه و هه‌بوونا كۆمه‌كا باش یا گه‌نجان ژی پێنگاڤه‌كا باشه بۆ پێشكه‌فتنا ئاستێ دادڤانان ل پارێزگه‌ها دهۆكێ ب هیڤییا وێ یه‌كێ زێده‌تر خوه ماندی بكه‌ن و ئاستێ خوه باشتر لێبكه‌ن.
بۆ زانین یانا زاخۆ دێ شه‌ش یاریان ل دووڤ ئێك دناڤ ئه‌رد و جه‌ماوه‌رێ خوه دا كه‌ت بڤی ره‌نگی، ل 25/9/ 2022 زاخۆ – جه‌ویه، دووشه‌مبیێ 26/9 زاخۆ -كه‌رخ، سێشه‌مبی 28/9 زاخۆ- كاره‌با، 29/9 زاخۆ – نه‌فت، ل 1/10 زاخۆ -نه‌فت ئه‌لشیمال،ل 2/10 زاخۆ- غاز ئه‌لشیمال.
