ل شۆڕەشا ئیلونێ‌ كار گەلەك ب نهێنی دهاتنەكرن و حوكمەتا ئیراقێ‌...

ل شۆڕەشا ئیلونێ‌ كار گەلەك ب نهێنی دهاتنەكرن و حوكمەتا ئیراقێ‌ پێزانین ل سەر بزاڤێن پێشمەرگەی نەبوون

57

دیدار، سالار محەمەد دۆسكی:

پێشمەرگەیەكێ‌ هەر دو شۆڕەشێن ئیلون و گولانێ‌ كو رۆلەكێ‌ هەر كاریگەر د هاڤێتنا توپان دا هەبوو و ناڤ و دەنگیا وی دناڤا هێزێن پێشمەرگەی دا بەر بەلاڤ بوو، بەحسێ‌ چەندین چالاكی و دستانێن پێشمەرگەی دكەت ل وی سەردەمی.
ئەحمەد بداغ، د دیدارەكێ‌ دا ل گەل رۆژناما ئەڤرۆ گۆت: ژییێ‌ من (14) سال بوون من دڤیا بهێمە دناڤا رێكخستنێن پارتی دیموكراتی كوردستان دا، ل گوندێ‌ كەمەكا شانەكا سەرەكی و رێكخستنەكا ب هێزا پارتی دیمەكراتی كوردستان هەبوو، كادرێ‌ لژنا دهۆك(سلێمان بۆتی) بەرپرس و چاڤدێریكرنا ئەڤان رێكخستنا دكر، و هەیڤانە دهاتە گوندی و كۆمبوون دگەل رێكخستنێن پارتی دكر، بارا پترا كۆمبوونان ل مزگەفتا گوندێ‌ كەمەكا دهاتنەكرن، ئێكەمین كادر كو گۆتییە من وەرە ناڤ رێزێت پارتی هێژا( سلێمان بۆتی) بوو، ل بەر دیوارێ‌ مزگەفتا گوندی چاڤ پێكەفتنەك ل گەل من كر، وەك ئالیگرەكێ‌ پارتی ئەز ب رێكخستنێن پارتی ڤە گرێدام، وی دەمی بەلاڤووك گەلەك كێم بوون و جارەكێ‌ (سلێمان بۆتی) ب شەڤ بەلاڤووكە دانەف من و شەڤ بوو نەشیا بخوینم و رۆژا دووڤدا من سەحكرێ‌ هۆزانەكا (صەبری بوتانی) یە بناڤێ‌(شڤان)، من ل باژێرێ‌ ب نهێنی كارو خەباتا خوە یا پارتایەتیێ‌ دكر، وگەلەك هەڤال من هەبوون، پشتی كو ل سالا 1966 هندەك روودان و شەر دناڤبەرا خواندەڤانێن پارتی و ئالیگرتیێت جەلالییا دا ل ناڤنجی و ئامادەیا دهۆك چێبوون، و كاودانێن مە خواندەڤانان گەلەك نەخوش بوون، و هندەك مامۆستایێن مەیێن عەرەب ژی گەلەك گڤاشتن ل سەر مە خواندڤان دكرن، و ئەم خواندەڤان دشكاندین و سەردەریەكا نە ل ئاست ل گەل مەدا دكر، و ئەڤ چەندە بۆ ئەگەر ل دووماهی یا وەرزێ‌ خواندنا سالا 1966ێ‌ ئەز و ماموستایەكێ‌ مویسلی بناڤێ‌( نائیل ئەفندی) لێككەفتین و من دا بەر بەرا و رەڤی چوو دئیدارێ‌ ڤە، و ئەز گرتم و گەلەك ئێشاندم و دا من رادەستی ئەمنا دهۆكێ‌ كەن، لێ‌ هەر دو خودێ‌ ژێ‌ رازیان (چیایی دێوالی سەعیدا ئاغا و رەشید سەعید ئاغا) وەكو مرۆڤانیێ‌ و عەشیرەتی خوە ل من كرە خودان، و گەف ل مامۆستا و رێڤەبەرێ‌ خواندنگەهێ‌ كرن و گۆت ئەم قەبوول ناكەین هوون عەمەلەكی ل ئەحمەد بداغی بكەن، و ئەڤە بۆ ئەگرە مامۆستا ژ دەعوا خوە پەشێمان بوو و ئیدارا قوتابخانێ‌ ژی ژ بریارا خوە لێڤەبوون كو من ژ خواندنێ‌ دەربێخن.
