سێ هزار دۆنەمێن گوندێ بریفكا هاتنە سۆتن
سندس سالح:
ل دەڤەرا بەرواری بالا ئاگرێ شەڕی زیانەكا مەزن گەهاندینە بەرهەمێن جۆتیاران و ب تنێ ل گوندێ بریفكا پتری سێ هزار دونەمێن ئەردی هاتینە سۆتن و جوتیارێن دەڤەرێ داخوزا قەربووكرنێ و پاراستنا دەرامەتێ خوە دكەن. مۆختارێ گوندی ژی داخواز دكەت لژنەیەك سەرەدانا وان دەڤەرا بكەت دا ژنێزیك زیانێن ب جۆتیارێن دەڤەرێ كەفتین ببینن و چارەیەك بۆ وێ چەندێ بهێتە دیتن.
ئەنوەر جۆتیارەكێ گوندێ (بریفكانە) دبێژیت: ژ ئەنجامێن شەڕێ توركیا و پەكەكێ گەلەك زیان گەهشتیە بەرهەمێن جۆتیارارێن مە و یێن من ب خوە نێزیكی هزار دارێن باهیڤان و پتری سەد دارێن تری و چەندین بەرهەمێن دی نە، هەموو هاتنە سوتن و چو بۆ نەمان، لەورا داخوازا مە ژ حكومەتێ ئەوە ئەم بهێینە قەرەبووكرن.
جۆتیارەكێ دی ژ گوندێ ئەلكیشكێ دبێژیت: ئەڤە ب سەرێ رەز و بیستانێن مە هاتی كارەسات بوو، چونكو ب هزاران دونەمێن ئەردی یێن چاندنی هاتنە سوتن و زەحمەتا مە یا پازدە سالان و پتر هەموو ب ئاڤێ دا چوو، چ تشت بۆ مە نەمان.
مۆختارێ گوندی ژی گۆت: ئەڤە ب سەرێ مە هاتی گەلەكا مەزن بوو، چ بەرهەم بۆمە و هەكە حكومەت چارەیەكێ ل مە نەكەت دێ گوندێن خوە چول كەین و دەست ژ چاندنێ بەردەین، لەورا ئەم دخوازین لژنەیەك بهێت و زیانێن ب مە كەفتین بهێنە قەرەبووكرن.
