پێشانگەهەكا هونەری یا دەرزی و بزماران ل باژێرێ مهابادێ هاتە ڤەكرن
زنار تۆڤی:
ل باژێرێ مهابادێ ل رۆژهەلاتێ كوردستانێ، خانمەكا هونەرمەند یا وی باژێری، پۆرترێتێن هونەرمەندان و كەسایەتیێن كوردستانێ و بابەتێن كلتۆری یێن كوردەواری د ناڤ 30 كەڤالان دا ب رێیا دەرزی و بزماران كێشاینە و د پێشانگەهەكێ دا نیشاداینە.
ژیلا كەریمی، ئەو هونەرمەندا شێوەكارە، دبێژیت: هەر ژ زارۆكینیێ ئەز تێكەلی هونەری بوویمە و د نوكە دا و ب تایبەتی ئەز كار ل سەر هونەرێ دەرزی و بزماران دكەم، هەروەسا د ئێك ژ وان كەڤالێن من چێكرین ئەز شیایمە ڤی هونەری دگەل فەرشی تێكەل بكەم و كەڤالەكێ جوان ژێ بنەخشینم.
هەروەسا گۆت: قوتانا بزماران ئێك ب ئێك و نەخشاندنا وێنەیەكی ل سەر تەختەیی ب رێیا (دەرزییان) پێدڤی ب هووربینی و زەحمەتەكا زۆر هەیە هەتا ئەو وێنەیێ مرۆڤی دڤێت دروست بكەت، ل گەل هندێ ژی وەلاتیێن باژێرێ مهابادێ پشتەڤانیێ ل ڤی هونەری دكەن و د كەیفخۆشن كو خانمێن كورد ژی دشێن هونەرێ خۆ نیشا بدەن و پێشانگەهێن شێوەكاری ل وی باژێری ڤەكەن وەكو دیار هونەرێ دەرزی و بزماران بۆ جارا ئێكێ ل سەدێ 19 ێ ل ئورۆپا سەرهەلدایە، هەروەسا پەیوەندییەكا مۆكم د ناڤبەرا ڤی هونەری و زانستێ ئەندازیاری و بیركاریێ دا هەیە و ب گۆتنا هونەرمەندێن ڤی بۆاری، ئەڤ هونەرە نوكە پتر ل وەلاتێن ئەفریقا و هندستانێ یێ بەربەلاڤە، هەروەسا ل ئیرانێ و رۆژهەلاتێ كوردستانێ ژی ئەڤ هونەرە هێدی هێدی یێ گەشەیێ دكەت و بەربەلاڤ دبیت.
