هەكە هەڤڕكی ل سەر بنەمایەكێ نەرێنی بیت ئاریشەیە
بێوار حەمدی:
تێگەهێ هەڤڕكیێ ژ كەڤندا هاتیە بكارئینان دناڤ پتریا تەخ و چینێن مرۆڤاندا، ئەڤە ژی ل سەر خالێن بهێز و لاواز یێن هەڤڕكی و شارەزاییا مرۆڤی د راوەستیت، بسپورەكێ جڤاكی ژی گۆت: هەڤڕكی ژ ئەنجامێ هەبونا پاڵدەرێ حەز و ڤیانێ بۆ خو دیتن و بهێزكرنێ لدەڤ تاكێن جڤاكی و كومەلێن مرۆڤان پەیدا بوویە .
ئیسماعیل عەبدوللا، ڤەكولەرێ دەروونی و بسپورێ جڤاكی د دیدارەكێ دا بۆ رۆژناما ئەڤرۆ دیار كر كو تێگەهێ هەڤڕكیێ ژ ئەنجامێ هەبوونا پاڵدەرێ حەز و ڤیانێ بۆ خۆ بلند دیتنێ و بهێز كرنێ ل دەڤ تاك و كومەلێن مرۆڤان پەیدا بوویە و هەموو هێز و شیانێن خۆ بكاردئینن بۆ وان مەرەمێن نەخشە بۆ دانای.
ڤەكۆلەری گۆت: (مە گەلەك رەنگ و شێوازێن هەڤڕكیێ هەنە كو دهێنە جێبەجێكرن دناڤ ژیانا مرۆڤی و هەموو تەخ وچینان دا، ئەڤجا چ ب شێوەیەكێ ئەرێنی بیت یان نەرێنی).
ڤەكولەرێ دەروونی و بسپورێ جڤاكی د بەردەوامیا ئاخفتنا خۆدا دیار كر، تێگەهێ هەڤڕكیێ هەر د كەڤندا یێ هاتیە بكارئینان دناڤ هەموو تەخ و چینا و ل سەر وان خالێن ب هێز و لاواز یێن هەڤڕكی ل سەر هاتیە كرن.
ئیسماعیل گۆتژی: (مە دو جورێن هەڤڕكیێ هەنە، یا ئەرێنی و یا نەرێنی، دەمێ هەڤڕكی ل سەر بنەمایەكێ ئەرێنی بیت ئاریشە نینە و یا درستە، بەلێ هەكە هەڤڕكی ل سەر بنەمایەكێ خەلەت بیت ئاریشەیە، ژ نموونێن هەڤڕكیا ئەرێنی وەكو هەڤڕكی دناڤبەرا دو بازرگانان دا، هەڤڕكیا سیاسی دناڤبەرا پارتان دا، دناڤبەرا دو قوتابیان دا ل سەر وەرگرتنا نمرێن بلند، دناڤبەرا كومپانیان دا ل سەر كۆاڵێتیا بەرهەمی، دناڤبەرا رێكخراوێن خێرخوازی، دناڤبەرا دو دەزگەهێن ڕاگەهاندنێ ل سەر راكێشانا سەرنج و باوەریا جەماوەری و…).
ڤەكۆلەری ئەو چەندە ژی دیار كر كو هەڤڕكیا نەرێنی ژی گەلەك جور و نموونە هەنە و كارتێكرنا خۆ هەیە وەكو هەڤڕكی دناڤبەرا دو گەنجان دا بۆ ب دەستڤەئینانا كچەكێ، هەڤڕكی دناڤبەرا دو شوفێران دا ل نیڤا باژێری، دناڤبەرا دو ئافرەتان ل سەر گوهوڕینا سەر و سیمایێ خۆ، دیسان هەڤڕكیا شەرو نەخۆشیان و تۆڵڤەكرنێ و …).
ڤەكۆلەر دیار كر ژی، جڤاكێ كوردی جڤاكەكێ خودان ڕەوشت و بیر و باوەرە و خودان كەلتورێ خۆ یێ ڕەسەنە، جڤاكێ مە وەكو دیار ژ سێ تەخ و چینان پێكهاتیە (تەخا كرێكارا، تەخا سەرمایەدارا، تەخا دەستهەڵاتدارا) و گۆت: (هەلبەت هەبوونا ڤان تەخان دێ بیتە ئەگەرێ دووراتیەكا ئابوری و دەروونی و جڤاكی دناڤبەرا تاكان دا، لەوما ژی د نوكەدا هەڤڕكیا نەرێنی د جڤاكێ كوردی دا د زێدەبونێ دایە).
