پرۆژەیێن گشتی بۆ بەرژەوەندیێن تایبەت
غیاس خـالد زێباری
چ پێنەڤێن حوكمەتا هەرێما كوردستانێ هژمارەكا زۆرا پرۆژەیان د كەرتێن جوداجودا دا ئەنجامداینە و كەفتینە د خزمەتا خەلكی دا و زۆر ئاسانكاری بۆ وەلاتیان كرینە، ئەڤە ژی نیشاا دلسۆزی و خەمخۆریا حوكمەتا هەرێمێ یە، كەرتێ ئاڤێ ئێكە ژ وان كەرتێن گرنگ و پێدڤی كۆ ئاریشەیا ئاڤێ و چاندنێ دابین دكەت، سەرەرای گەشتیاریێ، چونكی كاریگەریەكا زۆرا ئەرێنی و باش دكەت سەر ڤەژاندنا ئابووری. دروستكرنا هژمارەكا بەنداڤ و گۆمبەندان ئەوێن ڤان سالان هاتینە دروستكرنا، ژ وان پرۆژەیانە ئەوێن بووینە جهێ دلخۆشیا وەلاتیان، چونكی مفایێن گشتی تێدا هەنە. لێ مخابن هندەك ئەو گۆمبەندێن حوكمەتا هەرێمێ ل سەر بۆدجێ خوە چێكری نەكەفتینە د خزمەتا وەلاتیان دا، چونكی ژلایێ كەسان هاتینە داگیركرن و دۆرماندورێن وان هاتینە پەرجانكرن و چاندن، ئێخستینە د بەرژەوەندیا خوەدا، گەهشتینە وی راددەی مەڕ و مالات ژی نەشێن قورمەكا ئاڤێ لێ ڤەبخۆت..! ئەگەر دەستهەلات هەبا وەنەدكر تەیر و تەوال ژی ئاڤێ لێ ڤەبخۆن. ئەگەر ئەو ئەردێ ل دۆرماندۆرێن وان مولكێ وان یێ تایبەت و تاپۆكری بیت؛ ئەڤە مافێ وانە و چاوا بكاردئینن، لێ ئەگەر مولكێ حوكمەتێ بیت و ب قانوونا مافێ بكارئینانێ د دەستان دا بیت و ئەڤ دەستهەلاتە دابیتێ، پێدڤی یە ئەڤ قانوونە بهێتە راستڤەكرن و دەستهەلاتەكا ب ڤی رەنگی یا زۆر نەبیت، چونكی مینا (ملك صرف) سەرەدەریێ ل گەل وی ئەردی دكەن و خەلكێ گوندی چ مفای ل وان گۆمبەندان نابینیت، ئەگەر ب ڤی رەنگی بیت پێدڤی ناكەت حوكمەت هندە خەرجیا ل ڤان گۆمبەندان بكەت، بلا خۆدانێن ئەردان ل سەر داهاتێ خوە دروست بكەن، ئەگەر قانوورنێ ئەو دەستهەلات پێ نەدابن، ئەڤە سەرپێچیە و پێدڤی یە رێك لێ بهێتەگرتن، ئەڤە نموونەیەكا بچویكە ل چەندین نموونەیان، چەنكی خەلكەك هەیە ب دەهان سالە ب سەدان دۆنەمێن ئەردێ چاندنێ یێن حوكمەتێ ب ناڤێ پێدانا مافێ بكارئینانێ ل بەردەستی و ب نیڤەیی یان سویكێ ددەتە جۆتیاران و وەكی خۆدان مولك سەرەدەریێ ل گەل دكەت، پێدڤییە پێداچوونەك ب بابەتی بهێتەكرن و ئەڤ ئەردێ حوكمەتێ بۆ بكارئینانێ ل سەر جۆتیاران بهێتە دابەشكرن و ل بەرانبەر جۆتیاركریێ بدەتە حوكمەتێ، ئەڤە دێ بیتە مفایەكێ باش بۆ هەردو ئالیان، نهۆ ژی جۆتیارێن شەهرەزا ل كوردستانێ دێ شێن داهێنانێ تێدا كەن و بەرهەمی زێدەتر بكەن، بۆ ڤی سەردەمێ قەیرانا ئابووری ل سەر كوردستانێ هاتیە سەپاندن دێ بیتە فاكتەرێ ئەرزانبوونا متای و دابینكرنا دەلیڤەیێن كاری و بارێ حوكمەتا هەرێمێ ژی دێ سڤكتر بیت.
