چاڤدێریا بازرگانی: دێ بهایێ گوشتی هێتە كۆنترۆلكرن
هەولێر، قائید میرۆ
رێڤەبەرێ گشتیێ بازرگانی ل وەزارەتا بازرگانی دیار كر، دێ بهایێ گوشتی ل بازاڕی هێتە كۆنتڕۆلكرن و دبێژیت: بهایێ تەرش و كەوالی ل بازاڕێن جیهانێ بلندبوویە و كاریگەری ل سەر بازاڕێ هەرێم و ئیراقێ ژی كریە. هەروەسا ئاشكراكر، دێ پێداچوون بۆ بهایێ كەلوپەلان هێتەكرن و ل هەیڤا رەمەزانێ دێ هەر سێ دانا تیمێن چاڤدێریێ ل بازاڕی بن.
نەوزاد شێخ كامل، رێڤەبەرێ گشتیێ بازرگانی بۆ رۆژناما ئەڤرۆ دیار كر» بلندبوونا بهایێ گوشتی ب تنێ هەرێما كوردستانێ ڤەنەگرتیە، بەرۆڤاژی بهایێ گوشتی ل بازاڕێن ئیراقێ و وەلاتێن دەوروبەر ژی یێ بلندبووی، ئەگەرێن بلندبوونێ ژی زۆرن، وەكی كێم بوونا تەرش و كەوالی ل هەرێما كوردستانێ كاریگەری هەیە، هەروەسا بهایێ تەرش و كەوالی ل وەلاتێن جیهانێ بلندبوویە و كاریگەری ل سەر بهایێ گوشتی پەیداكریە، ئەگەرەكێ دی یێ بلندبوونا بهایێ گوشتی بۆ ڤێ چەندێ ڤەدگەڕیت ئەو بازرگانێن تەرش و كەوالی ل دەرڤە دئیننە هەرێما كوردستانێ وەك پێدڤی مفا ل سەكویا ئەلكترۆنی وەرنەگرتیە هەتا بهایێ 100 دۆلارێن ئەمریكی ب 132 هزار دیناران بۆ بهێتە هژمارتن ژلایێ بەنكا ناڤەندی ڤە.
زێدەتر گۆت: بازرگانێن تەرش و كەوالی هێشتا ل بازاڕێ رەش دۆلاری و دراڤێ ئیراقێ د گۆهۆڕن، ل توركیا ژی باجا زێدەتر ئێخستیە سەر تەرش و كەوالی ل ئیرانێ ژی ناهێت نوكە ئەڤە هەموو ئەگەرێن بلندبوونا بهایێ گوشتی، ئەم وەكی بازرگانی بەردەوام دووڤچوونا بازاڕی و بهایێ كەلوپەلان دكەین بێگومان رێكێ نادەین خەلكەك ب حەزا بهای دانیت و مفایەكێ ئێكجار زۆر وەر بگریت، چونكە بازرگانی وەسلێن بازرگانان دبینیت و گورەی بازاڕێ رۆژێ بها دهێتە دیاركرن.
رێڤەبەرێ گشتیێ بازرگانی دبێژیت» ئەم نوكە یێ بزاڤان دكەین بۆ ئەرزانكرنا بهایێ گوشتی و هندەك باج و رسوماتێن ل سەر تەرش و كەوالی هەی كێم بكەین، چو راستی بۆ وان زانیاریان نینە یێن ل هندەك دەزگەهێن راگەهاندنێ و تۆڕێن جڤاكی دهێنە بەلاڤكرن، كو دێ بهایێ ئێك كیلۆیا گوشتێ سۆر گەهیتە 35 هزار دیناران، بەردەوام بازرگانی پێداچوونێ ب مەنافێستێن بازرگانان دكەت و دێ سنورەك بۆ گرانیا بازاڕی هێتە دانان و ب ڤی شێوەی رێ نادەین بهایێ گوشتی و كەل و پەلان یێ بلند بیت.
نەوزاد شێخ كامل ئاماژەكر «ل هەیڤا رمەزانێ ژبەركو خواست لسەر كڕینا كەلو پەل و خوارنێ زێدەتر دبیت، گۆهۆڕین دكەڤیتە بهایێ كەلوپەلان د بازاڕی دا، لەوڕا ل هەیڤا رەمەزانێ هەرسێ دانێن سپێدی و ئێڤاری و شەڤێ دێ لیژنەیێن چاڤدێریا بازرگانی دناڤا بازاڕی بن و چاڤدێریا بهایێ كەلوپەلان بكەن، ئەگەر بەرهەمەك بهایێ وی ل ژێدەرێ هاتی بلند ببیت ئەڤە د دەستهەلاتا مە نینە كێم بكەین، بەرۆڤاژی مفایەكێ كێم دێ چیتە سەر ل بازاڕی بهێتە فرۆتن.
خویاژی كر، هەموو بازرگان نەشیاینە بهایێ دۆلاری ب بهایێ بەنكا ناڤەندی مفادار ببن، ئەم یێ بزاڤان دكەین دگەل بەغدا هەموو بازرگان بشێن مفادار ببن ل بهایێ فەرمیێ دۆلاری كو 132 هزار دیناران، بێگومان وی دەمی دێ كاریگەری ل سەر بهایێ كەلوپەلان هەبیت و 20%ێ دێ بهایێ وان كێمتر بیت ل بهایێ نوكە هەیە، ئەم دخوازین بازرگانێن راستەقینە مفاداربن ل ئەڤێ سەكۆیا ئەلكترۆنی هەتا كاریگەری ل سەر داكەتنا بهایێ كەلوپەلان هەبیت.
