ل دادگەهێ پرسیار ژمن كر تو كریستیانی؟ من گۆت: نەخێر ئەز كوردم
دیدار: رەمەزان دەشتمری/ زاخۆ
4-4
ئەڤی كەسێ ب ناڤێ جەمال خەشاف پرسیار ژ من كر و گوتە من: تە عەبدوللا سالح دنیاسی. من گوتێ سەیدی: ئەز دزانم ل دەمێ دگەل ئیكەتیا قوتابیان بی، بەلێ نوكە نزانم ساخە مریە و كیڤە چوویە. چەوان من ئەڤە گوتی. ئەڤ جەمالە رابی سەر پێخوە و زلەهەك ل بنێ گوهێن مندا و گوت: هەیی و چەوا تو نزانی عەبدوللا سالح ل كیڤەیە؟ پاشی ئەم رەوانەیی ئەمنا دهوكێ كرین و بۆ ماوێ بیست و نەهـ شەڤان ل زیندانا ئەمنا دهۆكێ ڤە ل بن لێدام و ئەشكەنجێ دا ماین و مە شەڤێن خۆە هوسا دەربازكرن. پشتی بورینا ئەڤی ماوەیێ ل زیندانا ئەمنا باژێڕێ دهوكێ شەڤەكێ ئەم ل ترومبێلا سیاركرن و ڕەوانە زیندانا شێتا ل باژێڕێ مووسل كرن و ل ئەوێ شەڤێ ئەم ل ناڤ دیناندا هێلان و ڤێجا ژبلی قوتان و لێدان و ئەشكەنجێ ئەڤان دینا و شێتا چ حال ل وێ شەڤێ نەهێلان ئەم ڕوینن خوار یان بێهنا خۆە ڤەدین و پیچەكێ بۆ خۆە بنڤن. ل ڕۆژا دیتر ل دەمژمێر حەفتی سپێدێ ئەم ژزیندانا باژێڕێ مووسل بۆ ئەمنا گشتی ل باژێڕێ كەركوكێ ڤەگوهاستن. ئەم بن ئاخ زیندانكرن. هەر شەڤ دا ناڤێن مە گازی دكرن و مە بۆ ژورا ڤەكولینێ بن و گەلەك جورێن ئەشكەنجێ دانە بەر لاشێ مە و ژ بلی ئیهانێ و ڕەزیل و كرێتكرنێ. ل ڤێرێ من دشیا ب دەستەكێ ب تنێ كار بكەم. بەلێ چوو جاران رولێ هەڤالێ خۆە یێ زیندانی خدر تاهر ژبیرناكم دەمێ ئەز ژ ژورا ئەشكەنجێ دئینام ئەوی جلكێن من دشویشتن و لاشێ من پاقژ كرن، و خوار ن بۆ من دئینا و هاریكاریا من دكر. هەر وەسا بۆ ماوێ بیست و حەفت شەڤان ئەم ل زیندانا ئەمنا گشتی ل باژێرێ كەركوكێ دا ماین.
ئەو بوو ل سپێدەهیا ڕۆژا بیست 27/7/1977ی هەژمارا حەفتێ و سێ زیندانیان بۆ ئەم بۆ دادگەها لەشكرییا تایبەت ل كەركوكێ برین، بەری ئەم بچین بۆ دادگەهێ هەمی ڕێزكرن و سەرتراش ئینان و ب ماكینێ پرچێن سەرێن مە هەمیان تراشین، و كرنە پنی پنی و سەر ژ نوی ئەم بۆ دادگەهێ هنارتین، دەمێ سەروكێ دادگەهێ ناڤێ من خواندن و من گوت: بەلێ. سەرۆكێ دادگەهێ ب زمانێ عەرەبی گوتە من: (انت مەسیحی و چەوا هاتی دگەل كوردان زیندان بوی)؟، من ژی بێ ترس و دو دلی ب عەرەبی بەرسڤا وی دا و گوتی: (انا كوردی مەسیحی) سەرۆكێ دادگەهێ دوبارە و ل دویف ئێك هەر دگوتە من: تۆ مەسیحی. لێ هەر من بەرسڤا دادگەهێ دا و گوتی: نەخێر ئەز كوردێ مەسیحی مە. ل دوماهیێ سەرۆكێ دادگەهێ ل من توڕەبوو و ب زمانێ عەرەبی گوتە من: (گەواوید) بۆ دەمێ پێنچ سال و هەیڤەكێ حكوم بۆتە دەرچوو. ئەو بوو ئەز ب ئەڤی دومێ پێنج سالان هاتم حكومكرن. ژ هەژمارا ئەڤان حەفتێ و سێ زیندانیان سێ كەس هاتنە ئازادكرن. و هەشت هەڤالێن مە یێن زیندانێ هەر ئێك ب ناڤێ ( یوسف حامد سلێمان، یونس سال یونس، ئەحمەد جاسم تەتەر سندی، فەخری رەمەزان عەزەددین، فەخری شێخ سەعید دەرگەلی، سادق حەمید محو شەرنەخی، عەبدولقادر جاسم محۆ شەرنەخی، نایف عەبدولرەحمان ئێتیتی) ل دەمژمێر حەفتی ئیڤاری ل ڕۆژا 27/7/1977ی ب كنفێ قنارێ هاتن سێدارەدان، و ئەم ئەو زیندانیێن دیتر هەمی هاتنە دادگەهكرن و بۆ هندەك