پێشمەرگەیێ شۆڕەشا ئیلۆن و گولانێ رەشید سندی مالئاڤایی كر
زاخۆ، عەلی حاجی:
د رێورەسمەكێ تایبەت دا ب ئامادەبوونا سەربەست لەزگین، بەرپرسێ مەكتەبا رێكخستنا پارتی ل پارێزگەها دهۆكێ و گوهدار شێخۆ، سەرپەرشتێ ئیدارەیا سەربخوە یا زاخۆ و چەندین بەرپرسێن حزبی و حكومی و لەشكری، تەرمێ پێشمەرگەیێ هەردو شۆڕەشێن ئیلۆن و گولانێ رەشید سندی هاتە ڤەشارتن.
سەربەست لەزگین، بەرپرسێ مەكتەبا رێكخستنا پارتی ل پارێزگەها دهۆكێ د پەیڤەكێ دا دیار كر، پێشمەرگەیێ هەردو شۆڕەشێن ئیلۆن و گولانێ رەشید سندی كر و گۆت: «خودێ ژێڕازی كەسایەتیەكێ كوردپەروەر و رەوشەنبیر و زانا بوو، ژ دەستدانا وی خەمەكا گرانە بۆ مە و هەمی خەلكێ كوردستانێ، بناڤێ سەرۆك بارزانی سەرەخوەشیێ ل خوە و هەمی كوردستانیان دكەین، رەشید سندی د ژیەكێ بچووك دا خەباتا خوە یا پێشمەرگاتیێ دەستپێكر و هەر زوو گەهشتە پلەیێن گرنگ د ناڤ هێزێن پێشمەرگەیی دا، دیسا خودێ ژێڕازی ل گەل برایێ خوە یێ رەحمەتی سلێمان حاجی بەدریێ كەسێن نێزیكی بارزانیێ نەمر بوون، بنەمالا وان گەلەك نێزیكی بنەمالا بارزانیێ نەمر بوون، ئەڤە ژی نیشانا وێ باوەریێ و رۆلێ گرنگ بوو، كو د ناڤ شۆڕەشێ دا هەی، رەشید سندی ئێك ژ وان مێرخاسان بوو ژ نێزیك ڤە مە مێرخاسی و قارەمانیا وی دیتبوو، د ناڤ باژێرەكێ وەكی زاخۆ دا رابوویە، كو باژێرێ قارەمان و عەگیدایە و ئەڤە كەسێ ئێكێ و دووماهیێ نینە د ناڤ ڤی باژێری دا رادبیت».
ناڤبری گۆتژی: «بێگومان ژ بەر وی ئاستێ بلندێ رەوشەنبیری و هزری و نەتەوەیی هەمی دەمان سەرەدەریەكا دروست د هەمی رەوشان دا دكر، ئومێدەوارم د ناڤ بنەمالا وان دا كەسەك راببیت جهێ رەحمەتی بگریت ژ هەمی روویەكی ڤە و ئەو ڤالاهیا پەیدا بووی پڕ بكەت، خەبات و پێشمەرگایەتیا وی ناهێتە ژبیر كرن و مە كەسەكێ خودان پێگەه و گرنگ ژ دەست دا».
