وەزارەتا ساخلەمیێ دێ دووڤچوونا نەخۆشبوونا ب كۆم یا خەلكێ دینارتە كەت
رەمەزان زەكەریا
دەمێ چەند رۆژانە خەلكێ سەنتەرێ ناوچەداریا دینارتە ل سنوورێ دەڤەرداریا ئاكرێ ب كۆم تووشی حالەتێن زكچوونێ دبن و رۆژانە هەتا نێزیكی 100 كەس دهێنە تۆماركرن، بۆ ڤێ مەرەمێ چەندین لیژنە هاتینە پێكئینان و چەندین بریار هاتینە دان بۆ بەرژوەوەندیا نەخۆشان.
دلشاد دەروێش، موختارێ ناوچەداریا دینارتە بۆ ئەڤرۆ گۆت: دەمێ چەندین رۆژە چەندین حالەتێن ب كۆم یێن دل رابوون و زكچوونێ ل دینارتە هاتینە تۆماركرن، بۆ ڤێ مەرەمێ دگەل رێڤەبەریا ساخلەمیا ئاكرێ ل سەر خەتین چەندین پێدڤی بۆ نەخۆشخانێ دابینكرینە، بەلێ هەتا نوكە ئەگەرێ ڤێ نەخۆشیا تووشی خەلكێ دینارتە بووی دیار نینە كا ژ چو دروست بوویە.
موختاری گۆتژی: دو تیم ل ئاكرێ و دهۆك هاتینە بۆ ڤەدیتنا چارەسەریەكا بلەز بۆ ڤێ نەخۆشیێ و چەندین سمپل هاتینە وەرگرتن، خەلك یێ ئاڤێ دكریت بۆ ڤەخوارنێ دیار نینە، ئەڤ نەخۆشیە ژ ئاڤێ یان خوارنێ دروستبوویە، بۆ ڤێ مەرەمێ مە ئەڤ بابەتە گەهاندیە وەزیرێ ساخلەمیێ ل حوكمەتا هەرێما كوردستانێ، ئاریشا سەرەكی ئەوە هەر كەسێ قەستا نوژدارەكێ بكەت خەرجیەكا زۆر دكەت، بەلێ پشتی من پەیوەندی ب وەزیرێ ساخلەمیێ ڤەكری بریار هاتیە دان دەواما نەخۆشخانا دینارتە بهێتە درێژكرن، هەتا شەشێ ئێڤارێ پێشتر هەتا 12 ێ نیڤرۆ بوو، رێژا تووشبوونێ بەرەڤ زێدەبوونێ ڤە چوویە و گەهشتینە 400 كەسان.
سەربەست سەبری ئاكرەیی، ناوچەدارێ دینارتە ب وەكالەت بۆ ئەڤرۆ گۆت: رۆژا پێنجشەمبیا حەفتیا بووری ل سەنتەرێ ناوچەداریا دینارتە نەخۆشیەك بەلاڤبوویە و رێژەكا زۆر ژ خەلكی تووشی زكچوونێ و دل رابوونێ بووینە، بەلێ هەموو ب سەلامەتن.
ناڤهاتی گۆت ژی: پشتی تۆماركرنا چەندین حالەتێن زكچوونێ و دل رابوونێ ئێكسەر مە رێڤەبەریا ساخلەمیا ئاكرێ ئاگەهداركر ل دوور بابەتی تیمەكا بسپۆر رەوانەی دینارتە كر بۆ دووڤچوونا بابەتی سمپلێن ئاڤێ هاتینە وەرگرت هەتا نوكە ئەنجام نەهاتینە دیاركرن، رێڤەبەریا ئاڤا ئاكرێ ژی هاتیە سەرخەت سمپل وەرگرتینە ئەم چاڤەرێ ئەنجامێن سمپلێن ئاڤێ دكەین.
ئاشكرا كر: هەتا نوكە دیار نینە ئەگەرێ تووشبوونا ڤان نەخۆشا چیە، هەتا 340 كەسا تووشی زكچوون و دل رابوونێ بوون، بەلێ نوكە رێژە كێم بوویە و دوهی ب تنێ 96 كەس هاتینە تۆماركرن و كۆنترۆلا ئاڤێ ژی هاتیە كرن، بەریا نوكە هندەك رۆژا هەتا 150 كەسا تووشبووینە.
ناڤبری گۆت: تیمەك ژ پارێزگەها دهۆكێ سەرەدانا دینارتە كریە بۆ زانینا ڤێ جۆرە نەخۆشیێ، رێڤەبەریا ساخلەمیا ئاكرێ دەرمانێن پێدڤی دابینكرینە، ئەو كەسێن تووشبووین ل ژیێ دو سالیێ هەتا 60 سالیێی نە و ئەڤ نەخۆشیە یا ڤەگرە ئەگەر كەسەك توشبوو دهێتە ڤەگوهاستن بۆ كەسێن دی.
