مە گەلەك جۆرێن خوارنێن كوردی چێكرینە
بەناز عزەت، كچەكا خەلكا دهۆكێ یە، دەمەكە وەك (شێڤ) كاردكەت و نوكە ئێك ژ پشكدارێن فێستیڤالا شەڤانێن سەرێ سالێ یە كو نوكە ل (فاملی مۆلا) دهۆكێ دهێتە گێڕان و دێ هەتا سەرێ سالێ یا بەردەوام بیت.
ناڤهاتی، بۆ رۆژنامەیا ئەڤرۆ دبێژیت: ئەم وەكو لێنانگەها (رۆژ و هەیڤ) دڤێ چالاكیێ دا د پشكدارین و مە گەلەك جۆرێن خوارنێن كوردی، ژوانا (سەروپێ/پاچە) چێكرینە، چنكو وەرزێ زڤستانێ یە و گەلەك داخوازی ل سەر هەنە و پشتی مە پشكداری تێدا كری خەلكەكی پتر ئەم نیاسین و بكڕێن خوارنێن مە زێدەتر لێ هاتن، لەورا ئەم بڤێ چەندێ د دلخۆشین.
هەروەسا گۆت: ئەم چەند كەسەك لڤێ لێنانگەهێ كاردكەین و بەری هەر تشتەكی گەلەك گرنگیێ ددەینە پاقژیێ، چنكو ئەو مەرجێن سەرەكی یە، هەروەسا هیڤیا مە ئەوە ئەم ببینە پرەك كو گەلەگ كچ و ژنێن دی چاڤ ل مە بكەن و هەردەم ئەز دبێژم نوكە پتر ژ بەرێ دەلیڤەیێن كاركرنێ یێن هەین.
