وەهبی سلێمان: خەونا منە ببمە ئێك ژ باشترینێن ئاسیا
دهێتە چاڤەڕێ كرن ل دەستپێكا هەیڤا بهێت هەردو كوڕێن پارێزگەهێ و یاریزانێن هەلبژارتیێ ئیراقێ وەهبی سلێمان و سەربەست عەبدوللا پشكداری كۆپا ئاسیا یا یارییا پایسكلان بكەن ئەوا دێ ل وەلاتێ كازاخستان بۆ چار ئاستێن جودا هێتە كرن.
لدۆر ڤێ قارەمانیێ وەهبی سلێمان ئێك ژ یاریزانێن پارێزگەها دهۆكێ و هەلبژارتیێ ئۆلمپیێ ئیراقی گەشبینییا خوە دیار كر ب دەستڤە ئینانا ئەنجامەكێ باش د قارەمانییا كۆپا ئاسیا و گۆت: ئەڤە بۆ ماوەیێ دو مەهە راهێنانێن خوە ئەنجامدەین دگەل پشكداریا مە د هەڤڕكیێن قۆناغا دویێ یا خولا ئیراقێ دا، ئەڤە بۆ ماوەیێ 13 رۆژ بووی ل كەمپەكێ راهێنانێ ل باژێرێ سلێمانیێ هاتبوو دانان دیسان دێ كەمپەكێ دی ژی كەین بەر بچینە وەلاتێ كازاخستانێ و پشكداری قارەمانیێ بكەین ئەوا ل شەشێ خزیرانا بهێت دەستپێبكەت.
هەروەسان ناڤهاتی گۆت: وەكو كوردەك و خەلكێ باژێرێ دهۆكێ كەیفخوەشم دگەل هەلبژارتیێ ئیراقێ پشكداری ئێك ژ مەزنترین قارەمانیێن ئاسیا بكەم، ژبەركو قارەمانیەكا ب هێزە و باشترین یاریزانێن ئاسیا پشكدارن ودێ بیتە مەزنترین هەڤڕكی ل سەر ئاستێ كێشوەری ئاسیا، گەشبینم هەڤڕكیێ بكەم هەتا دووماهی چڕكە و ب گەهمە ئارمانجا خوە ئەو ژی رێزێن ئێكێ هەتا سێیێ بینن و خەونا من ئەوە ببمە ئێك ژ باشترین یاریزانێن ئاسیا سەرباری ئەركێ من ب سانەهی نابیت لێ رژدین بۆ ئەڤێ ئارمانجێ.
