سیستەمێ‌ ڤارێ‌ د ناڤبەرا بجهئینانا یاسایێ‌ و بڕیارێن دادڤانی دا

سیستەمێ‌ ڤارێ‌ د ناڤبەرا بجهئینانا یاسایێ‌ و بڕیارێن دادڤانی دا

48

ب هاتنا سیستەمێ‌ ڤار یێ‌ جیهانی ئەوێ‌ تایبەت ب دۆبارەكرنا هەر حالەتەكێ‌ گۆمان لێكری د دەمێ‌ ئەنجامدانا یاریێ‌ ب خوەلێدانا یاریزانی بۆ یاریزانێ‌ هەڤڕك ژبو دیاركرنا ئەوی حالەتی جادەیا وەرزشی و هەموو یانەیێن پشكدار د خولا ئیراقێ‌ دا پێ‌ كەیفخوەش بووینە ب بوهانا وێ‌ یەكێ‌ ئێدی چو یانە یان یاریزان زەرەمەند نەبن پشتی سیستەمێ‌ ڤارێ‌ دۆبارە خەلەتیێ‌ بۆ دادڤانێ‌ ئاشكەرا دكەت، لێ‌ ئەڤچەندە بەرۆڤاژی پێشبینیان دەركەڤتیە و هەتا نوكە گازندە و نەرازیبوون ژ چەند یانەیێن ئیراقێ‌ ب گشتی و یێن كوردستانێ‌ ب تایبەت سەرهلداینە، رۆژنامەیا ئەڤرۆ د دووڤچوونەكێ‌ دا دگەل شارەزا و شرۆڤەكارێن وەرزشی بووچوونێن وان وەرگرتینە و بڤی رەنگی دیاركرینە.
ل دەستپێكێ‌ وەحید رەشید شرۆڤەكارێ‌ وەرزشی ل پارێزگەها دهۆكێ‌ گۆت: سیستەمێ‌ ڤارێ‌ ئانكو دۆبارەكرنا هەر خەلەتیەكا گۆمان لێكری لەوما دڤێت یاریزان ژی هشیاری ڤارێ‌ بیت تایبەت دەمێ‌ یاریزانێ‌ تیما بەرانبەر نێزیكی هێلا پەنەلتیێ‌ دبیت، ژبەر كو هەر لڤینەكا كێم ژی یا خەلەت ب دەستی یان پالدان یان رێگرتنەكا نە ئاسایی یا بچووك ژی بیت دێ‌ ڤار دیاركەت و ئەڤچەندە بیتە ئەگەڕێ‌ پەنەلتیێ‌ و دبیت كارتا زەر یان سۆر بهێتە دان، لەوما دڤێت كادرێ‌ راهێنانێ‌ بەردەوام یاریزانی هۆشداربكەت و خوە رەوشەنبیربكەت ب بابەتێ‌ ڤارێ‌، راستە دێ‌ خەلەتی هەبن، لێ‌ نە ئەو خەلەتیێن كۆژەك كو بیتە ئەگەر ئاست و ئەنجام 180یلەیان دهێتە گوهۆڕین، خالا دی یا گرنگ ژی دڤێت بهێتە دیاركرن دادڤان زێدەتر تووشی خەلەتیێن ڤارێ‌ بووینە و گازندە بڤی شێوەیێ هوسا مەزن بووینە بەرۆڤاژی وەرزێ‌ سالێن بۆری، زێدەباری ئەو دەمێ‌ درێژ ب دووڤچوونا خەلەتیەكا دناڤ یاریگەهێ‌ دا دهێتە كرن ئانكو دادڤان بۆ ماوەكی درێژ سەحدكەتە ڤارێ‌ ژبۆ دانا بڕیارا درۆست ل دووماهیێ‌ ژی گەلەك جاران بڕیارێن نە دروست هاتینەدان نموونە ژی یاریا دهۆك