سەركەفت محەمەد: هنگاڤتن بوو ئەگەر ژ دادڤانیێ بەر ب سەرپەرشتییا یارییان بچم
د دیدارەكێ دا دادڤانێ بەرێ یێ بەرنیاس ل پارێزگەها دهۆكێ و باژێرێ سێمێلێ دیار كر ژ نەچاری كارێ خوە یێ دادڤانییا یاریێن تەپا پێی بەردایە و بەر ب كارێ ب رێڤەبرنا سەرپەرشتییا یاریێن خولا كوردستانێ چوویە و ئێدی دێ هیڤی و ئۆمێدێن خوە ب شێوەكێ دی د ناڤ وەرزشێ دا ئاڤاكەت.
زێدەتر سەركەفت محەمەد بێسكی بۆ رۆژنامەیا ئەڤرۆ گۆت: هەرچەندە وەكو دەستپێكا من د كارێ دادڤانیێ دا ل سالا 2010 ـێ بوو و پشتی بۆرینا دو سالا ب فەرمی وەكو دادڤان د خولا كوردستانێ دا هاتبوومە پەسەندكرن و ژبەر حەز و ڤیانا من بۆ ڤی كاری و و ەرزشێ ب گشتی من دەست ب پلان و ئارمانجان كر پێخەمەت ئاست و شیانێن خوە پێشبێخم و بشێم خزمەتا وەلاتێ خوە بكەم بڕێیا وەرزشێ و دووڤدا ئۆمێد هەبوون د خولا ئیراقێ ژی دا پشكداربم و شیام د ماوەیێ بۆری دا زێدەتری 60 یارییان ب رێڤەببەم و بوومە جهێ باوەریێ لێ مخابن هنگاڤتنا ژ نشكەكێ ڤە یا چۆكێ من بەری سێ سالان هیڤی و ئۆمێدێن من بەرۆڤاژی لێكرن، سەرباری بزاڤێن من كو بشێوەكێ باش ڤەگەڕێم و بەرنامەیێ چارەسەریێ دانابوو لێ هەمی بێ مفا بوون.
هەروەسان ناڤهاتی گۆت: ئەڤ هنگاڤتنە دڕبەك ل ئەوان هیڤیێن من دان كو ببمە دادڤانەكێ خودان شیان و ل سەر ئاستێ ئیراقێ و دەرڤە ژی بكەم و نەچاركرم ب ئێكچاری دەست ژ دادڤانیێ بەردەم، لێ ژبەركو ئەز حەز ژێكەرێ وەرزشێ مە ب شێوەكێ ڤەگەڕییام و هیڤیێن من ژ دادڤانیێ بۆ سەرپەرشتییا یارییان هاتە گوهارتن و د ماوەیێ وەرزێ ئەڤ سالە دا وەكو دەستپێكێ د خولا تازەپێگەهشتی و لاوان زێدەتری شەش یارییان من بڕێڤەبرینە و ئۆمێدا خوە د خولا ئیراقێ ژی دا وەكو سەرپەرشتییار بەردەوامیێ بدەم و رژدم خزمەتا وەرزشا كوردستانێ و پارێزگەها خوە بكەم.
سەركەفت محەمەد بێسكی دیاركر ب شێوەكێ گشتی ئاستێ دادڤانێن پارێزگەهێ خراب نینە لێ پێدڤییی زێدەتر كار ل سەر وان بهێتە كرن و ئەوژی خوە ماندیبكەن تایبەت لایەنێ راهێنانان و خواندنا یاسایا تەپا پێی و رەهوانكرنا زمانێ بیانی یێ عەرەبی و ئنگلێزی و پێدڤییە فیدراسیۆنا تەپا پێی یا پارێزگەهێ ژی هاریكاربیت یا ماددی و مەعنوی و گۆت: هیڤییا من ژی ئەوە نێزكترین دەم ببمە سەرپەرشتییار د خولا ئیراقێ یا پیشەكاران و بەر ب یا ئاسیا ژی بچم و ببمە بچووكترین سەرپەرشتیار، لێ ئەڤچەندە پێدڤی ب پشتەڤانییا هەمی لایانڤە هەیە تایبەت نوونەراتییا دهۆك یا لژنەیا ئۆلمپی و فیدراسیۆنا تەپا پێی یا دهۆكێ یە.