ئەحمەد بداغ گۆت: ئەڤ روودانە بوونە ئەگەر هەتا رادەكی ژ قوتابخانێ‌ دوور كەڤم و جارەكێ‌ من سەرەدانا گوندی كر و من بابەتێ‌ خوە ل گەل مامۆستایی شرۆڤەكر و من بۆ دیار كر كو دێ‌ بمە پێشمەرگە لێ‌ مرۆڤێن من هەمی یا گۆت توویێ‌ بچووكی و باشترە تو خواندنا خوە تەمام بكەی لێ‌ هەر ئەزێ‌ رژد بووم و باوەری بۆ مرۆڤێت من دروست بوو، رۆژەكێ‌ من بخوە گۆتە شەهید (حەمو كەمەكی) من دڤێت ببمە پێشمەرگە وی گۆت مە ژی دڤێت لێ‌ مرۆڤێت تە پێ‌ نەخوشە و ناڤ نڤێسینا پێشمەرگا ژی دڤێتن هێز و ئامر هێز (عەلیێ‌ خەلیل خوشەڤی) رازی بیت، و من ژێ‌ خواست پێشمەرگەكێ‌ خوە بدانیتە گەل من دا بچمە بارەگایێ‌ هێزێ‌ و رۆژا دووڤدا پێشمەرگە(شوكری حاجی محەمەد كەمەكی) دانا ل گەل من و چووینە بارەگایێ‌ هێزا دهۆك ل گوندێ‌ (گەلناسكێ‌)، و چومە نیك (عەلیێ‌ خەلیل خوشەڤی) و من گۆتێ‌ ئەز هاتم ببمە پێشمەرگە، وی ژی گۆت بووتە زوویە تو هێشتا یێ‌ بچوویكی و بهێنا خوە تەنگ نەكە شۆڕەشا درێژە دێ‌ مە پێدڤی ب هەوە ژی هەبیت، پشتی من چیرۆكا خوە بۆ گۆتی و دیاربوو رێكخستی مە و پارتی مە، گەلەك ب گەرمی پێشوازی یا من كر، و گۆت هەرە گوندی ژ ئەڤرۆ پێڤە تو پێشمەرگەی، و مە پێدڤی ب تە هەیە ببیە نڤیسەر ل قولێ‌ شەهید (حەمو كەمكی) و پشتی زڤرین كەیفا (حەمو) گەلەك هات، و ئێدی نڤێسینێن قولا كەمەكیا هەمی من دنڤێسین، ل سالا1967 بوو من سالەكا دیرۆكی بوو و گوهورینەكا مەزن بوو دژیانا من دا، و من باش دزانی پێشمەرگاتی و خەباتكرن بۆ رزگاركرنا مللەتێ‌ كورد و كوردستانێ‌، ئەركەكێ‌ ب سەنگە لێ‌ یا ب فەر و ریمەتە و شەرەفەكا مەزنە، ل وی سەردەمی ستەم و زورداری و كریارییێت رژێما ئیراقێ‌ دگەل مللەتێ‌ كورد و خەلكێ‌ كوردستانێ‌ ئەو هەستا نەتەوەیی لنك بەهرا پتریا كوردستانی یا ب تایبەت گەنج و لاوان دروست كربوو، دوریشمێ‌ و ب رویمەت ل وەلاتێ‌ خوە بژین، لەوما دوریشمێ‌ وی سەردەمی (یان كوردستان یان نەمان) بوو.
ئەحمەد بداغ، زێدەتر گۆت: شۆڕەشا ئیلونێ‌ دهەمی بیاڤان دا نەخاسمە لەشكری پێشكەفتنەكا مەزن بخوە ڤە دیت، ل هاڤینا سالا 1968ێ‌ سەركردایەتیا پارتی دیموكراتی كوردستان داخاز ژ هێزێن دەڤەرا بەهدینان كر، كو دەرگەهێ‌ خو بەخشیێ‌ بۆ گەنجان ڤەكەن، و ناڤێت وان بنڤیسن یێن كو بڤێن خو بەخش وبهێنە دناڤا هێزا (هەلگورد) دا و ببنە پێشمەرگە و بارەگایێ‌ سەركردایەتی یا پارتی ل دەڤەرا (بالەك) بوو، ب هزران كەسان قەستا بارەگایێن هێزێن پارتی ل دەڤەرا بەهدینان كر دا ناڤێن خوە بنفیسن و چەكێ‌ شەرەفێ‌ هەلگرن و ببنە پێشمەرگە، پشتی سێ‌ هەیڤ و نیڤا ژ شەهیانا من حەزا چوونا من بۆ ناڤ هێزا (هەلگورد) گەلەك چێبوو و من بریار دا بچمە و مرۆڤێن مە گەلەك حەز نەدكر، چونكە بخوە پێشمەرگە بووم لێ‌ من بریارا خوە دا بوو، و رێكەفتی 15/7/1968ێ‌ ئەز ل گەل (محەمەدێ‌ حەسێ‌) ژ گوندێ‌ كەمەكا دەركەفتین و مە بەرێ‌ خوە دا وەغەرەكا پیرۆز و چووینە گوندێ‌ (مەمانێ‌) كومەكا دی یا گەنجان گەهشتنە مە و چووینە بۆ ناڤ نڤێسینێ‌، وی دەمی شەهید(فەرنسو حەریری) سەرپەرشتێ‌ لژنا پێشوازی یا گەنجان بوو و پێشمەرگە ل سەر گوندێن دەڤەرا (بالەك) وی بەلاڤ دكرن، و ئەم نێزیكی (50) پێشمەرگا بووین، دووڤدا