دگەل تەلەبە و دگەل زەورا كو نە ب وی شێوەیی بوویە ئەو خەلەتییا پەیدابوویی بكەتە پەنەلتی و شیا بهێلیت، هەروەسان ئەوێن ڤارێ‌ بڕێڤە دبەن كێم شارەزاهییا هەیی لەوما دێ‌ بێژم ل شوونا ببیتە هاریكار بۆ دادڤانی و ئاریشەیا چارەسەر بكەت بەرۆڤاژی زێدەتر لێكرینە و گەلەك یانە گازندێ‌ ژێ‌ دكەن، لێ‌ دڤێت یاریزان ئاگەهـ ژ خوە هەبیت ژبەركو دادڤانەكێ‌ ل سەر ئامیرێ‌ ڤارێ‌ چركە چرك دووڤچوونا لڤینێن یاریزانان دكەت ژبۆ دیاركرنا خەلەتییان، ب هیڤینە یاریزانێ‌ د دەڤەرا پەنەلتیێ‌ هوشداریێ‌ دا بیت نە هێلیت یاریزانێ‌ هەڤڕك دەلیڤەكا چێكرنا پەنەلتیەكێ‌ یا فاولەكێ‌ بخوە پەیدابكەت.
ژلایێ‌ خوەڤە عەبدوللا عابد شارەزا و سەرۆكێ‌ لژنەیا دادڤانان ل پارێزگەها دهۆكێ‌ گۆت: ئینانا سیستەمێ‌ ڤارێ‌ بۆ خولا ئیراقێ‌ پێنگاڤەكا باشە و زێدەتر دێ‌ هاریكارییا دادڤانان كەت، پێنەڤێت دەستپێكە و دێ‌ خەلەتی هەر هەبن لێ‌ ئەوێن ل سەر ڤارێ‌ كار دكەن نە گەهشتینە وێ‌ رادەیی كو ب دروستی بشێن شرۆڤەكرنا كەیسا خەلەتیەكا یاریزانی د فاولەكێ‌ یا پەنەلتیەكێ‌ دا بكەن و ئەڤچەندە دیاربوویە پشتی بۆرینا چەند یارییان د خولێ‌ دا كو یانە هەبووینە مفادار و هەنە ژی زیانكەفتینە ب ئەنجامی، دیسان جەماوەرێ‌ یانەیێ‌ ژی كارتیكرنێ‌ ل سەر دادڤانی دكەن بۆ سەحكرنا ڤارێ‌ و بڕیارەكا دبیت یا بلەز بدەت، هەروەسان یاری هەنە كو ئەڤچەندە روودایە و بەلگەنە كو دادڤانێ‌ یاریێ‌ بێ‌ بەر ب ڤارێ‌ بچیت پشتبەستنێ‌ ل سەر شیانێن خوە بكەت و نە كەتە فاول یان پەنەلتیێ‌ یان هەتە دانا كارەتێ‌، پرانییا دادڤانێن ئیراقێ‌ ب شێوەكێ‌ نازكتر ب هویربینی و بۆ هەر لێدانەكا یاریزانی ڤەدگەڕێتە ڤارێ‌ و گەنگەشێ‌ دگەل دادڤانێ‌ ڤارێ‌ دكەت هەتا بگەهیتە بڕیارەكێ‌ و ئەڤەژی گەلەك جاران شاشیا پەیدا دكەت، دبیت ئەڤە سالا ئێكێ‌ یە و بۆ وەرزێن بهێت باشتر بیت، ژبەر كو سیستەمێ‌ ڤارێ‌ پێنگاڤەكا سەركەفتی یە بۆ پێشكەفتنا وەرزشا تەپا پێی و چاڤێ‌ رۆبۆتە یێ‌ دۆبارە دیتنا هەر حالەتەكێ‌ د ناڤ یاریگەهێ‌ دا و هاریكارییا دادڤانی دكەت.

کۆمێنتا تە