هونەرمەند ل هەموو وەلاتێن جیهانێ سەركێشن
بێوار حەمدی:
سترانبێژ (عەلی زەینەل) كو ب (عەلی جان) دهێتە نیاسین، د دیدارەكێ دا بۆ رۆژناما ئەڤرۆ گۆت: ل ژیێ نەه سالیێ من دەست ب سترانگۆتنێ كریە و هەتا نوكە من سێ ئەلبۆمێن سترانان و دەه كلیپ بەلاڤكرینە، كلیپا من یا ئێكێ ژی ب ناڤێ (نازدارێ) بوویە كو سالا 1998 هاتبوو تۆماركرن و ئەز ب وێ كلیپێ بەرنیاس بووم، نوكە ژی دو سترانێن نوو ل بەر دەستێ منن، مۆزیك ب دووماهی هاتیە و ل نێزیك دێ دەنگێ خوە تۆماركەم و بەلاڤ كەم.
هەروەسا گۆت: ل هەموو وەلاتێن جیهانێ هونەرمەند سەركێشن بۆ بەلاڤكرنا ناڤێ وەلاتێ خوە، هەروەسا كلتۆرێ خوە، لێ ب مخابنی ڤە ل هەرێما كوردستانێ ئەڤ چەندە نینە و هونەرمەند هاتینە پشتگوهخستن، ئانكو گرنگی پێ ناهێتە دان.
