پارێزگارێ دهۆكێ: ئەم دخوازین بانگەشەیا هەلبژارتنان ب ئارامی و دوور ژ پێشێلكاریان ب رێڤە بچیت
پارێزگارێ دهۆكێ دیار كر، هەژمارەكا بەربژاران ژ ئەگەرێ بنپێكرنا رێنومایێن كۆمسیۆنێ ل دەمێ بانگەشا هەلبژارتنێن پەرلەمانێ كوردستانێ، هاتینە سزادان.
د. عەلی تەتەر، پارێزگارێ دهۆكێ د كۆنگرەكێ رۆژنامەڤانی دا گۆت: «هەژمارەكا بەربژاران ژ لایێ لقێ دهۆكێ یێ كۆمسیۆنا هەلبژارتنێن ئیراقێ ڤە هاتینە سزادان، ژ بەركو ب شێوەكێ نە یاسایی پۆستەرێن خۆ بۆ بانگەشا هەلبژارتنان ل سەر جادان دانابوون و رێیا هاتنوچوونا وەلاتییان گرتبوو، هەروەسا لژنەكا تایبەت ب هەماهەنگی ل گەل لقێ دهۆكێ یێ كۆمسیۆنا هەلبژارتنێن ئیراقێ، ب مەرەما دووڤچوونێ بۆ كەڤتن و دراندن و شێواندنا پۆستەرێن بەربژاران ل سنوورێ پارێزگەها دهۆكێ پێكئینایە و هەر كەسێ سەرپێچییان بكەت و هەر كی بیت، دێ هێتە سزادان».
د. عەلی تەتەر گۆتژی: «وەكو حوكمەت، ئیدارا پارێزگەها دهۆكێ و لژنا ئەمنی یا سەرپەرشتییا پرۆسا هەلبژارتنان ل سنوورێ پارێزگەها دهۆكێ، دخوازین بانگەشە ب رەنگەكێ مەدەنی، شارستانی، دیموكراتییانە، ئارام و دوور ژ پێشێلكارییان برێڤە بچیت، هەروەسا سەركەڤتنا سەرەكی و مەزن، سەركەڤتنا پرۆسێسا هەلبژارتنایە، نەكو هەر لایەنەك چەند كورسییان ب دەستڤە د ئینیت».
