سەرژمێریا گشتی دێ هێتە كرن و ژمارە بۆ ئاڤاهیان هێنە دانان
هەولێر، قائید میرۆ
ئەندامەكێ لیژنا بلندا سەرژمێریا گشتی ل ئیراقێ ئاماژەكر، بڕیارە ل دووماهیا ئەڤ سالە پرۆسا سەرژمێریا گشتیا ئاكنجیێن ئیراقێ بڕێڤەبچیت و هەیڤا ئەیارا داهاتی ژی وەكی تێست دێ سەرژمێریا گشتی ل هژمارەك دەڤەرێن ئیراق و هەرێما كوردستانێ بهێتە ئەنجامدان هەروەسا دبێژیت: سەرژمێریا گشتی دێ ب سیستەمێ ئەلكترۆنی بڕێڤەبچیت و د دەمێ سێ هەیڤان دا ژی دێ ئەنجام هێنە راگەهاندن.
مەحموود عوسمان، ئەندامێ لیژنا بلندا سەرژمێریا گشتی ل ئیراقێ بۆ رۆژناما ئەڤرۆ دیاركر» بڕیار ل سەر ئەنجامدانا سەرژمێریا گشتی هاتیەدان و بڕیارە ل دووماهیا ئەڤ سالە پرۆسا سەرژمێریا گشتیا ئاكنجیان ل ئیراق و هەرێما كوردستانێ بهێتە ئەنجامدان، هەر چەندە سالێن بۆری زۆر جارا هاتیە پاشخستن، بەلێ ڤێ جارێ ئیراق یا رژدە لسەر ئەنجامدانا ڤێ پرۆسا ل هەیڤا 11 دووماهیا ئەڤ سالە.
زێدەتر گۆت: بەری سەرژمێری بهێتە رێڤەبرن هەیڤا ئەیارا داهاتی دێ سەرژمێری وەكی تێست ل هژمارەك دەڤەرێن ئیراق و هەرێمێ بهێتە ئەنجامدان، ئەگەر ئاریشەیەك ژی هەبیت بۆ سەرژمێریا گشتی ئەڤە دێ ل هەیڤا ئەیارێ دەركەڤیت و بۆ هەیڤا یازدە دێ ئەو ئاریشە هێنە چارەسەركرن.
ناڤهاتی خویاژی كر، حوكمەتا ئیراقێ گرێبەست دگەل كۆمپانیەكا ناڤودەنگا چینی ئیمزاكریە بۆ بڕێڤەبرنا پرۆسا سەرژمێریا گشتی و ڤێ كۆمپانیێ شارەزایەكا تەمام هەیە د بیاڤێ سەرژمێریا گشتی و بۆ جارا ئێكێ یە ژی دێ پرۆسا سەرژمێریێ ب شێوەیەكێ ئەلكترۆنی بڕێڤەچیت، هەموو خالێن دەستپێكی بەرچاف هاتینە وەرگرتن بۆ ئەنجامدانا سەرژمێریا گشتی و هەموو خانی و ئاڤاهی و جهێن ئاكنجیبوونێ دێ هژمارەك سەر هێتە دانان هەتا بزانین چەند ئاڤاهی ل ئیراقێ و هەرێما كوردستانێ هەنە و چەند كەس تێدا ئاكنجینە، هەروەسا د دەمێ بڕێڤەچوونا سەرژمێریا گشتی رەوشا جڤاكی و ئابووری و هەموو لایەنێن ژیانێ تێدا بەرچاف بهێنە وەرگرتن، سەرژمێریا ئەڤ سالە دێ زۆر گرنگ بیت بۆ ئیراقێ و ب تایبەتی بۆ هەرێما كوردستانێ، چونكە دێ ب سیستەمێ ئەلكترۆنی بیت و ئەنجامێن دەستپێكی چەند دەمژمێرەكا پشتی پرۆسا سەرژمێریێ دێ هێنە راگەهاندن و پشتی سێ هەیڤا دێ ئەنجامێن دووماهیێ هێنە ئاشكراكرن، چونكە ل دەستپێكا دامەزراندنا دەولەتا ئیراقێ هەتا نوكە دەمێ سەرژمێری دهاتن ئەنجامدان پشتی چوار سالان ئەنجام دهاتن راگەهاندن.
مەحموود عوسمان گۆت ژی «هەرێما كوردستانێ رازیبوونا خوە دیاركریە بۆ ڤێ چەندێ یا هاریكاربیت بۆ ئەنجامدانا سەرژمێریا گشتی و ئەم هاتینە ئاگەهداركرن بەردەوام كار بكەین بۆ بەرهەڤیێن پرۆسا سەرژمێریا گشتی، چونكە هەرێما كوردستانێ سالێن بۆری ژی پێداگیری ل سەر ئەنجامدانا ڤێ پرۆسێ دكر و زۆر ئاریشە دێ پشتی سەرژمێریا گشتی بهێنە ئێكلاكرن، مە ئاریشە ل دەڤەرێن كوردستانی یێن دەرڤەی ئیدارەیا حوكمەتا هەرێما كوردستانێ هەنە بۆ ڤێ مەرەمێ لیژنەیەكا بلند هاتیە پێك ئینان ب سەرۆكایەتیا وەزیرێ پلاندانانێ ئەو لیژنە دێ دانوستانان دگەل حوكمەتا ئیراقێ بكەت و ئەو ئاستەنگێن هەی ل دەڤەرێن كوردستانی بهێنە چارەسەركرن و ئێكلاكرن.
ئەندامێ لیژنا بلندا سەرژمێریا گشتی ل ئیراقێ دیار كر ژی، پرسێن ئیداری دێ ژلایێ دەستەیا ئامارا هەرێمێ دگەل بەغدا هێنە ئێكلاكرن، بەلێ پرسێن سیاسی دێ شاندێ هەرێمێ ئێكلا كەت.
