نامووس و نه‌تێربوونا زه‌لامی
هێشتا ئه‌ز زارۆ بووم، زارۆیه‌كا گه‌له‌ك بچووك ده‌مێ ده‌یكا من ئه‌ز ژ زه‌لامان دترساندم، ل ده‌ف زه‌لامان نه‌كه‌یه كه‌نی! ب تنێ ل ده‌ف زه‌لامان نه رۆینی خار! ده‌مێ ئێك ل زه‌نگا ده‌رگه‌هی دده‌ت تو ده‌رگه‌هى ڤه‌نه‌كه، بلا برایێ ته ڤه‌كه‌ت! ب تنێ نه‌چه دكانێ شه‌ره‌مه و ب ده‌هان ترساندن و پاشڤه‌برنێن دی، ب تنێ گونه‌ها ئه‌ز پێحه‌سیایم، خودێ ئه‌ز كچ دابووم نه‌كور!. نوكه ژی ئه‌ز هه‌ر كچم به‌لێ ئه‌ز یا مه‌زن بوویم ئه‌ز دشێم بێژمه ده‌یكا و خوه و جڤاكی بۆچی؟ باشه د جڤاكی دا به‌س ژن هه‌نه و ب تنێ ژن عه‌وره‌ته، بۆچی كه‌س به‌حسێ شه‌لوالی یان كابۆیێن تێر سه‌نی و مه‌نی و دڕیایی ناكه‌ن؟ باشه ماده‌م ژن نامووسه، بۆچی زه‌لام وێ ژنێ ناپارێزیت و پاراستنا وێ بۆ خوه بكه‌ته كار و ئه‌ركێ رۆژانه؟! زه‌لام ب هه‌می جۆره‌كی و ره‌نگه‌كی به‌رهنگاری ژنان دبن، ژبه‌ركو ژن جه‌سته‌یه‌كێ لاوازه و نكاریت پارێزیێ ژ خوه بكه‌ت، ئه‌ڤه شاشییه یا ئه‌م به‌حس دكه‌ین، دڤێت گه‌له‌ك تشت بهێنه گوهۆرین، نه زه‌لام پارێزه‌ره و نه كۆمه‌لگه‌هـ. جاران هنده‌ك پرسیار دهێنه كرن ده‌رباره‌یی ژنێ و دبێژن، ژنكا من چ شولی ناكه‌ت و ل مال به‌تاله، گه‌لۆ ئه‌و یا به‌تاله، نه‌خێر؟ سپێدێ دێ ڕابیت خوارنێ چێ كه‌ت بۆ زه‌لامێ خوه و هه‌كه زاڕۆك هه‌بن دێ كارێ وان كه‌ت و ب رێ ئخیت و به‌رێ وان ده‌ته قوتابخانێ، زه‌لام ژی دێ ده‌ركه‌ڤیت و ده‌ستێن خوه هه‌ژینیت، ئه‌و ژن دێ ڕابیت مالێ لێ كده‌ت و جلوبه‌رگێن پیس شووت و ڤه‌شوت، جاردن خوارنێ دروست كه‌ت و ل هیڤیا وان دمینیت، ئه‌ڤه و گه‌له‌ك شولێن دی. بۆ رۆیساتیا ژنان دێ بیته ئه‌گه‌رێ تێكدانا مه‌ژیێ زه‌لامان! باشه هه‌كه زه‌لام ب ڕه‌وشت بیت و خودان مه‌ژیه‌كێ ئاڤاكه‌ر بیت، چ جاران ڕۆیساتی نابیته ئه‌گه‌ر بۆ وی، لێ جڤاكێ مه نه‌ئاڤاكه‌ره و سیسته‌مێ ژیانا مه بوویه ئه‌گه‌ر كو گه‌نج خوه كێم ببینیت، بۆ نموونه ده‌مێ فام دكه‌ت و ڕه‌گه‌زی مێ دبینیت و حه‌ز ژێ دكه‌ت، چونكی ئه‌ڤه بیولۆژیه و د ناخێ هه‌ر كه‌سێ دا هه‌یه و دڤێت ببینبت و تێهنا