“هه‌می ئادارا هوون من هشیاركه‌ن”

هونه‌رمه‌ندێ نه‌مر محمد شێخوَ ئه‌و هونه‌رمه‌نده‌یه‌ كو هه‌تا نها سترانێن وی دساخ و هه‌رماین، ئه‌و بوو به‌ره‌ڤانی ژئاخ و ملله‌تێ خوه‌كری ژبلی هندێ كو پێشمه‌رگه‌یێ بارزانی بوو، هه‌ره‌سا ب رێكا مۆزیكا خوه‌ و تبلێن خوه‌یێن زێرین و سترانێن خوه‌ یێن نه‌ته‌وایه‌تی و گه‌له‌ك جارا كوردستانا خۆشتڤی ب جوانترین خاسله‌ت و ناڤ و سیمبول و سیما وه‌سف كریه‌ (گولێ و یاروَ و به‌هشتا ره‌نگین.. . هتد) هه‌تا نوكه‌ژی گه‌له‌ك ژ هونه‌رمه‌ندێن كوردا سترانێن وی دبێژن وه‌كو( عبدالقهار زاخوَیی و شه‌یدایی و دلبه‌رێ و هیڤی و بلند ئبراهیم وده‌لال زاخوَیی و كریم شیخۆ.. . هتد) هه‌روه‌سا چه‌ندین هونه‌رمه‌ندێن بیانی بزاڤ كرینه‌ كو سترانێن وی بێژن وه‌كو ستێرا لبنانی (نسرین حمدان ) و چه‌ندین هونه‌رمه‌ندێن دی. كارتێكرنا هونه‌رمه‌ندێ ناڤبری پره‌ ل سه‌ر ملله‌تێ كورد وی گه‌له‌ك كه‌س ژ خه‌و هشیاركرن و ده‌مارێن مری د له‌شێ وان دا زێندی كرین و هه‌ستێن وان هشیاركرن ژبۆ هندێ جاره‌كا دی خوونا نه‌ته‌وایه‌تی د له‌شێ وان دا بگه‌ریێت و هه‌ستێن وان كاربكه‌ن ئه‌وژی ب ره‌نگه‌كی ئاشكرا لاوێن كورد هانده‌ت شوَڕه‌ش و راِپه‌رینا بكه‌ن و بێ ده‌نگ نه‌بن ل سه‌ر زۆلم و سته‌مكاریا ل سه‌ر ملله‌تێ كورد و داخوازا مافێ خوه‌ یێ ره‌وا بكه‌ن و دبێژت(رابه‌ ژ خه‌وێ.. . ) هونه‌رمه‌ندێ نه‌مر و قوتابخانا هۆنه‌رێ كوردی ناڤداره‌ ب جه‌ند ناڤ و نازناڤا وه‌كی (بابێ فه‌له‌ك و بلبلێ غه‌مگین و ده‌نگێ كوردستانێ ) لێ ناڤێ وی یێ راستی ( محمد صالح شێخموس ئه‌حمد)ه‌ هونه‌رمه‌ندێ ئه‌فسانه‌ی و ستێرا ئاسمانێ كوردی ژدایك بوویه‌ ل سالا 1948 ل گوندێ كرباوێ ب دووریا (10كم) ژ باژێرێ قامشلۆ و بناڤ و ده‌نگ بوویه‌ ل سالێن هه‌فتیا ژ جه‌رخێ بووری ب سترانێن خوه‌ یێن نه‌ته‌وایه‌تی و تێدا ئێش و ئازارێن ملله‌تێ كورد دیاردكه‌ت. هه‌رجه‌نده‌ ئه‌و جڤاكێ لێ مه‌زن بووی ستران گوتن نه‌ یا ب ره‌واج بوو لێ ئه‌و هه‌ر یێ به‌رده‌وام بوو ل سه‌ر رێبازا خوه‌ و به‌رگیری كرن ژ دوَزا ره‌وا یا كوردا ،پشتگیریا و هاریكاریا وی هاته‌ كرن ژ لایێ كه‌س و كارێن وی وه‌ كو بابێ وی و هه‌روه‌سا مامێ وی