پتری 150 دوكان و 20 عمباران سۆتن

پتری 150 دوكان و 20 عمباران سۆتن

6

دوهی 1/4/2024 و پشتی دەمژمێر 3:00ی بەرێ‌ سپێدێ‌ ئاگر بەربوو بازاڕێ‌ چەلێ‌ ل سەنتەرێ‌ باژێرێ‌ دهۆكێ‌ و زیانێن مەزن یێن ماددی ل دووڤ خوە دا هێلان، لێ‌ چو زیانێن گیانی نەبوون، ژبلی هندەك بریندارێن سڤك، رێڤەبەریا بەڕەڤانیا باژێری ل دهۆكێ‌ دیار كر، د ئەنجامێ‌ وێ‌ ئاگربەربوونێ‌ دا پتری 150 دوكانان و 20 عمباران هاتینە سۆتن، ب پشكداریا پتری 20 تیمان و پشتی بۆرینا نێزیكی شەش دەمژمێران شیان وی ئاگری ب تەمامی كۆنترۆل بكەن.
سەربەست لەزگین، ئەندامێ مەكتەبا سیاسی و بەرپرسێ مەكتەبا رێكخستنا پارتی ل پارێزگەها دهـۆكێ پشتی روودانا ئاگربەربوونا بازاڕێ‌ چەلێ‌ ل سەنتەرێ‌ دهۆكێ‌ و ب مەرەما ژ نێزیك هایداربوون ل سەر روودانێ‌ سەرەدانا بازارێ چەلێ كر.
بەرپرسێ مەكتەبا ڕێكخستنا پارتی ل دهۆكێ ژ نێزیكڤە هایداری زەرەر و زیانێن دوكاندار و كاسپكاران بوو، د داخویانیەكا ڕۆژنامەڤانی دا دیار كر، ب مخابنیڤە ئاگرێ چەلێ ل بازاڕێ دهۆكێ زیانێن ماددی یێن مەزن هەبوون، لێ جهێ دلخۆشیێ یە، كو زیانێن گیانی نینن و خەلك یێ ب سلامەتە.
سەربەست لەزگین، بەرپرسێ مەكتەبا ڕێكخستنا پارتی ل دهۆكێ د وێ‌ داخویانیا رۆژنامەڤانی دا گۆت: «ئەم ب هەموو دام و دەزگەهێن حكومی و حزبیڤە دێ هاریكاریا زیاندارێن ئاگرێ دهۆكێ كەین».
دیسا هەر پشتی روودانا ئاگربەربوونا بازاڕێ‌ چەلێ‌ ل سەنتەرێ‌ دهۆكێ‌ و ب مەرەما ژ نێزیك هایداربوون ل سەر روودانێ‌ دكتۆر عەلی تەتەر، پارێزگارێ‌ دهۆكێ‌ سەرەدانا جهێ روودانا ئاگربوربوونا بازاڕێ‌ چەلێ‌ كر و دیار كر، یا دشیان دا بیت بۆ زیانداران دێ‌ هێتە كرن.
دیسا هەر پشتی روودانا ئاگربەربوونا بازاڕێ‌ چەلێ‌ ل سەنتەرێ‌ دهۆكێ‌ و ب مەرەما ژ نێزیك هایداربوون ل سەر روودانێ‌ دكتۆر نەوزاد عەبدوللا، بەرپرسێ لقێ ئێك ب هەڤالینیا دەلیل رەمەزان كارگێڕێ لقێ و هەژمارەكا كادرێن پارتی گەهشتن جهێ روودانێ و سەرپەرشتیا پرۆسەیا ئاگرڤەمراندنێ كرن.
دیسا ژ لایەكێ‌ دیڤە رێڤەبەریا بەرەڤانیا باژێڕی ل پارێزگەها دهۆكێ خویا كر، ئاگرێ بازاڕێ چەلێ پشتی دەمژمێر 3:00ی بەری سپێدەهیا دوهی 1/4/2024 و گۆت: «مە پتری ٢٠ تیم پێكئینان بوون بۆ كۆنترۆلكرنا روودانا ئاگرێ‌ بازاڕێ‌ چەلێ‌ و پشتی بۆرینا نێزیكی شەش دەمژمێران، ئەم شیاین ئاگری ب تەمامی كۆنترۆل بكەین و سوپاسیا هەر ئالیەكێ پشكداری د كونترۆلكرنا ئاگرێ بازاڕێ چەلێ دا كری دكەین، دیسا روودانا ئاگربەربوونا بازاڕێ‌ چەلێ‌ ل سەنتەرێ‌ دهۆكێ‌ ل دووڤ ئامارێن دەستپێكی پتری 150 دوكانان و 20 عمباران هاتینە سۆتن و لژنە دێ هێنە پێكئینان بۆ ڤەكۆلینێ ل سەر ئەگەرێن روودانا ئاگری و خەملاندنا زینانێن پەیدابووین».
هەر ل دۆر روودانا ئاگربەربوونا بازاڕێ‌ چەلێ‌ ل سەنتەرێ‌ دهۆكێ‌ د. خەلیل غازی دۆسكی، نوونەرێ باژێرێ دهۆكێ ل جڤاتا نوونەرێن ئیراقێ ژ فراكسیۆنا پارتی دیموكراتی كوردستان ڕاگەهاند: ئەم داخوازێ‌ ژ حوكمەتا ئیراقێ دكەین، ژ بودجا روودانێن سروشتی و تەنگاڤیان خەلكێ زیاندار یێ روودانا ئاگربەربوونێ ل بازارێ چەلێ بهێنە قەرەبووكرن.

کۆمێنتا تە