مەكتەبا عەسكەری كو وی دەمی موقدەم (عزیز ئاكرەیی) و ئەندامێ‌ مەكتەبا سیاسی یا پارتی بوو جابا هەمی پێشمەرگەی هنارت و گۆت هەر ئێك ل سەر كاغەزەكێ‌ ناڤێ‌ خوە و گوند و دەڤەرا خوە بنفیست و كا وی حەزا چ هەیە بلا ل سەر بنفیستت و من ژی ناڤ و گوند و دەڤەرا خوە نڤێسی و من داخاز كر ل توپخانا كوردستانێ‌ بهێمە وەرگرتن، و وێ‌ ئەزموونا ب مەهاتیەكرن ب باشی دەركەفتم و ل توپخانا كوردستانێ‌ هاتمە وەرگرتن، وی دەمی بۆ جارا دووێ‌ بەعیسییان كودتا كر و هاتنە سەر دەستهەلاتێ‌، و چووینە حاجی عومران ل بارەگایێ‌ بارزانی و خولەكا (45) رۆژی بوومە هاتەڤەكرن و مە وانێن ئەكادیمی ل سەر توپێن (82 ملم و 120ملم و 107 ملم) وەردگرتن، و بەرپرسێن مە ل ئەڤان خولان (رەشید سندی و میلازم تاهر عەلی والی) بوون، پشتی خول ب دووماهی هاتی لەشكرگەهەك بۆ توپخانا هێزا (هەلگورد) هاتەڤەكرن، و ل دەسپێكێ‌ بەرپرسێ‌ توپخانێ‌( سەید صالح چەم سەیدی) بۆ بەرپرسێ‌ گشتیێ‌ ڤێ‌ هێزا پشتەڤانیا هێزا (هەلگورد) و چاڤدێری یا هەمی كارێن توپخانێ‌ كرن، دووڤدا ڤەگەریاینە دەڤەرێن و مە خول بۆ پێشمەرگەی ڤەكرن و بوومە مامۆستایێ‌ توپا (82ملم) بۆ پێشمەرگێن (هەلگورد) ل دەڤەرا (قەسرێ‌) ل دەڤەرا (بالەك) و چەندین جاران شەهید (ئدریس بارزانی) سەرۆك (مەسعود بارزانی) دهاتنە دەڤەرێ‌ و سەرەدانا مە دكر، وی دەمی شۆڕەشێ‌ هند شیان نەبوون و پتریا خولێن مە لبن كەپرا بوون، ل پائیزا سالا 1968 تەشكیلات هاتنە چێكرن و بوومە بەرپرسێ‌ مەفرەزەكا توپا (82ملم) و بارەگایێ‌ توپخانا (هەلگورد) هاتە ڤەگوهاستن بۆ وان شكەفتوكێت پشتا رێزانوكێ‌ ل رۆژهەلاتێ‌ گوندێ‌ داروسەلام ل گلالە، وی دەمی رەئیس عەبدوللا مایی ب شێوەكێ‌ بەروەخت سەرپەرشتیا هێزا پشتەڤانییا هێزا (هەلگورد) دكر، ل هەیڤا 12 سالا 1968ێ‌ هەر دو سەركردا (ئدریس بارزانی و مەسعود بارزانی) سەرەدانا هێزا پشتەڤانییا هێزا (هەلگورد) (هیزا پشتەڤانیا هەلگورد) دا و رۆژەكا خوش و دیرۆكی بوو بۆ من و هەر دو سەركردە بۆ كارەكێ‌ دیار سەرەدانا مە كربوون و ئەم توپچی كومكرین و راستەوخو بوومە ئاخفتن و گۆت راستە هوون ژ مالێن خوە دووركەفتین لێ‌ بۆ كارەكێ‌ فەر مە پێدڤی ب هەوە هەیە و پشتی ڤی كاری دێ‌ چەكێن باش دەینە هەوە و دێ‌ هاریكاریا هەوە باشتر كەین و دێ‌ هێتە هنارتن بۆ دەستیردانێ‌ و بتنێ‌(30) پێشمەگێن توپچی بۆ ڤی كاری هاتنە ژێگرتن و ئەز ئێك ژوان بووم،
دووڤ دا خولەكا دی بوومە ڤەكر یا (25) رۆژی ل سەر توپێن(106ملم و 120ملم) دناڤبەرا قەسرێ‌ و دیلمان دا و پشتی خولێ‌ مە راهێنان كر و جەنابێ‌ (ئدریس بارزانی و سەرۆك مەسعود بارزانی ) بەرهەڤبوون و گەلەك كەیفا مامۆستایێن مە و سەركردایەتی یا ب مە هات .. ل شورەشا ئیلونێ‌ كار گەلەك ب نهێنی دهاتنەكرن و لەوما حوكمەتا عیراقێ‌ گەلەك پێزانین ل سەر لڤینێن پێشمەرگەی نەبوون.

کۆمێنتا تە