سەیێن بەردای بووینە مەترسی ل سەر ژیانا وەلاتیێن دێرەلۆكێ

سەیێن بەردای بووینە مەترسی ل سەر ژیانا وەلاتیێن دێرەلۆكێ

3

ئامێدیێ‌، مەحمود نهێلی:

د دەمێ‌ چەند رۆژێن دەربازبوویی دا سەیێن بەردای هێرشی هەشت وەلاتیان ل سنوورێ ناوچەداریا دێرەلۆكێ‌ كرینە و بریندار كرینە، كو دو ژ وانا ب سەرۆچاڤان بریندار بووینە.
مەسعود بۆتی، هاریكارێ رێڤەبەرێ ساخلەمیا دەڤەرداریا ئامێدیێ بۆ رۆژناما ئەڤرۆ دیار كر، بەری دو رۆژان سێ وەلاتی، كو ئاكنجیێن سەنتەرێ ناوچەداریا دێرەلۆكێ‌ بووینە، ژ ئەگەرێ‌ هرشا سەیێن بەردای بۆ سەر و لەقدانا وان بریندار ببوون بۆ نەخۆشخانا ئامێدیێ هاتنە هنارتن و گۆت: «رەوشا وان یا باش بوویە و برینێن وان د سڤك بوون و پشتی چارەسەریێن دەسپێكی بۆ مالێن وان هاتنە هنارتن».
ناڤهاتی دیار ژی كر، بەری نوكە ژی د چەند روودانێن جودا دا پێنج وەلاتیێن دی یێن سنوورێ ناوچەداریا دێرەلۆكێ‌ تووشی هێرشا سەیێن بەردای ببوون و د ئەنجامێ دا بریندار ببوون و دو ژ وانا ب سەرۆچاڤان بریندار ببوون و پێدڤی ب نشتەرگەریێن جوانكاریێ بوون.
وەلاتیەكێ ئاكنجیێ‌ دێرەلۆكێ بناڤێ دلگەش بۆ رۆژناما ئەڤرۆ دیار كر، كورێ وی بەری دو رۆژان ل بەردەرگەهێ خانی بوو و سەیەكێ بەردای هێرشی وی كر و گۆت: «جیرانەكێ مە بزاڤ كرن ژێڤەكەت، ئەو ژی ب گرانی بریندار كریە و گۆت: «ئەم داخوازێ‌ ژ جهێن پەیوەندیدار دكەین، چارەسەریەكێ‌ بۆ ڤان سەیێن بەردای ببینن و ژناڤ كۆمەلگەهێ بهێنە دەرئێخستن، بەری كارەساتەكا مەزنتر ب سەرێ‌ وەلاتیان دا بینن».

کۆمێنتا تە