پایسكلڤانێن پارێزگەهێ دێ پشكداری قارەمانییا ئسپانیا یا نێڤدەولەتی بن
د داخویانیەكێ دا راهێنەرێ تیما یانەیا دهۆك و هەلبژارتیێ ئیراقێ بۆ یارییا پایسكلان دیار كر سێ پایسكلڤانێن پارێزگەها دهۆكێ بەرهەڤیان دكەت بۆ قارەمانییا ئسپانیا یا نێڤدەولەتی ئەوا بڕیارە هەڤڕكیێن وێ ل دەستپێكا كانوونا ئێكێ یا ئەڤ سالە ل مەدرید پایتەختێ ئسپانیا بهێتە كرن.
زێدەتر تارق سەعید گۆت: پشتی هەلوەشاندنا هەڤڕكیێن قارەمانییا عەرەبی یا یارییا پایسكلان ئەوا بڕیار بوو ل ناڤەڕاستا چریا دویی یا بهێت باژێرێ سلێمانیێ مێڤاندارییا وێ بكەت، فدراسیۆنا پایسكلڤانێن ئیراقێ بڕیاردا ل سەر ئاستێن جودا هەلبژارتیێ ئیراقێ پشكداریێ د قارەمانییا ئسپانیا یا نێڤدەولەتی یا ڤەكری دا بكەن ئەوا بڕیارە ل دەستپێكا كانوونا ئێكێ یا بهێت ل پایتەختێ ئسپانییا مەدرید بهێتە كرن و دناڤا پشكداریێن وێ قارەمانیێ دا سێ یاریزانێن خەلكێ پارێزگەها دهۆكێ دێ پشكدارن و دنوكە دا بەرهەڤییان دكەن بۆ قارەمانیێ.
ژلایەكێ دووڤە ناڤهاتی ئەو چەندە ژی گۆت: هەرچەندە ل سەر ئاستێ ئیراقێ تازەپێگەهشتیێن یانەیا دهۆكێ تاكە یاریزانێن ب كۆم ل سەر ئاستێ یانەیان شیاینە پێكهاتیێ ئیراقێ وەربگرن و ئەڤچەندە ژی ب سانەهی نینە هەتا بگەهنە ڤێ قۆناغێ، كارەكێ مەزن بۆ هاتییە كرن ب پشتەڤانییا كارگێرییا یانەیێ ب سەرپەرشتییا هشیار فەریق و مۆرالا بلند یا یاریزانان و مە شیان و شارەزاهی هەبووینە بۆ پێشئێخستنا ئاستێ یاریزانان بەرهەڤ كربوو، هەروەسان ئەڤە ژی ئاماژە ب وێ یەكێ كو هەردەمێ پشتەڤانی بۆ مە هەبیت نە بتنێ ل سەر ئاستێ تازەپێگەهشتییان بەلكو یێن لاوان و پێشكەفتیان ژی دێ ئاست و ئەنجامێن مەزن هەبن و دێ كۆنترۆلا هەلبژارتیێ ئیراقێ كەین.
ل دووماهیێ تارق سەعید گۆت: د نوكە دا ئەم یێ دكەمپێ راهێنانێ دا و ل دووڤ پلان و بەرنامەیێ دارشتی راهێنانێن جەستەیی و هونەری دهێنە كرن ل پایتەختێ ئیراقێ بەغدا دووڤدا بۆ ماوەیێ 20 رۆژێن دی دێ كەمپێ دی یێ دەرڤە هێتە دانان بەری پشكداریێ د قارەمانییا ئسپانیا دا بكەن، گەشبینم یاریزانێن دهۆكێ دێ رێزێن پێشیێ د قارەمانییا عەرەبی دا ب دەستڤە ئینن.
