نەخۆشخانا چاندنا مەژیێ هەستی ل دهۆكێ د جێبەجێكرنێ دایە
لەزگین جوقی
ب پشتەڤانیا حوكمەتا هەرێما كوردستانێ هژمارەكا زارۆیێن تووشی نەخۆشیا پەنجەشێری بووین بۆ دەرڤەی وەلاتی هاتینە رەوانەكرن و ژ نەخۆشیێ قورتالبووینە، نوكە ل دهۆكێ نەخۆشخانا چاندنا مەژیێ هەستی بۆ چارەسەریا زارۆیێن نەخۆشیا پەنجەشێری دهێتە ئاڤاكرن و حوكمەتا هەرێما كوردستانێ هەموو دەرمان و پێدڤیێن نوژداری بۆ چارەسەریا زارۆیێن نەخۆشێن پەنجەشێرێ دابین دكەت
د. عبدالرەحمان عەبدوللا، بەرپرسێ هوبا پەنجەشێرێ ل سەنتەرێ ژینا ساخلەمیا دهۆكێ بۆ ئەڤرۆ دیار كر، سالانە ل جیهانێ 400 هزار حالەتێن پەنجەشێرێ ل دەڤ زارۆیان دهێنە دەست نیشانكرن، ژ هەر ملیۆن زارۆكان، 150 زارۆ تووشی پەنجەشێری دبن. ل پارێزگەها دهۆكێ هەتا نوكە 422 زارۆ تووشی نەخۆشیا پەنجەشێرێ بووینە، ژ وانا ژی 280 زارۆ ژ ڤێ نەخۆشیێ قورتالبووینە و سالانە هەتا 50 زارۆیان ل دهۆكێ تووشی پەنجەشێرێ دبن».
ئەو ژی دیار كر، حوكمەتا هەرێما كوردستانێ هەموو مەزاختیێن چارەسەربوونا زارۆیێن نەخۆشێن پەنجەشێرێ ددەت و هەتا نوكە بۆ چاندنا مەژیێ هەستی هەتا 15 زارۆ ب پشتەڤانیا حوكمەتا هەرێما كوردستانێ بۆ دەرڤەی وەلاتی هاتینە رەوانەكرن، ئەڤ كارە ب رێیا وەزارەتا ساخلەمیا حكومەتا هەرێما كوردستانێ و رێڤەبەریا گشتی یا ساخلەمیێ ل دهۆكێ هێتە ئەنجامدان و هەموو مەزاختی و چارەسەری ژلایێ حكومەتا هەرێما كوردستانێ ڤە بۆ چارەسەریا زارۆیان دهێنە دابینكرن».
خۆیا ژی كر، ل پارێزگەها دهۆكێ نوكە نەخۆشخانا چاندنا مەژیێ هەستی یا دهێتە ئاڤاكرن و كار د قوناغێن دووماهیێ دایە، پشتی نەخۆشخانە ل دهۆكێ دهێتە ڤەكرن دێ كارێ چاندنا مەژیێ هەستی بۆ زارۆیێن نەخۆشیا پەنجەشێری هەین ل دهۆكێ نشتەرگەریێن وان هێنە ئەنجامدان و ئەڤە دەستكەفتەكێ گەلەك مەزنە ل دهۆكێ چارەسەریا زارۆیێن نەخۆش بهێتە كرن و پێدڤی ژ دەرڤەی وەلاتی نابن.
تەكەستكر، هندەك فاكتەرێن مەترسی یێن هەین كو زارۆ تووشی نەخۆشیا پەنجەشێرێ دبن، هەتا نوكە چو ئەگەرێن دروست نەهاتینە دەستنیشانكرن كا بۆچی زارۆ تووشی پەنجەشێری دبن، لێ زارۆ زووتر ژ مرۆڤێن مەزن چارەسەر دبن، ب تایبەتی ژی بۆ وەرگرتنا دەرمانێن كیمیاوی، حكومەتا هەرێما كوردستانێ هەموو دەرمان و پێدڤیێن نوژداری بۆ چارەسەریا زارۆیێن نەخۆشێن پەنجەشێری دابین دكەت، ل هەولێرێ ژی پشكنینا پێ تی سكان یا هەی، دەمێ زارۆ پێدڤی بیت، ئەم ژ دهۆكێ وی زارۆكێ نەخۆش رەوانەی هەولێر دكەین».
دایكا نورا عسمان، كچا وێ هەلگرا نەخۆشیا پەنجەشێری بوو نوكە ژ نەخۆشێ قورتالبوویە دیاركر، ب رێیا حكومەتا هەرێما كوردستانێ و وەزارەتا ساخلەمیێ كچا منا 16 سالی ب ناڤێ نورا ژ نەخۆشیا پەنجەشێری هاتە قورتال كرن، د ژیێ 13 سالی دا كچا من تووشی ڤێ نەخۆشیێ ببوو».
