مالا خوه كریه مۆزه‌خانه
هه‌ولێر، سولین سلێمان:
رێزان سالح، خانمه‌كا ئاكنجیا ده‌ڤه‌را بارزانه، بۆ ده‌مێ چه‌ند سالانه كارێ خرڤه‌كرنا كه‌رستێن فولكلۆری دكه‌ت و مالا خوه وه‌كو مۆزه‌خانه‌كا بچووك لێكریه و مه‌ره‌ما وێ ژڤێ چه‌ندێ ئه‌وه دا به‌ره‌بابێن نوو فولكلۆرێ خوه ژبیرنه‌كه‌ن و هیڤیا وێ ئه‌وه مۆزه‌خانه‌كا مه‌زنتر ڤه‌كه‌ت.
رێزان ، كو نوكه فه‌رمانبه‌ره ل رێڤه‌به‌ریا كارۆبارێن شه‌هید و ئه‌نفالكریان، هه‌روه‌سا چالاكڤانه‌كا دیارا سۆشیال میدیایێ یه، زێده‌تر گۆت: ژبلی ڤێ مۆزه‌خانا بچووك من و هه‌ڤژینێ خوه بزاڤ كرینه ب رێیا یۆتیۆپی فولكلۆرێ خوه بۆ خه‌لكه‌كێ بیانی بده‌ینه نیاسین، بۆ زانین ژی ژبلی كه‌رستێن فولكلۆری و ئنتیكان چه‌ندین پرتووك و كارێن ده‌ستی ژی هاتینه نیشادان و گه‌له‌ك جاران خه‌لكه‌كی بۆ دیتنا وان كه‌ره‌ستان سه‌ره‌دانا مالامه كرینه و د پێ دلخۆش بووینه، چنكو دیرۆك و شارستانیه‌تا مه كوردان تێدا دیتینه و داخوازا من ژ هه‌ر ئافره‌ته‌كێ ئه‌وه نه‌مینه راوه‌ستیای و شیان و به‌هره‌یێن خوه دیاركه‌ن.
