من گەلەک حەز دکر
قەهرەمان عەبدوللا بەرواری
من گەلەک حەز دکر
تە د ناڤ مێرگێن دلینییێ دا وندا بکەم،
چپ چپ ببارم،
بەلێ ئەز بوویمە عەورەک سپی و
وەکو مێهڤانا دبۆرم بێ بارانا دژوار
ئو … ژدویرڤە تە دبینم،
بتنێ سیبەرا من وەکو ڕەشمالان
بەژنا تە دنخێڤیت وەکو هەر جار.
من گەلەک حەز دکر
شەمالکەکا سپی بام
ل سەر پەنجەرا دلێ تەیێ دخەو،
زێرەڤانییێ ل تە بکەم ژ دێوێن شەڤێ؛
دا تو نەترسی،
بەلێ نوکە ئەز بوومە خۆلیەکا گەرم …گەرم،
ئەز بتنێ
شەڤستانا بیردانکا تە گەرم دکەم
وەکو هەرجار…
من گەلەک حەز دکر
هەمی سپێدەهیان بەژنا تە ببینم
وەکو ڕۆژێ
بەلێ بابەلیسکێ ئەز ل وارەکێ دی باراندم،
ئاگر و خوین لێ دبارن
وەکو دۆژێ
ئەز بوومە گولەکا دویر … دویر،
بەلێ بەلگێن من
خۆ بۆ ئاراستەیا تە خوار دکەن
وەکو هەرجار.
