ل دهۆكێ‌ نێزیكی 12 هزار كەسان د كەرتێ‌ گەشتوگوزاری دا كاردكەن

ل دهۆكێ‌ نێزیكی 12 هزار كەسان د كەرتێ‌ گەشتوگوزاری دا كاردكەن

17

پەروین سەلاح

رێڤەبەرێ گشتیێ‌ گەشت گوازارێ ل پارێزگەها دهۆكێ راگەهاند، ل پارێزگەها دهۆكێ‌ نێزیكی 900 جهێن گشتیاری یێن هەین، دگەل 250 جهێن سروشتی هەنە هەروەسا كەرتێ گەشت و گوزارێ پشتەڤانە بۆ دیتنا دەلیڤەیێن كاری بۆ وان كەسێن بێ كار و گۆت: رێژا كارمەندێن كاردكەن د كەرتێ گەشت گوزاری دا نێزیكی 10 هەزار هەتا 12 هەزارانە، ئەڤ كەسە دڤان جهێن گەشتیاری دا كاردكەن و ئەڤە رامانا وێ چەندێ دگەهینت كو كەرتێ گەشت گوزارێ پشتەڤانە بۆ دیتنا دەلیڤەیێن كاری بۆ وان كەسێن بێ كار.

د. خەیری عەلی ئوسو، رێڤەبەرێ گشتیێ‌ گەشت گوازارێ ل پارێزگەها دهۆكێ بۆ رۆژناما ئەڤرۆ دیار كر، مە گەلەك پرۆژەیێن گەشتیاری د نوكەدا هەنە دێ هێنە دروستكرن، ئێك ژ وان پرۆژان ل سەرێ چیایێ زاوایە دێ بیتە مەزنترین پرۆژە، هەر دیسان پرۆژێ گەشتیاری یێ‌ سكرێ‌ دهۆكێ‌، ئەگەر ئەو ژی ب هێتە دروست كرن دێ گەلەك كارتێكرنەكا باش ل كەرتێ گەشت گوزارێ كەت، هەروەسا ل دەڤەرا سەرسنكێ ژی دێ چەندین پرۆژە هێنە چێكرن دگەل ئوتێل و یاریگەهەكا ئۆلۆمپی و دگەل هۆلەكا كونگران.
زێدەتر دبێژیت: ل قەزا ئامێدیێ ژی ئوتێلەك دێ هێتە چێكرن د نوكەدا كەفتیە كاری دا، ل گەلیێ شێرانە ژی دێ ئوتێلەك لێ هێتە دروست كرن، جهێن گەشتیاری ل پارێزگەها دهۆكێ سال بۆ سالێ بەرەف زێدەبوونێ ڤە دچن، نێزیكی 900 جهێن گەشتیاری مە یێن هەین و دگەل 250 جهێن سروشتی مە هەنە ل سەرانسەری پارێزگەها دهۆكێ، هەردیسان رێژا كارمەندێن كاردكەن د كەرتێ گەشت گوزاری دا نێزیكی 10 هەزار هەتا 12 هەزارانە، ئەڤ كەسە دڤان جهێن گەشتیاری دا كاردكەن و ئەڤە رامانا وێ چەندێ دگەهینت كو كەرتێ گەشت گوزارێ پشتەڤانە بۆ دیتنا دەلیڤەیێن كاری بۆ وان كەسێن بێ كار.
د. خەیری عەلی ئوسو ئاماژە ب وێ چەندێ ژی دا: ئەم وەكو رێڤەبەریا گەشت گوزارێ كار دكەین دگەل حوكمەتا هەرێما كوردستانێ و پارێزگارێ دهۆكێ بۆ هندێ‌ دەرفەتێن كاری ببینین تایبەت بۆ دەرچوویێن بەشێن گەشت و گوزارێ، مە گەلەك هەول داینە ئەم وان بدەینە كاری ل جهێن گەشت گوزاری یێن كو خەلكێ بیانی سەرەدانێ بۆ دكەن ل پارێزگەها دهۆكێ.
ل دووماهیێ رێڤەبەرێ گشتیێ‌ گەشت گوازارێ ل پارێزگەها دهۆكێ گۆت ژی: ئەم وەكو رێڤەبەریا گەشت گوزارێ ل پارێزگەها دهۆكێ بەردەوام خولێن راهێنانێ ڤەدكەین تایبەت بۆ جهێن وەكو ئوتێل و خارنگەهان، بەری چەندەكێ ژی مە خولەكا ڤەكری كومەكا كەسان تێدا پشكدارببوون، مەرەم ژ ڤەكرنا ڤان خولان ئەوە ئاستێ ڤان كەسان بهێتە بلند كرن بەرامبەر خەلكێ بیانی یێن دهێن سەرەدانا جهێن گەشتیاری دكەن. هەروەسا نێزیكی چەند لژنان مە هەنە ل سەرانسەری پارێزگەها دهۆكێ هەتا قەزا و ناحیان ژی كارێ ڤان لژنان ئەوە سەرەدانا جهێن گەشتیاری بكەن، دا كو بزانن ئەو خزمەت گوزاریێن دهێنە كرن بۆ خەلكی د ئاستەكێ باش دایە یان نە، رامان ژێ ئەوە كو زێدەكرنا كوالێتیا ڤان جهێن گەشتیاری یە هەمی ژی بۆ پێش ئێخستنا كەرتێ گەشت گوزاری یە.

کۆمێنتا تە