فیدراسیۆنا پایسكلڤانێن كوردستانێ بەرهەڤیان بۆ وەرزەكێ پڕی چالاكی دكەت
د داخویانیەكا تایبەت دا سەرۆكێ فیدراسیۆنا پایسكلڤانێن هەرێما كوردستانێ دیار كر ژڤانێ قۆناغا چارێ و دووماهیێ یا خولا كوردستانێ هاتە دیار كر و بەرهەڤیێن باش بۆ وەرزەكێ نوو و پری چالاكی ب دانانا پلان و بەرنامە د هێنە كرن.
زیدەتر هشیار فەریق بۆ رۆژنامەیا ئەڤرۆ گۆت: ل دووماهییا ڤێ حەفتیێ مە كۆمبوونا خوە یا ئاسایی كر و گەنگەشە و دانۆستاندن ل سەر چەندین تەوەرێن جودا هاتە بەحسكرن، پشتی هەمی پێشنیار و بۆچوون هاتینە وەرگرتن ل دووماهیێ ئەم گەهشتینە چەند خالان و رێكەفتین، ژ وانا ل ئێكی كانوونا ئێكێ یا بهێت قۆناغا دووماهیێ یا خولا كوردستانێ ل هەولێرا پایستەخت هێتە كرن بۆ هەردو ئاستێن پێشكەفتییان 100كم و ل سەر ئاستێ تازەپێگەهشتییان و كچان ب درێژاهییا 50كم، هەروەسان د هەمان رۆژ دا دێ رێورەسمەكێ جوان ب بەرهەڤبوونا بەرپرسێن وەرزشی و دێ ئاهنگەكا قەشەنگ هێتە گێران.
هەروەسان ناڤهاتی دیاركر بەری ب دووماهی هاتنا وەرزێ 2023ێ دێ خولەكا بهێزكرنێ و شیاندانێ بۆ هەمی دادڤانێن یارییا پایسكلان ل كوردستانێ هێتە رێكخستن و گۆت: ب چاڤدێرییا لژنەیا ئۆلمپییا كوردستانێ دێ بەرهەڤی بۆ وەرزەكێ نوو یێ پری چالاكی و پلان هێنە دانان، لەوما دخوازین ژ یانەیێن كوردستانێ و دێ نڤێسارەكا فەرمی بۆ سەرجەم لەقێن فیدراسیۆنێن پارێزگەهێن هەرێمێ فرێكەین پێخەمەت پشكداری د هەمی چالاكیێن داهاتی یێن فیدراسیۆنا كوردستانی دا، دیسان ب پشتەڤانییا لژنەیا ئۆلمپی یا كوردستانێ دێ بزاڤێ كەین گرنگییەكا باش ل سەر تیمێن تازەپێگەهشتییان بهێتە كرن و دێ بەردەوامبین بۆ پێشئێخستنا وەرزشا پایسكلان ل كوردستانێ.