ل ئاكرێ تلفریكەك ل سەرێ گری دێ هێتە دانان
كار دهێتە كرن، كو ل ئاكرێ بۆ جارا ئێكێ تلفریكەك بهێتە دانان و هندەك وەستگەه دێ هەبن بۆ ڤەگوهاستنا وەلاتیان ل جهێن كەڤنارێن باژێرێ ئاكرێ و مەرەم ژ پڕۆژەی راكێشانا سەرنجا گەشتیارانە بۆ دەڤەرێ.
د. دلاوەر بۆزۆ، دەڤەردارێ ئاكرێ بۆ ئەڤرۆ گۆت: «ل گۆر بەرنامەیێ كابینا نەهێ یا حوكمەتا هەرێما كوردستانێ ب سەرۆكاتیا مەسرور بارزانی و ب پشتەڤانیا پارێزگارێ دهۆكێ، پلانەك هەیە، هندەك پڕۆژەیێن گەشتاری زێدە بكەین، ژ وان ژی دروستكرنا تلفریكا سەرێ گری یە ل ئاكرێ«.
ناڤبری گۆتژی: «ئەم دخوازین، پڕۆژەیێ تلفریكێ بدەینە هندەك بەلێندەران و بجه بینین، مە پلانێن دۆمكورت و دۆمدرێژ هەنە، ئەڤ پلانە دێ زوو هێتە بجهئینان بۆ پتر جوانكرن و خزمەتكرنا دەڤەرا ئاكرێ».
دەڤەردارێ ئاكرێ خویا ژی كر، وەستگەهێن تلفریكێ دێ ل سەرێ تیشی بۆ سەرێ گری و پاشی بۆ سەرێ كەلێ هێنە راكێشان، ئەم دخوازین، پتر خزمەتا باژێری بكەین ب رێكا ڤان پڕۆژان، ئەز دخوازم سەرمایەدارێن دەڤەرێ پتر خزمەتا باژێرێ خوە بكەن.
