سیسته‌مێ به‌لاڤكرنا كاره‌بێ ل هه‌رێمێ دێ هێته گوهۆڕین
هه‌ولێر، قائید میرۆ:
به‌رپرسه‌كێ وه‌زاره‌تا كاره‌بێ ئاشكرا كر، سیسته‌مێ كارت بۆ به‌لاڤكرنا كاره‌بێ كه‌فتیه كاری و هه‌كه گه‌هشتینه رێككه‌فتنێ ل گه‌ل كۆمپانیا تایبه‌تمه‌ند ئه‌ڤه ل سه‌رانسه‌ری هه‌رێما كوردستانێ سیسته‌مێ كارت دێ هێته بجهئینان.
كامل قه‌زاز، بریكارێ وه‌زاره‌تا كاره‌بێ بۆ رۆژناما ئه‌ڤرۆ دیار كر، د ده‌مێ نوكه دا سیسته‌مێ به‌لاڤكرنا كاره‌بێ ب شێوه‌یێ پریپه‌ید كه‌فتیه د بیاڤێ بجهئینانێ دا و گۆت: “ل هه‌ولێر و دهۆكێ وه‌كو تێست كار ل سه‌ر دهێته كرن، سیسته‌مێ پریپه‌ید، ئانكو سیسته‌مێ كارت نوكه د قۆناغا تاقیكرنێ دایه و هه‌كه ئه‌م ل گه‌ل كۆمپانیێ گه‌هشتینه رێككه‌فتنێ و رازیبوونا سه‌رۆكایه‌تیا جڤاتا وه‌زیران هاته وه‌رگرتن ئه‌ڤه ل سه‌رانسه‌ری هه‌رێما كوردستانێ ئه‌و سیسته‌مه دێ هێته بجهئینان و ئیدی كاره‌ب ب كارت دێ هێته به‌لاڤكرن”.
كامل قه‌زاز گۆتژی: “سیسته‌مێ كارت سیسته‌مه‌كێ سه‌ركه‌فتیه و ئه‌ڤان جهێن كار پێ هاتیه كرن و كاره‌بێ ب كارت دكڕن گه‌له‌ك د رازینه، چونكی بۆ وه‌لاتیان و حوكمه‌تێ ژی باشتره، ل گوره‌ی ئاخڤتنا كه‌سێن ب سیسته‌مێ نوو كاره‌ب بۆ هاتیه دابینكرن ده‌ركه‌فتیه سیسته‌مه‌كێ سه‌ركه‌فتیه و پاره ژی كێمتر ل سه‌ر وه‌لاتیان دكه‌ڤیت، ئانكو بهایێ كاره‌بێ كێمتره و ل دووڤ پێدڤیاتیێ كاره‌ب دهێته مه‌زاختن، ئه‌ڤه ژ بلی مفای ئه‌ڤی سیسته‌می مه‌زاختی ل سه‌ر حوكمه‌تێ كێم كرینه و داهات ژی زێده‌كریه”.
