پێنج بنگەهێن بەڕەڤانیا باژێری دێ ل دەڤەرا ئامێدیێ هێنە ڤەكرن
ئامێدیێ، مەحمود نهێلی:
ب بەرهەڤبوونا هەژمارەكا بەرپرس و رێڤەبەرێن حزبی و حكومی دوهی 10/6/2024 د دو رێورەسمێن جودا دا دو بنگەهێن بەرەڤانیا باژێری ل سنوورێ دەڤەرداریا ئامێدیێ هاتنە ڤەكرن و د چەند رۆژێن بهێن دا دێ سێ بنگەهێن دی ژی هێنە ڤەكرن.
عەقید بێوار عەبدولعەزیز، پەیڤدارێ بەرەڤانیا باژێری ل پارێزگەها دهوكێ بۆ رۆژناما ئەڤرۆ دیار كر، دو بنگەهێن بەرەڤانیا باژێری ل سنوورێ دەڤەرداریا ئامێدیێ هاتنە ڤەكرن، ئێك ژ ڤان بنگەهان ل كۆمەلگەها قەدشێ یا گرێدایی ناوچەداریا سەرسنكێ و یێ دویێ ژی ل سەنتەرێ ناوچەداریا كانی ماسێ هاتە ڤەكرن و گۆت: «ستاف بۆ بنگەهێ قەدشێ هاتیە دابینكرن و ل كانی ماسێ ژی وەك دەسپێك ستافەك بۆ هاتیە دابینكرن، هەتا ستاف بۆ دهێتە تەمامكرن».
ناڤهاتی گۆتژی: «د حەفتیێن بهێن دا جارەكا دی ئەو دێ سەرەدانا دەڤەرداریا ئامێدیێ كەن بۆ ڤەكرنا بنگەهەكێ دی یێ بەرەڤانیا باژێری ل ناوچەداریا چەمانكێ، ل ناوچەداریێن دێرەلۆك و شێلادزێ دێ بنگەهێن نقۆمڤانا هێنە ڤەكرن، ژ بەر كو ل وێ دەڤەرێ هەژمارەكا رووباران و جهێن گەشتیاری یێن ب ئاڤ هەنە و پێدڤی ب تیمێن نقۆمڤانان هەیە بۆ پاراستنا ژیانا وەلاتیێن دەڤەرێ ب گشتی و گەشتیاران».
پڕۆژە؛ د چارچوڤێ وان پڕۆژەیان دایە ژ بۆ گەهاندنا جاددەیان و پڕۆژێن خزمەتگوزاری بۆ گوندێن دەڤەرا ئامێدیێ و گۆت: «ئەڤ پڕۆژە پێك دهێت ژ چێكرن و قێركرنا رێكا گوندێ سەرگەلێ ب درێژاهیا هزار و 500 میتران، هەر ژ جاددەیا سەرەكی یا د ناڤبەرا دێرەلۆكێ و ئامێدیێ دا هەتا دگەهیتە د ناڤ گوندێ ناڤبری دا و دەرباز دبیت».
ناڤهاتی دیار ژی كر، ژ بۆ ئەنجامدانا ڤی پڕۆژەی پتر ژ 200 ملیۆن دیناران هاتینە تەرخانكرن، دیسا بەری نوكە ژی جاددەیێن چار گوندێن ڤێ دەڤەرێ هاتـبوونە چێكرن و گۆت: «جاددەیا گوندێن مژێ و كەڤنە مژێ و سپیندارێ و گرگاش ب درێژاهیا پێنج كیلۆمەتران هاتبوونە چێكرن و نێزیكی ملیار دیناران بۆ هاتبوونە تەرخانكرن و نوكە جاددە ب داوی هاتیە و كەفتیە د خزمەتا خەلكێ دەڤەرێ دا».