شۆره‌شا گولانێ په‌یاما خه‌باتێ و ئازادیێ و سه‌رهلدانێ

شۆره‌شا گولانێ په‌یاما خه‌باتێ و ئازادیێ و سه‌رهلدانێ

0

عزه‌ت یوسف
ئه‌گه‌ر به‌رپابوونا هه‌ر شۆرشه‌كێ پێدڤیا خوه‌ یا دیرۆكى و هۆكارێن خوه‌ یێن ره‌سه‌نێن بابه‌تى هه‌بوو بن، شۆرشا گۆلانێ هێشتا وێڤه‌تربوو، ئه‌و ژ كێلبێن ژه‌هراوییا رێكه‌فتنه‌كا نه‌چاڤه‌ڕێیا خیانه‌تكاریا كومباخا جه‌زائیر ڤه‌په‌شى و به‌رده‌وامى و درێژه‌ پێدانا شۆرشا ئیلۆنا مه‌زن ب هزر و ئالاڤ و شێوازه‌كێ نوى بوو. شۆرشا ئیلۆنێ به‌رسڤدانا پیلانا جه‌زائیر و زولم و زۆریا دوژمنان بوو.
ل ده‌مه‌كى رژێما به‌غدا یا داگیركه‌را ئه‌وى ده‌مى، ب دڕ و هارى دخواست كورد بنده‌ست بژین تا ئه‌به‌د، د وێ هزرێ دابوو كو تشته‌ك ب ناڤێ شۆرشا كوردى و ب ناڤێ كوردستان نه‌ما، كوردستان تێكدا هه‌مى گر و مل و چیا و ده‌شت كرنه‌ خال و روانگه‌ و كه‌مپێن له‌شكرى، ب هه‌مى داموده‌زگه‌هێن خوه‌ یێن ئه‌منى و سه‌ربازى ڤه‌؛ سیخۆرى كه‌ته‌ گیانێ ملله‌تى و وه‌لاتى، ئه‌ها د وى ده‌مى دا ئیراده‌یا كوردان د شۆرشا گولانێ دا ب رژدى و موكومى سه‌رهلدا و ئومێدى و مزگینى به‌خشه‌ك بۆ خه‌باته‌كا نوى هه‌لات.
ده‌مێ چریسكا ئاگرێ شۆرشا گولانێ گه‌شتر و به‌رفره‌هتر دبوو، رژێما داگیركه‌را به‌عس سازى و ده‌زگه‌هێن خوه‌ یێن كوشتنێ و گرتنێ و تڕساندنێ پتر ئێخستنه‌ گه‌ڕ، رابوو ب خاپوركرنا گۆندێن ڤه‌ده‌ر و ڤه‌گوهاستنا خه‌لكى بۆ باشورێ ئیراقێ یان كۆمه‌لگه‌هێن كوته‌كى، گرتنا خه‌لكێ ئازا و شۆرشگێر ژ ته‌ڤایا ته‌خێن ملله‌تى و سێداره‌دانا وان ل قولاچكێن كویر و تاڕستانا زیندانێن مویسل و ئه‌بۆ غرێب. لێ ئه‌ڤان ره‌فتاران ته‌مه‌ت گاڤا مێریه‌كێ ژى ئیراده‌یا گه‌لى كورد نه‌شكاند و سست و خاڤ نه‌كر، لێ به‌روڤاژى شۆرش گه‌رمتر و ب هێزتر و دژواتر لێ دهات.
به‌لێ شۆرش ئاگره‌ك بوو ب سه‌ر ده‌ژمنى دا دبارى، ئاگرێ رزگاریێ و ئازادیێ بوو ل كوردستانێ دبارى، ده‌ڕبرینه‌كا راست و ره‌وا بوو ژ خواستا خه‌لكێ چاڤنه‌تڕس ژ بۆ نه‌هێلانا بنده‌ستیێ. شۆرش كه‌ته‌ دهه‌مى ماڵ و گوند و باژێر و واران دا، شۆرش رۆژ بۆ رۆژێ ساڵ بۆ سالێ گه‌رمتر و دژوارتر دبوو. شیا دربێن مه‌زن داوه‌شینته‌ له‌شكر و داروده‌سته‌كێن دوژمنى و ب خوینا شه‌هیدان داستان ل دویڤ داستانێ هاتنه‌ تۆمار كرن ده‌ڤه‌رێن به‌رفره‌ه هاتنه‌ ئازاد كرن.
شۆرشا ئیلۆنێ ل شه‌شێ ئادارا 1975 ب پیلانه‌كانى ژه‌هراوى هاته‌ بێده‌نگ كرن، لێ شۆرشا گولانێ جاره‌كا دى خه‌بات گه‌رم كر و پاش بۆرینا 16 سالان د هه‌مان رۆژدا سه‌رهلدانێ ده‌ستپێكر و باژێر ل دویڤ باژێرى هاتنه‌ ئازادكرن و كه‌لایێن دوژمنان هاتنه‌ رامالێن و هه‌ڕفتن و ئیراده‌یا گه‌لێ كوردستانێ سه‌ركه‌فت و هه‌رێما كوردستان بوو ده‌وله‌ته‌كا دیفاكتۆ و سه‌روه‌رى.
ئه‌ڤرۆ بلا هه‌مى بزانن، حه‌ز و نه‌حه‌ز، خه‌باتا كوردان ژ بۆ مافێن وان یێن ره‌وا پاش دا ناچیت، بنده‌ستیێ و پیلانێن وان ناحه‌وینن، ئه‌و ئاخا ب خوینا شه‌هیدان هاتیه‌ ئاڤدان و به‌ردار بووى قه‌ت نه‌بوویه‌ و نابیت تۆڤێ دوژمنان قه‌بویل بكه‌ت و دوژمن لێ بچه‌ورن.
شۆرشا گولانێ، سه‌رده‌مه‌ك بوو، كوردایه‌تى كوردایه‌تى بوو، ژ كوردایه‌تیا گولانێ گول دبارین، خه‌بات و تێكۆشین و ئازادى و ئازایه‌تى دبارى. كوردایه‌تى ژ دۆبا هنگڤینى شرینتر بوو، ژ پرۆزییان پیرۆزتر بوو. چاخه‌ك بوو بهیستنا ناڤێ پێشمه‌رگه‌ى ده‌ریێ خۆزیان بوو، دیتنا پێشمه‌رگه‌ى گه‌لیێ مرادان بوو.
ده‌ما دبێژین شۆرشا گولانێ سه‌رده‌مه‌ك بوو، كوردایه‌تى تێدا گه‌له‌كا شرین و پیرۆز بوو، ئه‌وێ رامانێ ناده‌ت كو نها كوردایه‌تى نه‌ یا پیرۆزه‌! ل باڵ و پاڵ كه‌سێن خۆدان پرانسیب و بیروباوه‌ر و جوامێر كوردایه‌تى هێلا سوره‌ و هه‌را شرین و پیرۆزه‌.

کۆمێنتا تە