هێزێن مە د چارچۆڤێ شەڕێ ل دژی تیرۆرێ دا دێ ل سووریێ مینن
وەزارەتا دەرڤە یا ئەمریکا راگەهاند، هێزێن وان د چارچۆڤێ شەرێ ل دژی تیرۆرێ دا ل سووریێ نە، ب تایبەتی ژی نها ل باکورێ سووریێ ئێرش ل سەر هێزێن ئەمریکا هەنە، ژ بەر ڤێ یەکێ ژی هەتا مەترسیا تیرۆرێ ل سووریێ هەبیت هێزێن ئەمریکا ژی دێ ل باکورێ سووریێ مینن و دێ هەماهەنگیا ل گەل هێزێن سووریا دیموکرات ژی بەردەوام بیت.
وەزارەتا دەرڤە یا ئەمریکا د داخۆیانیەکێ دا راگەهاند، نها رەوشا رۆژهەلاتا ناڤین گەلەک یا ئالۆزە و ب تایبەتی ژی ل ئیراقێ و سووریێ بەردەوام ئێرش ل سەر هێزێن ئەمریکا هەنە، ل سووریێ ژ داعشێ دڤێت مفای ژ رەوشا نها یا ئالۆز وەربگریت و جارەکا دی دەست ب کریارێن تیرۆرستی بکەت، ژ بەر ڤێ یەکێ ژی د چارچۆڤێ شەرێ ل دژی تیرۆرێ دا هێزێن ئەمریکا دێ ل سووریێ مینن و دێ شەرێ ل دژی تیرۆرێ ژی ب دژواری بەردەوام بیت.
وەزارەتا دەرڤە یا ئەمریکا ئەو یەک ژی دیار کریە، پشتێ شەرێ ڤێ دووماهیێ د ناڤبەرا ئسرائیلێ و حەماسێ دا، رەوشا رۆژهەلاتا ناڤین یا ئالۆز بوویە ب تایبەتی ژی ل سووریێ داعش و رێکخستنێن دی یێن تیرۆرستی یێ بزاڤا هندێ دکەن مفای ژ رەوشا ئالۆز وەربگریت و دەست ب کریارێن تیرۆرستی بکەن، ژ بەر ڤێ یەکێ ژی هێزێن ئەمریکا دێ ل سووریێ مینن و دێ هەماهەنگیا د ناڤبەرا هێزێن ئەمریکا ل گەل هێزێن سووریا دیموکرات ژی د چارچۆڤێ شەرێ ل دژی داعشێ دا دێ بەردەوام بیت.
ئەو یەک د دەمەکێ دایە کو بەری نها هژمارەک ژ سیناتۆرێن ئەمریکا داخواز کربوون ئەمریکا پێگەهێ خوە ل سووریێ بهێزتر بکەت و ب توندی ژی بەرسڤا ئێرشێن هێزێن سەر ب ئیرانێ بدەت، چونکی رەوشا نها د بەرژەوەندیا ئەمریکا دا نینە، هەکە ئەمریکا ب توندی بەرسڤا ئێرشێن هێزێن سەر ب ئیرانێ نەدەت ئەو یەک دێ وەسا کەت دۆست و هەڤپەیمانێن ئەمریکا هەست ب دلگرانیێ بکەن، ژ بەر ڤێ یەکێ ژی گەلەک یا گرنگە ئەمریکا د دەمێ خوە دا و ب توندی بەرسڤا هەر ئێرشەکێ بدەت.
چاڤدێرێن سیاسی ژی دیار دکەن، هەبوونا هێزێن ئەمریکا ل سووریێ د بەرژەوەندیا کوردان دایە، چونکی هەتا هێزێن ئەمریکا ل سووریێ بمینن، نە تورکیا و نە ژی رژێما سووریێ نەشێن ئێرشی رۆژئاڤایێ کوردستانێ بکەن، لێ هەکە هێزێن ئەمریکا ژ رۆژئاڤایێ کوردستانێ بچن وی دەمی دێ رەوشەکا نوو هێتە پێش کو ب چو رەنگەکێ د بەرژەوەندیا کوردێن رۆژئاڤایێ کوردستانێ دا نابیت.
