مەزنترین پرۆژێ خودانكرنا چێلان دێ ل سێمێلێ هێتە دانان

مەزنترین پرۆژێ خودانكرنا چێلان دێ ل سێمێلێ هێتە دانان

14

ئەمیر ئەترووشی:

قایمقامێ قەزا سێمێلێ دیاركر، پرۆژەكێ مەزن یێ خودانكرنا چێلان هەتا سەرێ سالێ دێ تەمام بیت و نێزیكی سێ هزار چێلان دێ لێ هێنە ب خودانكرن و رێڤەبەرێ سامانێن ئاژەلی ل وەزارەتا چاندن و ژێدەرێن ئاڤێ یا حوكمەتا هەرێما كوردستانێ ژی ئاشكرا كر، نوكە سێ پرۆژێن چێلێن شیردەر ل هەرێما كوردستانێ‌ د قوناغا دامەزراندنێدانە.

خەلیل مەحمود، قائیمقامێ قەزا سێمێلێ بۆ رۆژناما ئەڤرۆ راگەهاند، چەند كارگەهـ هەر د ڤی پرۆژەیدا هەنە و دێ سپیاتییان بەرهەمئینن، هەروەسا پرۆژەیەكێ چێكرنا ئالفێ گیانەوەران ژی دێ بۆ وان گیانەوەران هێتە چێكرن یێن دێ ل ڤی پرۆژەی هێنە ب خودانكرن، ئەڤ پرۆژە دێ هژمارەكا باش یا دەرفەتێن كاری پەیدا كەن و خزمەتا وەلاتییان كەن.
ئاشكرا كر، پرۆژە د قوناغێن بجهـئینانێدایە ئەڤ سالە دێ كەفیتە كاری دێ خزمەتا دەڤەرا سێمێلێ كەت و بەردەوام پرۆژەێن وەبەرهێنانێ و چاندنێ و پێشەسازێ ل سێمێلێ هێنە چێكرن.
رێڤەبەرێ سامانێن ئاژەلی ل وەزارەتا چاندن و ژێدەرێن ئاڤێ یا حوكمەتا هەرێما كوردستانێ ئاشكرا كر، نوكە سێ پرۆژێن چێلێن شیردەر ل هەرێما كوردستانێ‌ د قۆناغا دامەزراندنێدانە.
فیراس سدیق، رێڤەبەرێ سامانێن ئاژەلی ل وەزارەتا چاندنێ و ژێدەرێن ئاڤێ راگەهاند: «نوكە ل كەرتێن پەلەوەر و گۆشتێ مریشك و هێكان گەهشتینە قۆناغا خۆبژاندنێ و مە پێدڤیێن نافخۆ تژی كرینە و مە دڤێت د وارێن دی یێن سامانێن ئاژەلی پێنگاڤێن پێدڤی ب هاڤێژین».
گۆت ژی: «بۆ ڤێ مەرەمێ نوكە مە دەست ب چێكرن و دامەزراندنا سێ پرۆژێن شیرێن شیردەر ل سنوورێ هەرئێك ژ پارێزگەها هەولێر و سلێمانی و دهۆكێ كریە و قۆناغێن باش هاڤێتینە و ئامێر و پێدڤی و ستافێن كاركرنێ دێ بۆ هێنە دانان».
بەحسا وێ ژی كر: «ب تەمامبوونا وان پرۆژان ژبلی دابینكرنا ماست و بەرهەمێن شیرەمەنی ب شێوێ ساخلەم و پاكژ، دەرفەتێن كاری ژی دێ بۆ سەدان دەرچوویێن پشكێن چاندن و گەنجێن دیتر پەیداكەت».

کۆمێنتا تە