سەرکەفتنا هێزێن توندرەو دێ بیتە ئەگەرێ دەستپێکرنا قۆناغەکا نوو ل ئۆرۆپا

سەرکەفتنا هێزێن توندرەو دێ بیتە ئەگەرێ دەستپێکرنا قۆناغەکا نوو ل ئۆرۆپا

7

د هەلبژارتنێن پەرلەمانێ ئێکەتیا ئۆرۆپا دا هێزێن راستگر و توندرەو شیان سەرکەفتنەکا مەزن بدەستڤە بینن و هەتا نها شیاینە پتر ژ ٣١٢ کورسیان مسۆگەر بکەن، چاڤدێرێن سیاسی ژی دیار دکەن ئەو یەک دێ بیتە ئەگەرێ مەترسیەکا مەزن ل سەر دیموکراسیا ئۆرۆپا و چەند ئەگەران ژی دیار دکەن.

د هەلبژارتنێن پەرلەمانێ ئێکەتیا ئۆرۆپا دا ل پرانیا وەلاتێن ئێکەتیا ئۆرۆپا هێزێن راستگر و توندرەو شیاینە سەرکەفتنەکا مەزن بدەستڤە بینن و ل فرەنسا سەرۆکێ وی وەلاتی پەرلەمان هلوەشاند و داخوازا هەلبژارتنێن پێشوەخت کر و ل بەلجیکا ژی سەرۆک وەزیرێن وی وەلاتی پشتی راگەهاندنا ئەنجامێن دەستپێکی دەست ژ کارێ خوە بەردا و ل گەلەک وەلاتێن دی ژی سەرکەفتنا هێزێن توندرەو بوویە جهێ گۆمانێ.
چاڤدێرێن سیاسی وەسا دبینن، ژ بەر شەرێ نها د ناڤبەرا رۆسیا و ئۆکرانیایێ دا، هەروەسا ژ بەر هاتنا کۆچبەران بۆ ئۆرۆپا و قەیرانا ئابووری هزرا توندرەویێ ل ئۆرۆپا زێدە بوویە و د چەند سالێن دووماهیێ دا ل گەلەک وەلاتێن ئێکەتیا ئۆرۆپا ژی پارتێن توندرەو شیان پێگەهێ خوە بهێز بکەن و نها ژی ئەنجامێ هەلبژارتنێن پەرلەمانێ ئێکەتیا ئۆرۆپا نیشا ددەت، کو ئێدی ئۆرۆپا جاران نەما و قۆناغەکا نوو ل هەموو ئۆرۆپا دەستپێ دکەت.
ل گۆر باوەریا چاڤدێرێن سیاسی، سەرکەفتنا پارتێن توندرەو دێ بیتە مەترسیەکا مەزن ل سەر دیموکراسیێ و مافێن مرۆڤی، ئەو یەک دێ کاریگەریا خوە ل ژیانا وەلاتیان ژی کەت، ب تایبەتی ژی دێ مەترسی ل سەر خەلکێ بیانی ل ئۆرۆپا دروست بیت، چونکی ئێدی خەلکێ ئۆرۆپا ژی ناخوازن پەنابەر و کۆچبەر بچنە وەلاتێن وان، ژ بەر ڤێ یەکێ ژی دبیت د چەند سالێن بهێت دا گوهۆڕینێن گەلەک مەزن و بنگەهین ل هەموو ئۆرۆپا دروست ببن.
چاڤدێرێن سیاسی ئاماژە ب هندێ ژی دکەن، شەرێ نها د ناڤبەرا رۆسیا و ئۆکرانیایێ دا کاریگەریا خوە ل هەموو ئۆرۆپا کریە، چونکی خەلکێ ئۆرۆپا وەسا دبینن رۆسیا دڤێت پشتی ئۆکرانیایێ ئێرشی هندەک وەلاتێن ئێکەتیا ئۆرۆپا بکەت و دەمەکە بەرپرسێن ئێکەتیا ئۆرۆپا ژی بەحسێ ئامادەکاریان بۆ شەڕی دکەن، ئەو یەک کاریگەریا خوە ل هەستێ هێزێن توندرەو و نەتەوەیی ل ئۆرۆپا کریە، ژ بەر ڤێ یەکێ ژی پارتێن توندرەو شیان د چەند سالێن دووماهیێ دا پێگەهێ خوە بهێز بکەن.
بەری نها سەرۆکێ فرەنسا ژی دیار کربوو سەرکەفتنا هێزێن توندرەو دێ مەترسیەکا خوە یا مەزن بۆ پاشەرۆژا هەموو ئۆرۆپا هەبیت، ژ بەر ڤێ یەکێ ژی پشتی راگەهاندنا ئەنجامێن دەستپێکی، ماکرۆنی پەرلەمانێ فرەنسا هەلوەشاند و داخوازا هەلبژارتنێن پێشوەخت ل فرەنسا کر.
دەزگەهێن راگەهاندنا ئەمریکا و ئۆرۆپا ژی دیار دکەن، ئەنجامێن هەلبژارتنان نیشا ددەن کو خەلکێ ئۆرۆپا خوە بۆ قۆناغەکا نوو و دژوار بەرهەڤ دکەت.
هەژی ئاماژەپێدانێ یە کو د هەلبژارتنێن پەرلەمانێ ئێکەتیا ئۆرۆپا دا دو ژنێن کوردی ژی شیان سەرکەڤن و ببنە ئەندامێن پەرلەمانێن ئۆرۆپا.

کۆمێنتا تە