لێپرسین ل گەل ڤان مامۆستایێن ئایینی دێ هێتە كرن
سەرۆكێ بۆردا دیاركرنا گۆتارێن ئەینیێ ل وەزارەتا ئەوقاف و كاروبارێن ئاینی دیار كر، گۆتارا رۆژا ئەینی ژ لایێ كەسێن شارەزاڤە دهێتە دیاركرن و پێدڤیە مامۆستایێن ئاینی پێگیریێ ب گۆتارا ئەینیێ بكەن، بەروڤاژی دێ لێپرسین د گەل دا هێتە كرن.
دكتۆر بەشیر حەداد، سەرۆكێ بۆردا گۆتارێن ئایینی ل وەزارەتا ئەوقاف و كاروبارێن ئاینی یا حوكمەتا هەرێما كوردستانێ بۆ رۆژناما ئەڤرۆ دیار كر، هەر حەفتیێ بۆ رۆژا ئەینی دو بابەت بۆ مامۆستایێن ئایینی دهێنە دیاركرن و گۆت: «پێدڤیە مامۆستایێن ئاینی پێگیریێ پێ بكەن، ژ بەركو بۆردەك ل وەزارەتا ئەوقافێ سەرپەرشتیا گۆتارێن ئەینیێ دكەت و ب هەماهەنگی ل گەل مامۆستایێن ئایینی بابەتێ گۆتارا حەفتیێ دهێتە دیاركرن، مامۆستایێ ئاینی یێ ئازادە ئێك ژ وان بابەتێن هاتینە دیاركرن هەلبژێریت».
دكتۆر بەشیر حەداد گۆتژی: «هەر مامۆستایەكێ ئایینی پێگیریێ ب گۆتارا رۆژا ئەینیێ نەكەت ژ ئالیێ وەزارەتا ئەوقاف و كاروبارێن ئایینی ڤە دێ ڤەكۆلین د گەل دا هێتە كرن، هەر بابەتەكێ گرێدایی دەڤەرەكێ بیت مامۆستایێ ئاینی دكاریت د چارچوڤێ گۆتارا ئەینیێ دا بەحس بكەت و رێگری لێ ناهێتە كرن، بەلێ ل گەل ئەو بابەتێ ئەوقافێ دیاركری بهێتە تێكەلكرن و نابیت مامۆستا بابەتەكی هەلبژێریت بەروڤاژی بابەتێ ئەوقافێ بیت».
