قارەمانییا ئیراقێ ژ هەولێرێ بۆ دهۆكێ هاتە ڤەگوهاستن
قەیس وەیس:
د داخویانیەكێ دا رێكخەرێ راگەهاندنێ ل فیدراسیۆنا ئیراقێ بۆ یارییا پایسكلان دیار كر پشتی باژێرێ لێبۆرین خواستی ژبۆ مێڤانداریكرنا قۆناغا سێیێ و بەری دووماهیێ یا قارەمانییا ئیراقێ ب فەرمی بڕیار هاتە دان قارەمانی بۆ پارێزگەها دهۆكێ بهێتە ڤەگۆهاستن، ئەوا دهێتە چاڤەڕێكرن ل دەستپێكا تەباخا بهێت هەڤڕكیێن وێ بهێنە كرن.
ساجد سلێم بۆ دەزگەهێن راگەهاندنێ گۆت: فیدراسیۆنا لەقێ هەولێرێ یا یارییا پایسكلان داخوازا لێبۆرینێ كر ژبەركو ئەوان شیانێن مێڤانداریكرنێ نینن، لەوما پشتی دگەل یێن پارێزگەها دهۆكێ مە گەنگەشە كرین ئەوان بەرهەڤییا خوە دیاركر، ئەم بڤێ بڕیارێ كەیفخوەشین ژبەركو هەر قارەمانیەكا مە ل دهۆكێ هاتبا ئەنجامدان یا سەركەفتی بوو، دەستخوەشیا بەرپرسین وەرزشی و حكومی یێن پارێزگەهێ دكەین كو هەردەم هەڤكار و پشتەڤانێن وەرزشێ نە.
ژلایەكێ دووڤە تارق سەعید راهێنەرێ تیما تازەپێگەهشتیێن یانەیا دهۆك بەرهەڤییا تیما خۆ بۆ قۆناغا سێیێ و چارەنڤیس یا ناسناڤی دیار كر و گۆت: پشتی د هەردو قۆناغێن ئێكێ و دویێ دا ئەم شیایین ببنە یێن ئێكێ ل سەر ئاستێ 11 یانەیێن پشكدار گەشبینن بۆ قۆناغا سێیێ بەردەوامیێ بدەینە سەركێشییا خوە ژبۆ مسۆگەركرنا ناسناڤێ ئەڤ سالە یێ قارەمانییا ئیراقێ، ئەم بەردەوامین ل سەر راهێنانێن خوە و بپشتەڤانییا بەردەوام یا كارگێرییا یانەیێ دێ گەهینە ئارمانجا خوە.
بۆ زانین پێكهاتیێ تیما دهۆكێ ئەوژی، ئیبراهیم سەمیر راجی، یوسف جیهاد، ئەمیر نەواف حەسەن، محەمەد سەدیق نوری، ئیهاب عومەر سلێمان و شیایینە جهێ خوە د ناڤ رێزێن هەلبژارتیێ ئیراقێ دا بكەن.