بۆ دەمێ بیست سال و هندەك دەهـ سال و هندەك پێنج سال هاتنە حكومكرن و بۆ زیندانا ئەبو غرێب برین، دەمێ ئەم بۆ زیندانێ گەهاندین و ئەم ل ئەوان هولان بەلاڤكرین. ئەو هەڤالێن ئەم گەلەك نیزیكێ ئێك ئەوژی عەبدوللا بشار و محەمەد عیسا بوون، ئەو برن بۆ ئەوێ هولا ل بەرامبەری مە. من داخوازكر وكو ئەز بچم دەف هەڤالێن خۆە و دەستی من سقەتە و نەشێم خزمەتا خوە بەكەم. ئەوی ئەفسەری ب زمانێ عەرەبی ل من حەیتاند و گوت: یەوەل ڕوینە ئەڤە هەمی وەكی تە و فەرقا چ كەس ژهەوە نینە. مە ڕۆژانێن خۆە یێن نەخوەش ل زیندتانا ئەبو غرێب دا بوراندن هەتا ڕۆژا 16/8/1979ێ ب لێبورینا گشتی ئەم هاتن ئازادكرن. پشتی ئەز ژ زیندانێ هاتیم بەردان. ئەوبی ل ڕۆژا 12/12/1979ی بڕیارا دامەزراندنا من ل رێڤەبەریا شارەوانیا زاخۆ هات وەك فەرمانبەر من كار كر. پشتی ئەز هاتیم بەردان و مە چەند ئەوان هەڤالێن ل زیندانێ دا مە بڕیاردا كو ئێدی ئەم دگەل هیچ لایەنەكێ وەك ڕێكخستن كار نەكەین، و ل مالێن خۆە ڕوینن خوار و مال خێزانا خوە ب خودان بكەین. من كارێ خۆە یێ فەرمانبەریێ كر هەتا سالا 1983ی ل ئێڤاریەكێ ئەز ل ناڤ بازارێ زاخۆ پێاسێ دكەم. ل دەمەكێ زەلامەكێ ملێ من گرت و سلاڤی من كر. من ژی سلاڤ ژێ وەرگرت. ئەڤی زەلامی گوتەمن: تۆ من دنیاسی؟ من گوتێ: ببورە ئەز تە نانسیام. ئەڤی زەلامی دەستئاڤێت بەریكا خۆە و دەستەك تزبیێن زەر ژێ ئینان دەرێ و دانە من و گوت: هەڤالێ تە عەبدوللا بشار ئەڤ دەستێ تزبیا وەك دیاری یێن بوتە دگەل من هنارتین، و ئەڤە من ئەمانەتێ وی تەسلیمی تەكر. ل ڤێرێ من باوەری نەهات و تزبی ژێ وەرنەگرتن و من گوتێ: هەڕە تەها سوبەهی دێ ئیك و دوو بینن. بێ ڕۆژا دیتر ئەو زەلام جارەكادیتر هات و ڤێجا مە پیاسەكر و ئەم بۆ حەتا راستا گورستانا ئەرمەنا چووین، و مە باوەری پێكئینا و جارەكادیتر مە دەست ب رێكخستنا نهێنی یا پارتی دیموكراتی كوردستان كرەڤە. ئەم بەردەوام بین هەتا سەرهلدانا بهارا سالا 1991ی وەكی خەلكێ كوردستانێ مە دەست ب سەرهلدانێ كر و ئەم ئازادبین. ل سالا 1991ی و پشتی ئەم ژ بلهی بۆ ناڤ باژێڕێ هاتین و حكومەتا هەرێما كوردستانێ هات پێكئینان و ئەز مەفرەزە یا هێزا دەست وەشین هەتا سالا 1995ی من بەردەوامی ب خزمەتا پێشمەرگایەتیێ دا. ئەوبی ل سالا 2006ی ئەز ژ یاژێرڤانیا زاخۆ بۆ باژێرڤانیا كومەلگەها هیزاوا هاتم ڤەگوهاستن. ئەو بوو ل سالا 2009ی وەك كوردەك ئەرمەنی بۆ پەرلەمانێ كوردستانێ هاتم بەربژێركرن، و ئەز یێ ئێكێ وەك كۆتا من 4202 دەنگ من ب دەست خۆە ئینان و ئەز بووم ئەندامێ پەرلەمانێ كوردستانێ ل سەر لیستا ئەرمەنیێن كورستانێ و مە سویندا یاسایی ل هۆلا پەرلەمانی خواند و خزمەتا گەل و وەلاتی بكەین. هەتا سالا 2013ی وەك ئەندام پەرلەمان هاتین خانەنشینكرن. پشتی هینگێ ژ لایێ لقێ هەشتی پارتی دیموكراتی كوردستان بڕیارا من دەرچو وەك ئەندامێ پەشكا شیرەتكاری و هەتا نوكە ئەز ل سەر ئەرك و خزمتا گەل و وەلاتی و پارتی بەردەوام د ئەركی دا و زۆر سۆپاس بۆ ڕۆژنامەیا ئەڤرۆ كو خۆە ل ئەڤان جورە بابەتان دكەنە خوان و خزمەت و خەباتا مللەتی بۆ دیرۆكێ تۆمار دكەن.
