پێدڤییە پتر دەلیڤە ب گەنجێن مە بهێتە دان
بێوار حەمدی
نوكە ل گەلەك زانكۆیان هندەك پشكێن خواندنێ هەنە كۆ بازاڕی پێدڤی پێ نینە، لەوما دڤێت ل خواندنا بلند شۆرەشەكێ دروست بكەین دا كۆ تاكەكێ بەرهەمدار هەبیت. چاڵاكڤانەكی ژی گۆت: پێدڤی یە دەلیڤێن كاری و دادپەروەری پتر بهێنە بەرجستەكرن، بۆ هندێ گەنجی ژیانەكا ئازاد و مرۆڤ دوستی هەبیت و پتر بشێن ل وەڵاتێ خۆ بمینیت.
سیروان گەردی، سەرپەرشتێ گشتی یێ تۆرا هەماهەنگیا ڕێكخراوان CNO د دیدارەكێ دا بۆ رۆژناما ئەڤرۆ گۆت: د ڕاستیدا بابەتێ كۆچكرنێ بابەتەكێ جیهانیە و هەر بۆ وێ مەرەمێ كۆ ژیانا خۆ ژ بۆ كاركرنێ و خۆ گونجاندنێ باشتر لێ بكەت و گۆت: (ل هەرێما كۆردستانێ ژ بەر گەلەك ئەگەران گەنج كوچ دكەنە ژ دەرڤە، بەلێ پشتی ساڵا 2014 و هاتنا داعشێ ئەم دشێین بێژین كوچكرن بۆ ڕەڤین، ژ ئەگەرێ بێهیڤیبۆنێ و نەبوونا چ پاشەڕۆژان ل بەر سینگێ خۆ گەنج نەچاركرن كۆچی دەرڤەی وەلاتی بكەن).
سیروانی هێشتا گۆت: هەر چەندە چوونا ژ دەرڤە بابەتەكێ نۆرمالە، بەلێ یا نوكە چێدبیت ڕەڤینە ژ ژیانێ، لەوما یا گرنگە حكۆمەت بهێتە سەر هێل و دەرفەتێن كاری ب ڕێژەیا 75% بۆ گەنجێ ناڤخۆیی بن، چونكی ئەڤە دێ بیتە هاریكار گەنج نەچیتە ژ دەرڤەی وەڵاتی و گۆت: (نوكە ل گەلەك زانكۆیان هندەك بەشێن خواندنێ هەنە كۆ بازاری پێدڤی پێ نینە ل هەرێمێ، ژ بەر هندێ گرنگە هزرا وێ چەندێ بكەین كا چەوا ل خواندنا بلند شوڕەشەكێ دروست بكەین ژ بۆ هندێ مە تاكەكێ بەرهەمدار هەبیت).
د بەردەوامیا ئاخفتنا خۆدا سیروانی دیار كر، گەلەك یا گرنگە دەلیڤەیێن (سیاسی و كۆمەڵایەتی و ئابووری) ب گەنجێ مە بهێنە دان، بۆ هندێ ببیتە خودان بڕیار و دناڤ پارتێن سیاسی دا و ڕولێ خۆ هەبیت، دیسان دەلیڤێن پێكئینانا ژیانا هەڤژینیێ بۆ بهێنە ئاسانكرن و دەرفەتێن كاری ل كەرتێ تایبەت زێدەتر بكەن ودەلیڤە پتر بۆ گەنجان بیت دا كۆ ئەو ژی وەڵاتێ خۆ و ئاخا خۆ بجهنەهێلن).
هەلكەفت عەبدولواحد، میدیاكار و چاڵاكڤانە دەربارەی بابەتی دیاركر، د پتریا قوناغێن دیروكی دا ب هەر رەنگەكی كۆچكرن هەبوویە و پتریا وان ژی بەرەڤ وان جهان چووینە یێن دەرفەتا ژیانكرنێ هەبیت و گۆت (ب تایبەتی ل ڤێ دووماهیێ ئەوروپا یا بوویە ئەو ناڤەندا كۆ خەلكەك ژ ڕوژهەلاتا ناڤەڕاست و باكورێ ئەفریقیا و هندەك دەڤەرێن دی بەرێ خۆ ددەنێ، چونكی خەلك پتر داخباری وێ چەندێ یە كۆ ل وێرێ پتر دەلیڤێن كاری و ژیانەكا خۆشتر هەیە، هەر چەندە هندەك ژ گەنجان ژ بۆ خواندنێ و بلندكرنا ئاستێ خۆ یێ زانستی دچن یان هندەكێن دی ژ بۆ گەشتكرنێ و كۆمەكا ئەگەرێن دی، لێ پتریا وان د نوكە دا ژبەر بەرتەنگبۆنا رەوشا ژیانكرنێ و پتر هەبونا ئازادیێ كوچ دكەن).
هەلكەفتی ئەو چەندە ژی دا زانین، پرۆسا پەروەردێ و خواندنا بلند گەلەك یا گرنگە، لەوما یا گرنگە ریفۆرمەكا باشتر و یا سەردەمانە تێدا بهێتە كرن، بۆ هندێ تاكەكێ بەرهەمهێنەر بهێتە ئاڤاكرن كۆ ب كێر بازاڕی بهێت و گۆت (یا پێدڤیە دەلیڤێن كاری پتر بۆ گەنجان بهێنە دابینكرن و دادپەروەری پتر بهێتە بەرجەستەكرن، دیسان هەمی سازی و سەكتەرێن جۆدا دڤێت پێكڤە ب هەماهەنگی كاربكەن ژ بۆ ئازادی و ژیان دوستی و ژینگەهەكا ئارام پتر هەبیت، دا كۆ گەنج ژی بشێن ل وەڵاتێ خۆ بمینن).
