پارێزگەرێ دهۆكێ: ئەڤە مەیدان بۆ هەوە نڤیسەران و ئەم دێ پشتەڤان بین
شاكر ئەتروشی:
ب چاڤدێری و ئامادەبوونا د. عەلی تەتەر، پارێزگەرێ دهۆكێ و ب هەلكەفتا بۆرینا 54 سالان ل سەر دامەزراندنا ئێكەتیا نڤیسەرێن گشتی، دوهی ئێڤاری 11/2/2024 ل هولا ئێكەتیا نڤیسەرێن كورد/تایێ دهۆكێ چالاكیەك هاتە گێڕان و ژ دو بڕگان پێك دهات، یا ئێكێ: ڤەكرنا پێشانگەهەكا پۆرترێتی بۆ (18) نڤیسەرێن وەغەركری، كو وێنەیێن وان ژ لایێ هونەرمەندێ خودێ ژێرازی (ستار عەلی و فەهمی بالایی) ڤە هاتبوونە چێكرن، برگا دویێ ژی: ئێڤاریەكا هەلبەستخواندنێ بۆ هەژمارەكا هەلبەستڤانێن گەنج هاتە گێڕان و هەلبەستێن خوە ل گەل دەنگێ مۆزیكێ، كو ژ لایێ هونەرمەند (بێكەس نوری) دهاتە ژەنین، هاتنە خواندن.
د.عەلی تەتەر، پارێزگەرێ دهۆكێ د پەیڤەكێ دا پیرۆزباهی ل هەموو نڤیسەران كر و دیار كر كو ئەو وەكو حوكمەتا هەرێما كوردستنانێ دێ د بەردەوام بن ل سەر پشتەڤانیكرنا نڤیسەران و بەرهەمێن وان و گۆت: «ئەڤە مەیدان بۆ هەوە نڤیسەران و پشتەڤانی ژی ژ مە».
حەسەن سلێڤانەیی، سەرۆكێ ئێكەتیا نڤیسەرێن كورد/ تایێ دهۆكێ د پەیڤا دەستپێكێ دا ئاماژە دا وان چالاكیێن ژ لایێ وانڤە دهێنە ئەنجامدان و گۆت: «مە ل بەرە ل دەستپێكا مەها ئادارێ فەستیڤالا نەورۆزێ بگێڕین، هەروەسا هەر نوكە ئامادەكاری بۆ ئەنجامدانا فەستیڤالا دهۆك یا رەوشەنبیری یێن دهێنە كرن».
