هێتۆیێ گاڤان و بازاڕێ دره‌وان

هێتۆیێ گاڤان و بازاڕێ دره‌وان

8

كورته‌ چیرۆك

ته‌حسین ناڤشكی

كاملانا بهارێ یه‌، ل گه‌ل ئاوازێن چووچكان و بێهنا گول و كولیلكان، هێتۆیێ گاڤان ل بانیكا سه‌رشكه‌فتێ،  یێ گاڕانا گوندی دچه‌رینت. دیمه‌نێ رۆژانه‌ دوباره‌ دبت گوهدرێژێ مه‌لای و گوهدرێژێ مختاری هه‌رده‌م لێك دكه‌ڤن و ره‌وشا گاڕانێ تێك دده‌ن و وی گه‌له‌ك دوه‌ستینن و بێ زاڕ دكه‌ن، ئاڕیشه‌ ئه‌وه‌ نه‌ هێتۆیێ گاڤان دوێرت بێژته‌ مه‌لای و مختاری كه‌رێن خوه‌ نه‌ به‌ردنه‌ گاڕانێ، نه‌ چێل و گۆلان ئه‌و ئاقل و شیان هه‌نه‌ خوه‌ بكه‌نه‌ ئێك و هه‌ردو گوهدرێژان ژ ناڤ گاڕانێ بكه‌نه‌ ده‌رێ.

*

وه‌سا دیاربوو ل وێ ڕۆژێ هه‌ردو گوهدرێژ پتر حه‌شه‌ری و حێچ ببوون… گه‌رما شه‌ڕێ وان ده‌مه‌كی گاڕان ته‌ڕا به‌ڕا كر و ئێدی ده‌ستهه‌لاتا گاڤانی ژی ل سه‌ر كۆمڤه‌كرنا وێ لاواز بوو. گاڤانی دیت گوهدرێژه‌ك ژ وان د گه‌رما شه‌ڕی دا ره‌ڤی و ژ وێ كه‌لێ ده‌ڤێ خوه‌ د به‌ر رانێ چێله‌كێ را بر و عوڕێن ژێ هینا و چێلا بریندار ل دووڤ سه‌رێ خوه‌ ره‌ڤی و د ڕزدێ دا فڕی و ژ وێ بلنداهیێ ب به‌ر ده‌رێ شكه‌فتا هه‌می فه‌رش و كه‌ڤرێن مه‌زن كه‌ت!

گاڤان ب له‌ز و به‌ز گه‌هشته‌ بنێ رزدێ و دبینت چێلا د خوینێ وه‌ربووی و ده‌ست و لنگێن وێ شكه‌ستینه‌ و چه‌قۆیا خوه‌ هیناده‌ر و بزاڤا سه‌رژێكرنا وێ كر، لێ چه‌قۆیا وی نه‌شیا ستۆیێ چێلا هه‌ر دگاڤێ بێ لڤین بووی ببڕت.

*

پشتی گاڤان ب ترس و له‌رزك زڤڕی گوندی و ل مالا مه‌لای روودان ب هووری بۆ گوهداران ڤه‌گێڕای، پتریا وان تیق تیق پێ كه‌نین و ئه‌و ب دره‌وین ل قه‌لم دا.. پاشی ده‌نگێ مه‌لای دا سه‌ر هه‌موو ده‌نگان و گۆت:

_دڤیا، وان هه‌ردو گوهدرێژان گاڤانی ل ته‌ كربا. چونكی ده‌ركه‌ت گوهدرێژێ مه‌زن توی! هههههههه.. دا بێژی گورگی لنگێ وێ دڕاند و د كه‌ڤری دا هاڤێت، دا مه‌ باوه‌ر كربا، هه‌ما تو ب خوه‌ بێژه‌ زارۆكێ ساڤاژی، هه‌كه‌ باوه‌ر كر گوهدرێژ دێ ڕانێ چێلێ له‌قده‌ت و د كه‌ڤری دا هاڤێت باوه‌ر ناكه‌ت!

هێتۆیێ گاڤان ل چاڤێن وانێن ئێك ئاواز دبێژن نێڕی و گۆت:

_ئانكو ئیللا مرۆڤ دره‌وان بكه‌ت، هه‌تا هوین باوه‌ر بكه‌ن؟

مه‌لای ده‌نگێ خوه‌ بلندتر لێ كر و بڕیارا دای:

_نها ته‌ خوه‌ سووچدار كر، ب دو گوننه‌هان بهێیه‌ دادگه‌هكرن، یا ئێكێ ته‌ دره‌وا كری، یا دووێ ته‌ خه‌مساریا كری، كو گورك چێلێ بگرت و د رزدێ دا بهاڤێژت. سزا ژی ئه‌وه‌، دێ دو سالان گاڤانیا گوندی بێ به‌رامبه‌ر كی، یا دووێ، دێ پاره‌یێ چێلێ ژی ده‌یه‌ خودانی كو تو بوویه‌ ئه‌گه‌رێ مرار بوونا چێلا جامێری.

هێتۆیێ گاڤان كه‌نیا خوه‌ به‌ردا و پاشی گۆت:

_ئه‌زبه‌نی هێشتا ئه‌ز نه‌گه‌هشتیمه‌ مافێ خوه‌، هه‌كه‌ چو بازاڕ ژ بازارێ دره‌وان ساناهیتر نینه‌.

 

کۆمێنتا تە