خوه بشكێنیت، لێ چونكی هه‌ر ژ ده‌سپێكێ ڕێ ل هه‌ر دو ڕه‌گه‌زان هاتیه گرتن و بوویه ئێشه‌ك د ناڤ ناخێ وان دا و ژبه‌ر هندێ هه‌ردو وه‌كو گورگان سه‌حكه‌نه ئێك، دبیت ئه‌گه‌رێ شولێن نه‌باش و چاره‌سه‌ریا ڤێ كێشێ نینه و ب چاڤه‌كێ كێم سه‌حكه‌نه كچێ و ژنێ و مه كریه نامووس و شه‌ره‌ف، مانه ئه‌و بێ نامووسه، ئه‌وێ پێنوسێ خوه دفرۆشیت، ما نه ئه‌و بێ نامووسه، ئه‌وێن ژنێن خوه ل مال گرێ دده‌ن و چاڤێن وان ل كچێن خه‌لكی نه. ژبه‌ركو زه‌لام نه‌شێت خوه راگریت، سه‌ر خاترا زه‌لامی ژن خوه راپێچن و خوه ڤه‌شێرن ئه‌رێ ئه‌وه چاره‌سه‌ری؟!! چ گونه‌ها منه، ئه‌ز ببمه قوربانیا حه‌زێن ته یێن برسی و ل سه‌ر بنیاته‌كێ شاش هاتیه په‌روه‌رده‌كرن، ژبه‌ر ناخی ته یێ گه‌نی ئه‌ز ژیانا خوه ب فه‌تسینم، جاره‌كێ من گولێ بوو (كه‌سه‌كی) ب هه‌می باوه‌ری و رهێن سپی ڤه دگۆت: (ژبه‌ر وێ ژنا نیڤ رۆیس و ل سه‌ر جادێ دكه‌ڤیته به‌رچاڤێن زه‌لامی و ده‌مێ دهێته مال، ژنا وی ل به‌ر چاڤێن وی دبیته مه‌یمینك و ناچیته ده‌ردورێن وێ)، ئێ باشه ل ڤێره پرسیار، ئه‌گه‌ر زه‌لام هند یێ بێ بها بیت و ژنا خوه ب چ نه‌هه‌ژمێریت و چ نه‌بیت و خیانه‌تكار بیت، دئ وێ ژیانا دامای ل سه‌ر جادێ چه‌وا بینیت، ئه‌ڤێن وه‌سا ژن و زه‌لامێ وێ پێكڤه ل سه‌ر جادێ ده‌ستێن وان تێكدا ببینت دێ چ بێژیت ئه‌ڤ ژنا هندا جان یا كێ یه!! ئه‌رێ بۆ به‌حسێ ئیرانێ ناكه‌ن ئه‌و ژن وه‌سا باش خوه رادپێچن، لێ چ دكه‌ن؟ تلیاك و دیسكۆ و فه‌ساد د بن وێ راپێچانێ دایه، هه‌می ژنا بكێم ئاقل دبینن وه‌ك هه‌ر جار دبێژم لێ ئه‌م هه‌وه رۆیس ل سه‌ر جادێ ببینین ناسه‌حكه‌ینه هه‌وه و ریێ خوه نیشا هه‌وه ناده‌ین، دڤێت ژن خوه راپێچن ژبه‌ر زه‌لام نه‌شێن كونترۆلێ ل سه‌ر خوه بكه‌ن ب وێ هێزێ و زه‌لامینیێ و ئاقلی نه‌شێت خوه راگریت هه‌مبه‌ر چوكێ رۆیس یێ ژنه‌كێ، ئه‌ڤه ئێدی چه‌وا د روویێ وی دا دهێت بێژیته خوه زه‌لام زه‌لام!! دیسان رێز بۆ زه‌لامان كو هه‌ڤالێ منه، بابێ من برایێ منه و باش و زیره‌كن، هه‌روه‌سا ژنێن باش و خودان ره‌وشتن چ ب رۆیسی بیت و چ یا راپێچای بیت.