رابوو ب دروستكرنا ته‌مبوره‌كێ بۆ وی و گه‌له‌ك داخباربوو پێ و ئه‌ڤه‌ دبته‌ پێنگاڤه‌كا مه‌زن درێبازا هۆنه‌ری یا هونه‌رمه‌ندی دا. خواندنا خوه‌ یا سه‌ره‌تایی ل گوندێ (خچوكێ) ته‌واو كریه‌ و یا ئاماده‌یی ل قامشلۆ، ژئه‌گه‌رێ ژیانا رۆژانه‌ و بارێ ئابووری یێ گران نه‌ دشیا گه‌له‌ك كاربكه‌ت، لێ ژبه‌ركو جوتیاربوو گه‌ریا ل گه‌له‌ك گوندا و ل سالا 1969و دژیێ 20 سالی دا (خلیل ئێزدی و حسن تۆفۆ ) ناسكرن و یه‌كه‌مین تێكستێت وان ل وان ئاهه‌نگ و داوه‌ ت و شه‌هیانا گوتن ئه‌وێن ل گوندێن قامشلۆ دهاتنه‌ گێران و گه‌له‌ك جاری ده‌ستهه‌لاتین سووری نه‌ دهێلا كاربكه‌ت ژبه‌ر سترانێن وی یێن نه‌ته‌وایه‌تی. ل سالا 1970 جاره‌كادی زڤریه‌ گوندێ زارۆكینیا خوه‌ لێ ڤێجارێ گه‌له‌ك لێ نه‌ما ژبه‌ركو قه‌ستا به‌یروتێ كر ب مه‌ره‌ما خواندنا مۆزیكێ و بوو ئه‌ندام ل گروَپه‌كێ موزیكێ ب ناڤێ سه‌ركه‌وتن ل گه‌ل (سعید یوسف و محمد عزیز شاكر و ره‌مه‌زان نجم ئومه‌ری )و جه‌ند ئاهه‌نگ گێران یا ئێكێ 24/3/1971بوو. ئێك ژ وان ئاهه‌نگا سه‌رۆك وه‌زیرێ لبنانێ ئامادبوو(صائب سلام) گه‌له‌ك داخباربوو ب ده‌نگێ هونه‌رمه‌ندێ نه‌مر، هه‌روه‌سا هونه‌رمه‌ندا لبنانی (سمیره‌ توفیق) داخواز ژێ كر كو بیبته‌ ئه‌ندام ل تیپا وێ یا مۆزیكێ چنكو محمد شێخۆ ب خوه‌ ماموستایێ مۆزیكێ بوو. ل سالا 1973 لبنان بجێهشت و به‌ره‌ڤ كوردستانا عێراقێ ڤه‌ چوو و جێگیربوو ل باژێرێ كه‌ركوكێ و پاشی به‌غدایێ و ل رادیوَیا به‌شێ كوردی كاركر و جه‌ند ستران تۆماركرن هنگی، هه‌روه‌سا ل وی ده‌می شیا ده‌سته‌كا هونه‌رمه‌ندێن كورد بنیاسیت وه‌كو (محمد عارف و شمال صائب و تحسین تاها و گول بهار و بشار زاخوَیی ) ل ماوه‌یێ ژیانا وی ل عێراقێ هونه‌رمه‌ندی سه‌ردانا سه‌رۆك مه‌لا مسته‌فا بارزانی كر. سه‌رۆكی ژی ژبه‌ر وه‌ك پێشمه‌رگه‌ و سترانێن وی یێن نه‌ته‌وایه‌تی گه‌له‌ك رێز و بها لێ گرت و چه‌ند خه‌لات پێشكه‌شی وی كرن وه‌كی شانازی و پاداشت ژ وانا ئالا كوردستانا ره‌نگین پێ به‌خشی. سترانه‌ك ل سه‌ر بارزانیێ نه‌مر گوت( كێ دنیا هه‌ژاند.. . )كو تێدا به‌حسێ رۆلێ بارزانیێ نه‌مر دكه‌ت و خه‌بات و بزاڤا وی سه‌باره‌ت دۆزا گه‌لێ كورد و هونه‌رمه‌ند