كارێ خوەبەخشی دەروونێ گەنجان ئارامتر دكەت
بێوار حەمدی
كاركرنا گەنجان ب خۆەبەخشی ژی گەلەك باشترە ژ بێكاریێ و تا راددەیەكێ باش دەروونێ وان ئارامتر لێ دهێت. دەرونناسەكی گۆت: ئەگەر گەنج بمینتە بێكار پتر رەفتارێن خەلەت دكەت، لەوما یا گرنگە ئەگەر ب خوەبەخشی ژی بیت بلا كاربكەت دا كۆ ژ تێكچوونێن دەروونی بهێتە پاراستن.
ئەیاد عەبدۆللا، دەرونناس و شاڕەزایێ جڤاكی یە د دیدارەكێ دا بۆ ڕۆژناما ئەڤرۆ گۆت: ئەگەر گەنج بمینیتە بێكار و چ كاران نەكەت، دێ تووشی گەلەك تێكچوون و گڤاشتنێن دەروونی یێن نەچاڤەرێكری بیت و گۆت: (بەتاڵی دێ گەنجی تووشی ڕەفتارێن خەلەت و هزرێن نەرێنی كەت و دیسان دێ بیتە كەسەكێ توڕە و هەتا خەوا وی ژی دێ تێك چیت).
د بەردەوامیا ئاخفتنا خۆدا دەرونناسی دیار كر، كاركرنا گەنجان هەر چەندە ب خوەبەخشی ژی بیت گەلەك باشترە ژ بێكاریێ و تا راددەیەكێ باش دێ دەروونێ وی ئارامتر لێ كەت و گۆت: (ئەو كەسێ ب خۆبەخشی كاربكەت دێ ئەڤ نیشانێن ئەرێنی ل دەڤ وی پەیدابن وەكۆ: شارەزاییا كاركرنێ دێ ل دەڤ پەیدابیت، دەمێ ژ كاری دزڤڕیت دێ وەستیت و ئەڤە دێ بیتە ئەگەر ئەو تێر بنڤیت و خەوەكا ساخلەم بكەت، دێ هێتە پاراستن ژ هزركرنا نەرێنی و نەساخلەم، ب ڕێكا كاركرنا خۆبەخش دێ دەلیڤێن كاری پەیداكەت، هەر دیسان ڕێكخستنەكا باش دێ كەڤیتە ڕۆژا وی و ژ ڕەفتارێن خەلەت و دەم بۆراندنا بێ مفا هێتە پاراستن).