ل ناڤ رێزین پێشمه‌رگه‌ی دمینت هه‌تا سالا 1975 خیانه‌تكاریا جزائیر بۆ سه‌ر كۆتكرنا شوَڕه‌شا كوردی هونه‌رمه‌ند ل گه‌ل پێشمه‌رگه‌ی به‌ره‌ڤ كوردستانا ئیرانێ كۆچبه‌ر دبت و ل وێده‌رێ ژی تیپه‌ك دروستكر و ئێك ژ به‌رهه‌مێن خوه‌ یێن هونه‌ری یێن هه‌ره‌ گرنگ ئه‌نجام دا (ئای فه‌له‌ك.. ) بوو ژ په‌یڤێن هۆزانڤانێ مه‌زن به‌درخان سندی و ئاوازا وی بخوه‌بوو. ل كوردستانا ئیرانێ كچه‌كێ ناس دكه‌ت بناڤێ(نه‌سرین حسین) كچا ئێك ژ پێشمه‌رگه‌ێن كۆمارا مهاباد بوو، نه‌سرین دبیته‌ قوتابیا وی و هونه‌رمه‌ند دبیته‌ دلدارێ وێ و ئه‌و ژی دبته‌ ئه‌ڤیندارا وی دبیت و گه‌له‌ك حه‌ژێ دكه‌ت و سترانا بناڤ و ده‌نگ دبێژت (ده‌مێ من تو دیتی نسرین.. . )، ژیانا هه‌ڤژینیێ ل گه‌ل نه‌سرینێ پێك دئینیت و خودێ چار زاروَكا دده‌ته‌ وان (فه‌له‌ك و ئبراهیم و بروَسك و ئیك چوو به‌ردلۆڤانیا خودێ بناڤێ بێكه‌س) و ل سالا 1983 زڤریه‌ سووریا و ل وێده‌رێ تیپه‌كا موزیكێ دامه‌زراند، وانێن موزیكێ ددانه‌ وان ل باژێرێ قامشلۆ. ل سالا 1987 تۆمارگه‌هه‌ك ڤه‌كر ب ناڤێ فه‌له‌ك و جاره‌كا دی ده‌ستهه‌لاتێن سووری ده‌ستێوه‌ردان ل كاری وی كر و قه‌ده‌غه‌كر ژبه‌ر سترانێن وی یێن نه‌ته‌وایه‌تی و شۆڕه‌شگێری، پشتی هنگی ده‌م ل ده‌ست تووشی نه‌خۆشیاكا گران دبت و ل به‌روارا 9 ئادارێ سالا 1989 خاترا خوه‌ ژ گه‌ل و كوردستانا خوه‌ و هونه‌ری خواست بیێ كو ئازادیا كوردستانێ ببینیت. بۆ دوماهیك جار بۆ هه‌تا هه‌تایێ ل همبێزا ئاخا كوردستانێ هاته‌ سپارتن ل باژێرێ قامشلوَ ب ئاماده‌ بوونا ژماره‌كا زۆر ژ حه‌ژێكه‌رێن وی ژ هه‌ موو چین و ته‌خا و ل به‌ر ئاوازێ سترانا وی یا بناڤ و ده‌نگ و وه‌سیه‌تا وی ( گاڤا ئه‌ز مرم گه‌لی زێندیا، من نه‌ ڤه‌ شێرن وه‌كو هه‌میا. .. هه‌می ئادارا هون من هشیاركه‌ن. .. ) هونه‌رمه‌ندێ خودێ ژێ رازی ل پشت خۆ هیلان ب سه‌دان سترانێن نه‌ته‌وایه‌تی و ئه‌ڤینی و وه‌سیه‌تا وی ئه‌وه‌ ئه‌م وی هشیاركه‌ین ل هه‌موو ئادارا لێ ئه‌و بخوه‌ هه‌ر یێ ساخه‌ د ناڤ خه‌بات و بزاڤا مه‌ دا و د ناڤ هۆزان و سترانێن مه‌ دا، د ناڤ دل و دمار و خوونا مه‌ دا خودێ ته‌ ب به‌هشتا خوه‌ شاد بكه‌ت بابێ فه‌له‌كێ.. .

کۆمێنتا تە